¿XPENSARYLO ximod gac Día del Juicio? Xidal buñ raluladx que xidalguixo almas guisagaʼ por tigaaga nisló trono xtuny Dios par gac juzgaryibu. Láaca ronyibu pensary que stipnés guicaʼ galnasác xtuny Dios de guibanyibu sacró lainy guibá, per stipnés buñ sac condenar ló galrrioop por tipzó. Per la Biblia raslooy que Día del Juicio gadzé mod sácni: diti sácni toib tiemp de galnadzuʼpy, sino toib tiemp de esperanza né par gac copy guirá cós.

Ló Revelación 20:11, 12, Juan rabexa ximod gac Día del Juicio: «Bibiʼya toib trono xiroʼ color niquiich né Ni sob loni. Nislóbu gudxlio né guibá bireʼ see, né ma diti goyoʼ lagary par layibu. Né bibiʼya gueʼet nigox né bimbiox sagaʼ nisló trono, né bixal rollos. Per bixal stoib rollo, nacni rollo xtuny galnabany. Né gueʼet góc juzgaryibu mod caa ló rollos mod bunyibu». ¿Chú nac Juez ni sob ló trono reʼ?

Jehová Dios ngú Juez ni diti noʼ chú rigaʼl. Per ma bisiambu dxiinreʼ ladxña stoib buñ. Xomod sieed ló Hechos 17:31, Pablo goniʼ que Dios «ma biliñabu toib dzú ro láabu goloʼbu guicbu gony juzgarbu guidopynac gudxlio xinésni por toib buñguieeu ni láabu ma golúbu». Né Juez reʼ nac Jesucristo ni ma biás lad gueʼet (Juan 5:22). Per ¿pu dzú saló Día del Juicio né balac gaclani?

 Revelación raslooy que Día del Juicio salóni órni guilox Armagedón, ni guinitló xcudxliogox Buñdzab * (Revelación 16:14, 16; 19:19–20:3). Órni guilox Armagedón, Buñdzab né xidemony guiegyibu lainy abismo por tipmil íz. Ló tiemp cú 144,000 ni noʼ guibá sony juzgaryibu buñ né sony «mandaryibu xomod ni rony mandary né Cristo por 1,000 íz» (Revelación 14:1-3; 20:1-4; Romanos 8:17). Xomod ma bienno Día del Juicio diti sácni toib tiemp ni salox naguel, diti nosi sácni toib dzú ni rimbuno, sácni por tipmil íz.

Ló tipmil íz cú, Jesucristo sony «juzgar buñ ni nabany né buñ ni ma goity» (2 Timoteo 4:1). Diitz «buñ ni nabany» raduidyni diitz a «xidalguixo buñ», ni ralaa ló Armagedón (Revelación 7:9-17). Juan láaca bibiʼ, «gueʼet [...] ni sagaʼ nisló trono» de juicio. Xomod goniʼ Jesús «guirá ni noʼ lainy baʼ conmemorativas sien xirudx [Cristo] né sareʼ» (Juan 5:28, 29; Hechos 24:15). Per órni gac ndeʼ, ¿xí guibiʼ juez par gony juzgar layibu?

Ló visión ni gop Juan «bixal rollos» né «gueʼet góc juzgaryibu mod caa ló rollos mod bunyibu» (Revelación 20:12). ¿Caa ló rollos reʼ guirá cós ni bunyibu nírcu la? Yaca. Juicio reʼ diti sácni por cós ni bunyibu antes de ñaityibu. ¿Ximod nánno láani? Portín la Biblia raslooy que «ni ma goity ma godudy xcalkié scásiʼ» (Romanos 6:7). Per guirá buñ ni guiás stoib, sanitló xcalkié. Por ngú rollos reʼ rony representar ni Dios guinab dzúcu. Guirá buñ ni guiás dzúcu né guirá ni nabany godudy ló Armagedón par guibanyibu tipzó non guisobyibu ni guinab Dios layibu. Lad guirá ndeʼ sioʼ guirá cós ni guinab Jehová gonyno ló tipmil íz cú. Modreʼ por tigaano sac juzgar lóono por ni bunyno ló Día del Juicio.

Ló Día del Juicio reʼ xidalguixo buñ sapyibu primer oportunida de guisuidyibu ni ná Dios né de gonyibu láani. Ndeʼ raslooy que non gac toib dxiin rodann ro guisuidy buñ gann ni  canab Dios. Scú, «buñ ni rabés [ló Gudxlio] rasuidyibu gonyibu xinésni» (Isaías 26:9). Per diti guirá buñ sasaguel gony ni ná Dios. Isaías 26:10 ná: «Ná rac toib favor a buñ mal, diti sasuidybu sacbu buñtzay. Ná cuésbu ló toib gudxlio ro rac xinésni láabu sonybu cós mal, né diti sabiʼbu balaati midid nap Jehová galnadip». Buñ mal reʼ sanitlóyibu por tipzó ló Día del Juicio (Isaías 65:20).

Órni guilox Día del Juicio, buñ ni diti saity sabanyibu xomod goniʼ Dios, ma diti sapyibu galkié (Revelación 20:5). Por ngú, ló Día del Juicio buñgudxlio sadxin sac xomod bisaʼ Jehová Adán né Eva nírcu (1 Corintios 15:24-28). Ór cú guieed toib galnagan ni guislox láani. Par gac ndeʼ, Buñdzab sareʼ lainy abismo né sacaʼbu lagary par guiyopybu mod kitquelbu buñgudxlio por último (Revelación 20:3, 7-10). Buñ ni guicaló Buñdzab sabiʼyibu ximod rac cumplir tzaay texto reʼ: «Buñ ni rony xinésni xtunyibu sac gudxlio, né por tipzó sabanyibu loni» (Salmo 37:29). Scú, Día del Juicio sácni toib galnasác ni guiduidy Jehová guirá ni rasob xtiitzbu.