MO NABERÃPA Rago Sapangbanga nga si nika du wai? Badungu aboro naberã gupai nga, Rago Sapangbanga nga gu regbo abirioni aboro nika ru ti tenge barabangiri ga Mbori mbatabakindo. Fuoho, Mbori kini ru ka sapangbanga yo wadu yo dunduko ni basasa. I nika dia gu weneyo ku ngbangbaturũ yo ku rogo bawene raka, ono aguyo ki gbia nyenye mbusa rogo we yo. Ono tie, Ziazia Kekeapai nagumbapa Rago Sapangbanga kia ti gure. Si naringbisapa gu regbo re ni regbo weneapai na regbo karaga apai kubaha, angianga ni kere regbo ya.

 Ani nageda gupai rogo Yugoti 20:11, 12 tipa Rago Sapangbanga nga: “Mi ki bi bakere pusi mbata sapangbanga, gu ko nasungu auru he, kpotosende na ngbangbaturũ ki oro be kpakpuko; ka i abi nga ba tipa ha ya. Mi ki bi agu yo naima kpika, nga kikindigi pa yo na umba pa yo, i niru barangba mbata sapangbanga, i ki za akitabu. I ki za gu kura kitabu nga kitabu unga. I ki sapu ngbanga agu yo naima kpika kuti agu apai du ni keke he rogo akitabu, ringbisi he kuti gayo mangaapai.” (Yugoti 20:11, 12) Da du nga gu Basapungbanga nika sapangbanga aboro re?

Yekova Mbori nga gu boro du na yangara fugo sapangbanga ngbani. Ono tie, ko ima asiapa sapangbanga fu kura boro. Rogo Amokedi 17:31, Pauro aya wẽ Mbori ‘ringbisi rame, ko nika sapangbanga zegino ni rurupai rogo yo be gu kumba ko aasia paha fuko.’ Gi kumba re nga Yesu Kristo. (Yoane 5:22) Ono gini regbo Rago Sapangbanga nika tona? Bagizoho nika du wai?

Gu kitabu nga Yugoti nayugo gupai nga, Rago Sapangbanga nika tona tingbafuo gu vura nga Aramegido, ho Mbori nika gbarasa ga Satana sino raka ni gbiati gbegberẽ aboro. (Yugoti 16:14, 16; 19:19–20:3) Fuo Aramegido, i nika zio Satana na gako adaimona ki bayo ku rogo gu due adunga mburuhe ti ni ya, yo i nika du ni tipa agarã kutu. Vuru gu regbo re, agu adikumbo du bangeyo nga 144,000 nika du ni abasapungbanga na kini zogorago ni abakindo “na Kristo agarã kidu 1000.” Sidu, Rago Sapangbanga nika du tipa bagizo regbo nga agarã kutu.

Vuru agu agarã kutu re, Yesu Kristo nika ‘sapangbanga unga aboro na kangba aboro.’ (2 Timoteo 4:1) Gu “unga aboro” re nga gu “bakere rimbasa aboro” nika bata be Aramegido. (Yugoti 7:9-17) Yoane abi ‘aguyo a naima kpika, i niru barangba mbata sapangbanga.’ A wa Yesu agumbaha, ‘aguyo dunduko du rogo amurã yo nika gia fugoko ki kuru.’ (Yoane 5:28, 29; Amokedi 24:15) Ono ginipai i ka  sapangbanga agu aboro kutini nika bata be Aramegido na aguyo i nika zingisayo be kpio?

Ringbisihe kuti gu Yugoti Yoane abihe, ‘i aza akitabu,’ i ki “sapu ngbanga agu yo naima kpika kuti agu apai du ni keke he rogo akitabu, ringbisi he kuti gayo mangaapai.” (Yugoti 20:12) Ya mo agi akitabu re gudu na keke agu apai rogoho agu aboro re amangihe mbata kusayo? Oó. Gu boro i nika zingisa ní be kpio, i asapanga ngbanga ní berewe ringbisihe kuti agu apai ní amangihe mbata fu kpi ní te. Ani naino gipai re wai? Ziazia Kekeapai naya: “Gu ni kpi i di pa ingapai ri ni.” (ARomo 6:7) I nika zingisa agu aboro re zanga ingapai riyo. Sidu tie, agu akitabu i nika zakaha re nika ngia gu vovo akitabu nika du na ga Mbori arugute rogoho. Agu aboro nika bata be Aramegido gbiati aguyo nika zinga be kpio, ka i aida ka raka nyeanye kindi, i duwa ka i ndu kuti ga Mbori andiko gbiati gu kura vovo arugute ko nika fuhe vuru agu agarã kutu re. Sidu tie, i nika sapangbanga agu aboro re ringbisihe kuti agu apai i nika mangaha vuru agu agarã kutu nika ngia Rago Sapangbanga re.

Rago Sapangbanga nika fu momu fu badungu abirioni aboro i wirikipai tipa gupai Mbori akpinyemuhe na kini ndu kutini. Gere nayugo gupai nga bakere sunge yugopai nika du adu. Nirengo, ‘araki rogo zegino awirikapa rurupai.’ (Yesaya 26:9) Ono tie, anga aboro dunduko nika ndu kuti gupai Mbori akpinyemuhe te. Yesaya 26:10 naya: “Ka i vura yugo inapai fu gbegberẽ boro vurũ, ni aina nga pa rurupai te; ni amanga pai ni iraira ha ringara nzunzu apai yo ni abi nga gu taarimo nga ga Yekova te.” Agu aboro nika du ni gbegberẽ yo, i nika imoyo aimo nyeanye kindi.—Yesaya 65:20.

Ti digido Rago Sapangbanga, agu aboro nika bata, i nika du “ni ungayo” ni rengberengbe aboro. (Yugoti 20:5) Rago Sapangbanga nga gu regbo i nika karaga aboro i du ni rengberengbeyo wa gu Adamu adu. (1 AKorindo 15:24- 28) Fuo gure, yangara asada kini du. I nika zaka Satana due yo ki mbuko ko asadi aboro ni yangaraha. (Yugoti 20:3, 7-10) Agu aboro nika diabeko, i nika ngia agu aboro nika raka nyeanye kindi auru kpotosende, a wa Ziazia Kekeapai agumbaha kini ya: “Ruru aboro adía kumbo ringara, ki nye anye kindi.” (Atambuahe 37:29) Ii nirengo, Rago Sapangbanga nika ngia bawene regbo fu ruru aboro!