PETU ñi akunon 1914 tripantu, kiñe trokiñche chillkatukelu Biblia fentren tripantu wüldungukefuyngün 1914 tripantu mu fillke rupan dungu ñi müleal. ¿Chem fillke dungu rupayafuy? ¿Chem dungu mu pengeli feychi 1914 tripantu ñi doy falin-ngen?

Luka 21:24 papeltuiñ Jesus ñi feypin: “Itrokom trokiñ mapu mew fey ti pu judiu tuwünngenolu wilukonpuay ka fill wesa dungu femay ta Jerusalen waria mew, fey puwle wüla ti tripantu tañi fentepu legtukünulngeel [itrokom trokiñ mapu mu]”, kam “ti pu  Judio Tuwün-ngenolu ñi medin antü”, chumngechi tañi feypin tati Reina-Valera 1865 tripantu mu. Pu judioche ñi waria Jerusalen ngefuy. Feychi waria mu longko ülmenkülekefuy David ñi küpanche (Salmo 48:1, 2). Tüfachi pu longko ülmen kalekefuy kakelu wentru ñi ngünenieel, fey engün am anülelu “Jewba ñi ülmen wangku mu”, tüfa feypi dungukefuyngün Chaw Ngünechen ñi üy mu (1 Crónicas 29:23). Femngechi ta Jerusalen adentuley Jewba ñi Ngünenien.

Feymew, ¿chumngechi ka chumül am tati trokiñ mapu eluwi ñi ‘fill weda femafiel’ Ngünechen ñi Ngünenien? Tüfa rupay feychi 607 tripantu mu, petu ñi mülenon Jesus (p.m.j.), pu babiloniache ñi nütufiel ta Jerusalen waria. Feymu “Jewba ñi ülmen wangku” welliletuy, ka katrüñmangey David ñi küpanche ñi longko ülmenküleal (2 Reyes 25:1-26). ¿Rumel amulepeafuy may ñi ‘fill weda femfiel’ ta Jerusalen? Femlay tati, Pablo dunguy Isaia ñi feypikünun: ‘Jese tañi yomel reñmache mew tripayay kiñe wentru tati longko ülmenkülealu kom trokiñke mapu mew’ (Romanu 15:12). Feychi wentru femürpuy tüfachi feypikünun, fey Jesukristo tati (Luka 1:32, 33). Fey llemay, Longko Ülmen-ngele Jesus, fentekünungeay ñi ‘fill weda femafiel’ ta Jerusalen.

 ¿Chumül am rupay tüfachi falin rupan dungu? Jesus feypi tati pu che judio tuwün-ngenolu ñi longko ülmenküleal ñi legkünuel feychi medin antü. Daniel kapitulo 4 kellukeeiñmew taiñ kimal tunteñmayal tüfa. Tüfachi nütram, pengeli Nafukodonosor ñi pewma, kiñe longko ülmen Babilonia mapu mu tuwlu. Tüfachi wentru ñi pewma mu, pey chumngechi katrüngey kiñe fütra anümka. Ka tati anümka elkünungey ñi mutrung müten, fey ñi tremnoal trarikünungey pañilwe ka kofre mu. Fey wüla kiñe küme püllü werküy: “Rupape regle medin antü tüfa mu” (Daniel 4:10-16).

Biblia mu, kiñeke rupa tati anümka adentukünungekey tati ngünenien (Ezequiel 17:22-24; 31:2-5). Fey llemay, tati anümka ñi katrüngeel tüfa feypi Ngünechen ñi Ngünenien ñi katrütuñmangeel, tüfa adentuley pu longko ülmenkülelu Jerusalen waria mu. Kafey, tati pewma feypi pichin antü mu ‘wedalkangeal ta Jerusalen waria’, “regle medin antü”. Feymu, ¿tunteñmayay feychi medin antü?

Apokalipsi 12:6, 14 feypi: “Küla tripantu ka rangiñ [tüfa feypifel, küla medin antü ka rangiñ]” tüfa ta “kiñe warangka epu pataka kayu mari antü”, feymu tüfachi “regle medin antü” epu rume trapümngele puway: 2.520 antü. Feymu, tati trokiñ mapu judio tuwün-ngenolu fentekünulay ñi ‘fill weda femafiel’ Ngünechen ñi Ngünenien 2.520 antü dew rupalu Jerusalen ñi apümkangemum. Feymu lle, tüfachi pelon dungu müley ñi doy alüñmayal. Ngüneduamliyiñ Números 14:34 ka Ezequiel 4:6, peaiñ tüfachi epu texto mu feypi kiñe werkün dungu: “Kiñe antü kiñe tripantukünungey”. Rakiliyiñ tüfachi trürümfal dungu, “regle medin antü”, diturpuaiñ 2.520 tripantu.

Feychi antü 2.520 tripantu, llituy octubre küyen 607 tripantu mu petu ñi mülenon Jesus —tati pu babiloniache nütufi Jerusalen waria ka nentufi ti longko ülmen küpalu David ñi pu che mu— ka afpuy octubre küyen 1914 tripantu mu. Feymu puwlu “ti tripantu tañi fentepu legtukünulngeel [itrokom trokiñ mapu]”, femngechi Chaw Ngünechen elkünuy ta Jesukristo ñi Longko Ülmenküleal wenu mapu mu (Salmo 2:1-6; Daniel 7:13, 14). *

 Jesus feypikünuy “ngüneniele wenu mapu mu” Longko Ülmenkülen mu, müleay afmatufalchi rupan dungu, tüfa ta ngüñün, weychan, nüyün ka fillke kutran (Matew 24:3-8, TNM; Luka 21:11). Femngechi rupay llemay. Tüfachi rupan dungu küme pengeli 1914 tripantu mu, elkünungey Ngünechen ñi Ngünenien wenu mapu mu, femngechi llituy ‘ti afaelchi antü’ tati wedake dungu Mapu mu (2 Timotew 3:1-5).