JANIR 1914 maräkipanwa, Bibliat yatiqirinakaxa, uka maranxa kunayman jachʼa luräwinakaw pasani sasaw yatiyapxatayna. ¿Kunas pasañapäna? ¿Kunanakasa 1914 marax wali wakisirïtap uñachayistu?

Lucas 21:24 uñxatañäni, Jesusax siwa: “Yaqha markat jutirinakaw Jerusalén markxa taksupxani, kunapachkamatï uk lurañatakix tiempox churatäki uka horaskama” sasa. Jerusalenax Judá markan capitalapänwa. Ukanwa David reyin wawanakapax apnaqapxiritayna (Salmo 48:1, 2). Uka apnaqirinakaxa janiw yaqha markanak apnaqirinakjamäpkänti, Jehová  “Tatituna tronopana” quntʼatäpxänwa, mä arunxa Diosan uttʼayat apnaqirinakapxänwa (1 Crónicas 29:23). Ukhamasti, Jerusalenax Jehová Diosan apnaqäwipäkaspas ukhamänwa.

Ukhamasti, ¿kunapachas markanakax Diosan Apnaqäwipar takisipxpachänxa? ¿Kunjamsa? 607 nayrïr pacha (n.p.) maranwa, kunapachatix babiloniankirinakaxa Jerusalén markar tukjapkäna ukhawa Diosan Apnaqäwipxa taksupxatayna. Uka maratxa David reyin wawanakapaxa janiw Jehová “Tatituna tronopana” jan ukax apu qunuñan quntʼasxapxänti (2 Reyes 25:1-26). ¿Wiñayatakiti Jerusalén markarux “taksupxani”? Janiwa, kunattix Gabriel sat angelaxa Jehová “Tatituw juparux [Jesusarux] reyit uttʼayani nayra Davidarjama” sataynawa (Lucas 1:32, 33). Ukhamaxa Jerusalén markaxa janiw ‘taksutañapäxänti’, Jesusaw Apnaqirit uttʼayatäñapäna.

¿Kunapachas ukax pasäna? Yaqha markankirinakaw (jan judiöpkis ukanakaw) mä qhawqha tiempo apnaqapxani sataynaw  Jesusaxa. ¿Qhawqha tiempüñapänsa? Uka tuqitxa Daniel libro pusi jaljanwa sum qhanañchasi. Nabucodonosor sat Babilonia apnaqiriw mä profecía samkasitayna, uka tuqitwa ukanx parlaski. Mä jachʼa quqwa khuchuqapxäna, ukat uka troncopatxa mä jiskʼakwa jaytapxäna, jan jiltañapatakixa hierrompi cobrempiwa ñachʼaqapxäna, ukhamwa samkapanxa uñjatayna. Ukatsti mä angelawa akham sarakïna: ukasti “paqallqu maranakarakïpan” sasa (Daniel 4:10-16).

Biblianxa yaqhipäwjanakanxa quqanakar uñtayataw apnaqäwinakaxa (Ezequiel 17:22-24; 31:2-5). Jerusalén markankiri apnaqirinakax Jehová Diosan uttʼayatänwa. Ukhamasti, Diosan Apnaqäwipas khuchuqatäkaspa ukham sañ muni uka liwinuqat jachʼa quqaxa. Ukatxa, Jerusalén markxa ‘paqallqu maranakaw’ “taksupxani” sarakitaynawa. Uka maranakax janiw 12 phaxsinakani aliq maranakäkänti jan ukasti profecía maranakänwa. Ukhamasti, ¿qhawqha tiemposa pasañapäna?

‘Kimsa mara chikanixa’ ‘waranqa pä pataka suxta tunka urunakaniw’ siw Apocalipsis 12:6, 14 jiskʼa tʼaqanakanxa. Ukhamax “paqallq maranakaxa” mä ukhat mä ukhampïñapawa, mä arunxa 2.520 urunakäñapawa. Jichhasti, Jerusalén tʼunjapkän ukat aksarux janiw 2.520 urunakak Jerusalenarux takisipkänti. Ukhamasti uka profeciaxa, janiw jukʼa tiemponaki phuqasiñapäkänti. Números 14:34 ukat Ezequiel 4:6 qillqatanak uñxatañäni, ukanxa akham siwa: “Sapa urusti mä mara[w]” sasa, ukhamax profecía “paqallq maranakaxa” 2,520 maranak sañ muni.

607 n.p. octubre phaxsina, kunapachatï babilonionakax Jerusalén tʼunjapkäna, ukat David reyin wawanakaparus tronot apaqapxäna, ukhawa 2.520 maranakax jakhusiñ qalltäna, ukasti 1914 marakamarakiwa. Ukhaw markanakar “churatäki” uka “tiempox” tukusxäna. Ukharakiwa Diosax Jesusar Apnaqirit alaxpachan uttʼayäna (Salmo 2:1-6; Daniel 7:13, 14). a

 Alaxpachankir Apnaqirjam ‘kuttʼanï’ ukhasti chʼaxwäwinakaw utjani, ukat awtjayasiñanakampi, uraq khathatinakampi, wali jachʼa usunakampiw utjani sasaw Jesusax satayna (Mateo 24:3-8; Lucas 21:11). Ukaxa phuqasiskapuniwa. Ukanakax yatiyistuwa Diosan Apnaqäwipaxa 1914 maranpuni alaxpachan uttʼasitapa, ukatsti aka ñanqha pachan tukusiñapataki ‘qhipa urunakaxa’ uka maranwa qalltarakïna (2 Timoteo 3:1-5).