UW ROGON fare Rran ko Pufthin u wan’um? Boor e girdi’ e ma lemnag ni rorran nem e yira pining bokum bilyon e girdi’ ni be’ nge be’ nga p’eowchen Got u tagil’, ngemu’ min pufthinnagrad. Boch i yad e ra yan nga tafen e flaab u tharmiy ma boch i yad e ra yan nga bang nguun gafgownag ni manemus. Machane, ba thil e n’en ni be yog e Bible u murung’agen e re ngiyal’ i n’em. Be yog nre ngiyal’ i n’em e gathi ba ngiyal’ ni ngan rus ngay, ya aram e ngiyal’ nra riyul’ e tin gad be athapeg me sul urngin ban’en nga rogon.

I weliy apostal John murung’agen fare Rran ko Pufthin u Revelation 20:11, 12 ni gaar: “Ma aram mu gguy tagil’ ba pilung nib wechwech ma ba ga’ nge en ni ke par ngay. Me mil e fayleng nge tharmiy u p’eowchen nga bayang nge da ku ni guy. Ma aram mu gguy e piin ni kar m’ad ni piin nib tolang nge piin nib sobut’ ni kar sak’iygad u m’on u tagil’ Got. Min pithig e babyor, mu kun pithig ba ken, ni fare ke babyor ni babyoren e piin kar fosgad. Ma piin kar m’ad e ni pufthinnagrad ni be yan u rogon e n’en ni ur ngongliyed, ni bod rogon ni kan yoloy nga lan fa yu ke babyor.” Mini’ fare Tapufthin ni kan weliy murung’agen u roy?

 Jehovah Got e ir e bin th’abi ga’ e Tapufthin. Machane, bay be’ ni ke tay ni nge pufthinnag e girdi’. Rogon ni yog apostal Paul u Acts 17:31 e ke turguy Got “reb e rran ni ir e nge pufthinnag riy e fayleng ni polo’ nrogon nib mat’aw, ni nge rin’ u daken be’ nib moon ni ir e ke dugliy.” Cha’nem ni kan dugliy e aram Jesus Kristus. (John 5:22) Ere, wuin e ra tabab fare Rran ko Pufthin? Ma uw n’umngin nap’an e re pufthin nem?

Be yog e Revelation ni fare Rran ko Pufthin e ra tabab u tomuren ni kan thang e re m’ag rok Satan ney u nap’an e Armageddon. (Revelation 16:14, 16; 19:19–20:3) Tomuren e Armageddon e yira kalbusnag Satan nge pi moonyan’ rok u lan bbiyu’ e duw. Aram e ngiyal’ nra un fare 144,000 e girdi’ ngak Kristus ko gagiyeg u tharmiy ni kar manged boch e tapufthin nge pilung u lan “biyu’ e duw.” (Revelation 14:1-3; 20:1-4; Roma 8:17) Ere, fare Rran ko Pufthin e gathi taareb e rran ni 24 e awa n’umngin nap’an, ya bbiyu’ e duw.

U lan e re biyu’ i duw nem e ra pufthinnag Jesus Kristus “urngin e girdi’, ni piin ni ka yad ba fos nge piin ni kar m’ad.” (2 Timothy 4:1) “Piin ni ka yad ba fos” e be yip’ fan fare “ulung ni ba ga’” ni yad ra magey ni yad ba fos u tomuren e Armageddon. (Revelation 7:9, NW, 10-17) Ki guy apostal John e “piin ni kar m’ad . . . ni kar sak’iygad u m’on u tagil’” e pufthin. Bod rogon ni micheg Jesus ni “gubin e yam’ ni bay u lan e low ni bayi rung’ag laman, mi yad yib u lan e low rorad nga wuru’,” ni aram e kar fasgad. (John 5:28, 29; Acts 24:15) Machane, uw rogon ni yira pufthinnagrad?

Rogon ni yog apostal John e ni “pithig e babyor” ma “piin kar m’ad e ni pufthinnagrad ni be yan u rogon e n’en ni ur ngongliyed, ni bod rogon ni kan yoloy nga lan fa yu ke babyor.” (Revelation 20:12) Gur, n’en ni bay ko yu ke babyor nem e aram e tin ni i rin’ e girdi’ u m’on ndawor ra m’ad? Danga’. Uw rogon ma kad nanged e re  n’ey? Be yog e Bible ni gaar: “Faanra yim’ be’ ma ke chuw u fithik’ i gelngin e denen.” (Roma 6:7) Piin ni yira fasegrad ko yam’ e kan n’ag fan urngin e denen ni ur rin’ed u m’on ndawor ra m’ad. Ere, yu ke babyor nem e yugu boch e motochiyel ni bay fini pi’ Got. Faanra baadag e piin ni yad ra magey ni yad ba fas u tomuren e Armageddon nge piin ni yira fasegrad ko yam’ ni ngar pared ni manemus ma thingar ra folgad ko motochiyel rok Got, ni kub muun ngay e pi motochiyel ni bay fini pi’ Got u lan fare biyu’ i duw. Ere, pufthin ni yira tay ngak gubin e girdi’ e ra yan u rogon e n’en yad ra rin’ u nap’an fare Rran ko Pufthin.

Nap’an fare Rran ko Pufthin e aram e ngiyal’ nra fil bokum bilyon e girdi’ murung’agen e tin nib m’agan’ Got ngay mar folgad riy. Ere, ngiyal’ nem e boor ban’en ni yira fil. Maku yira nang ko “mang e ba mat’aw.” (Isaiah 26:9) Machane, gathi gubin e girdi’ nra fol. Be gaar e Isaiah 26:10 (BT): “Yugu aram rogon ni gab gol ko piin nib kireb, ma darir nanged rogon i rin’ e tin nib mat’aw. Mus u roy u lan e nam ko girdi’ nib mat’aw ma ka yad be ngongol nde mat’aw; yad be siyeg ni ngar nanged feni sorom.” Piin ndab ra folgad e yira thangrad u nap’an fare Rran ko Pufthin.​—Isaiah 65:20.

U tungun fare Rran ko Pufthin e fin rayog ni nge par e girdi’ nib ‘fos’ ni manemus ni kar flontgad. (Revelation 20:5) Ya nap’an fare Rran ko Pufthin e aram e ngiyal’ ni yira sulweg e girdi’ nga rogon ni bod ko tabolngin. (1 Korinth 15:24-28) Ngemu’ mfini yib e bin tomur e skeng ni aram e yira pag Satan u kalbus nib ngoch nap’an ni ngki guy rogon ni nge bannag e girdi’. (Revelation 20:3, 7-10) Ma piin ni yad ra fol e ri yad ra felfelan’ u nap’an ni yad ra guy ni ke lebug fare yiiy u Bible ni gaar: “Piin ni yad mmat’aw e bay ra pired u daken e binaw u fithik’ e gapas, me par ni taferad ni dariy n’umngin nap’an.” (Psalm 37:29) Arrogon, yira tow’athnag e piin nib yul’yul’ u nap’an fare Rran ko Pufthin!