AMINAO, karakory ma Andra Fitsaran̈a zen̈y? Maro olo mieritreritry fa aminy Andra Fitsaran̈a io, hitsangana man̈oloan̈a Zan̈ahary olo tsiaraikiaraiky hitsarainy. Lan̈iany nan̈ano ny tsara handeha amy Paradisa andan̈itry an̈y, fa lan̈iany nan̈ano ny ratsy hijaly mandrakizay amy motrobe zen̈y. Baiboly tsy mampianatra zen̈y. Andra Fitsaran̈a io tsy raha tokony havozoan̈a, fotony aminandra io Zan̈ahary han̈atanteraka fikasan̈anany han̈ano tany ty paradisa.

Izikoa atsika mizaha aminy Apokalypsy 20:11, 12, karaha ty nambarany apostoly Jaona momba Andra Fitsaran̈a io: “Zaho nahita seziny panjaka fotsy maventy ndreky Araiky nipetraka tan̈abony. Tany ndreky lan̈itry nilefa niala nan̈oloan̈a izy, fotony efa tsisy toeran̈andro eky. Hitako olo maty na tsaiky na olobe, nitsangana man̈oloan̈a seziny panjaka io, baka io nisy horonamboky nivilarin̈y. Nisy horonamboky araiky hafa koa nivilarin̈y. Izio horonambokiny fiain̈ana. Olo naty jiaby nitsarain̈y eraka raha nataondro voasoratra taminy horonamboky aby io.” Azovy ma nitsara iro io?

Marin̈y ndraiky fa Zan̈ahary Jehovah Pitsara farany an̈abo, kanefa misy olo hafa nifidiny hitsara. Aminy Asan’ny Apostoly 17:31, apostoly Paoly nivolan̈a karaha ty: “Izy efa nifidy andra araiky hitsaran̈a tany jiaby, ke nifidy lelahy araiky izy hitsara iro eraka ny marin̈y.” Jesosy Kristy lelahy nifidiny Jehovah hitsara io. (Jaona 5:22) Ombian̈a ma Andra Fitsaran̈a io manomboko? Hahadin̈y firy taon̈o ma izio?

Amy bokiny Apokalypsy amy Baiboly ao man̈ambara fa koa fa vita Haramagedona, manomboko Andra Fitsaran̈a.  Jehovah amy zen̈y handravan̈a donia ratsiny Satana ty. * (Apokalypsy 16:14, 16; 19:19–20:3) Satana ndreky demony aby io higadrain̈y arivo taon̈o, an̈aty lavaka tsy hita farany. Iro 144 000 aby io koa hitsara ndreky hanjary panjaka, hiaraka amy Jesosy Kristy andan̈itry an̈y. (Apokalypsy 14:1-3; 20:1-4; Romanina 8:17) Andra Fitsaran̈a io tsy raha atao mekimeky an̈atiny andra araiky. Izio mahadin̈y arivo taon̈o.

An̈atiny arivo taon̈o, Jesosy Kristy ‘hitsara ny velon̈o ndreky ny maty.’ (2 Timoty 4:1) Azovy ma iro ‘velon̈o’ io? Iro io “vahoaka be” ho tafitsaka aminy Haramagedona. (Apokalypsy 7:9-17) Apostoly Jaona koa nahita olo aby efa naty in̈y, mitsangana man̈oloan̈a seziny panjaka. Jesosy Kristy efa nampan̈anten̈a fa ‘iro ampasan̈a ao haharen̈y feonany, ke hiboaka’ na ho velon̈o ndraiky. (Jaona 5:28, 29; Asan’ny Apostoly 24:15) Karakory ataony Jesosy hitsara iro io?

Karaha nambarany apostoly Jaona in̈y, ‘nisy horonamboky nivilarin̈y, ke iro naty in̈y nitsarain̈y eraka raha nataondro voasoratra taminy horonamboky tao.’ (Apokalypsy 20:12) Izio ma raha jiaby nataonolo io talohany izy naty ma raha tiany apostoly Jaona koran̈iny? Tsy zen̈y, fotony Baiboly efa nivolan̈a karaha ty: ‘Olo koa fa maty, afaka madiodio amy fahotan̈anany.’ (Romanina 6:7) Dikanizen̈y, raha koran̈iny horonamboky io raha hafa irahiny Zan̈ahary hatao. Tsy maintsy man̈araka didinany olo jiaby tafitsaka aminy Haramagedona ndreky iro olo aby hivilomin̈y io, izikoa man̈iry hahazo fiain̈ana tsisy farany. Tsy maintsy man̈araka raha vaovao takiny Jehovah koa iro an̈atiny arivo taon̈o. Hitantsika baka amy zen̈y fa raha hataonolo araiky an̈atiny Andra Fitsaran̈a io hitsaran̈a izy.

An̈atiny Andra Fitsaran̈a io, olo mandeha andrivony tapitrisa sambany hiaraka hianatra ndreky han̈ano sitrapony Zan̈ahary. Dikanizen̈y, ho hisy asa farany maventy hatao amy zen̈y, fotony iro io tsy maintsy hampianarin̈y. ‘Hianatra ny  marin̈y [ankitin̈y] olo marobe erantany.’ (Isaia 26:9) Ndray izy man̈ano zen̈y, tsy olo jiaby zen̈y von̈ono han̈ano sitrapony Zan̈ahary. Karaha ty koran̈iny Isaia 26:10: “Olo ratsy fan̈ahy ndray atao tsara, izy tsy mety mianatra ny marin̈y; ndray izy efa amy taniny fahitsian̈a, izy tsy mety hahita habezan̈a Jehovah.” Haripaka olo aby ratsy fan̈ahy karaha zen̈y an̈atiny Andra Fitsaran̈a io.—Isaia 65:20.

Izikoa fa ho tapitry Andra Fitsaran̈a io, ho “velon̈o” ankitin̈y olo jiaby tavela eto, fotony efa manjary lavorary. (Apokalypsy 20:5) Dikanizen̈y, an̈atiny arivo taon̈o io olo himpody lavorary ndraiky. (1 Korintianina 15:24-28) Satana hivotsoran̈a, baka io izy hambela hamitaka olombelon̈o. Zen̈y fitsapan̈a farany zen̈y. (Apokalpsy 20:3, 7-10) Zay olo tsy mivadiky amy fitsapan̈a farany io hahazo hatsaran̈a volan̈iny Soratra Masin̈y ty: “Olo marin̈y handova tany ty, ke hipetraka io tsisy farany.” (Salamo 37:29) Ten̈a hamparavoravo olo tsy mivadiky amy Zan̈ahary ankitin̈y Andra Fitsaran̈a io!