ƝƐFƆLI FARANKANW
San 1914: San nafamaba don Bibulu kirayakuma la
SAN caman sani a waati ka se, Bibulu kalandenw y’a fɔ ko san 1914 la, ko nafamaba dɔw bɛna kɛ. O kow bɛna kɛ mun ye? Ko jumɛnw b’a sɛmɛntiya ko san 1914 kɛra san nafamaba ye?
Ka kɛɲɛ ni Luka 21:24 ye, Yesu y’a fɔ ko: “Siya wɛrɛw na Jerusalɛm cɔngɔ u sen kɔrɔ, fo o siyaw ka waati ka dafa,” Jerusalɛm tun ye Yahutuw ka dugu faaba ye, masakɛw sigiyɔrɔ, minnu tun ye Dawuda bɔnnaw ye. (Zaburu 48:1, 2) Nka, o masakɛw ka marakɛcogo ni siyaw ka kuntigiw ka marakɛcogo tun tɛ kelen ye. U tun sigilen bɛ “Jehova ka masasigilan kan” walisa ka kɛ a ka lasigidenw ye. (1 Tilew kibaru 29:23, BS) O la sa, Jerusalɛm tun bɛ Jehova ka kuntigiya de taamasyɛn jira.
Nka, cogo jumɛn na ani waati jumɛn na siyaw y’a daminɛ ka Ala ka kuntigiya “cɔngɔ u sen kɔrɔ,”? O kɛra san 607 ka kɔn Krisita tile ɲɛ, tuma min na Babilonɛkaw ye se sɔrɔ Jerusalɛm kan. “Jehova ka masasigilan” lankolon tora, wa masakɛ minnu tun ye Dawuda buruju ye, olu ka masaya jɔra. (2 Masakɛw 25:1-26) Yala Jerusalɛm tun bɛna “cɔngɔ” fo abada wa? Ayi, bawo Ezekiɛl ka kirayakuma b’a fɔ Jerusalɛm masakɛ laban Sedesiyasi ko la ko: “I ka masafugulan ni i ka jalamugu bɔ i kun na. . . A tɛna kɛ mɔgɔ si ta ye fo dalilu bɛ min bolo sariya sira la, wa tiɲɛ na, ne na a di o tigi ma.” (Ezekiɛl 21:26, 27, NW) “Dalilu bɛ min bolo sariya sira la” ni Dawuda ka masafugulan b’a kunna, o ye Krisita Yesu de ye. (Luka 1:32, 33) O la sa, ni Yesu kɛra Masakɛ ye, ‘cɔngɔli’ bɛna ban.
O ko nafamaba bɛna kɛ tuma jumɛn? Yesu y’a jira ko Siya wɛrɛw bɛna kuntigiya kɛ waati kɔnɔ min latigɛra. Daniɛl tilayɔrɔba 4 maana bɛ kunnafoni fɛsɛfɛsɛlen di, min b’a to an bɛ se ka o waati janya dɔn. A bɛ kuma Babilonɛ masakɛ Nebukadnezar ka sugo de kan n’o bɛ kirayakuma dɔ kofɔ. A b’a jira ko jirisun janmanjan tigɛra ani u y’a gungurun lamini ni nɛgɛ ani nsiranɛgɛ ye walisa a kana falen tun. O kɔfɛ, mɛlɛkɛ dɔ y’a fɔ ko: “Waati wolonwula ka tɛmɛn a kan.”—Anw de ye daɲɛw sɛbɛn k’a jɛgɛn; Daniɛl 4:10-16.
Bibulu kɔnɔ, tuma dɔw la, jirisun daɲɛ bɛ fɔ walisa ka kuntigiya de jira. (Ezekiɛl 17:22-24; 31:2-5) O la sa, jirisun tigɛli taamasyɛn bɛ Ala ka mara jɔli de jira Jerusalɛm masakɛw sababu fɛ. O bɛɛ n’a ta, yelifɛn tun b’a jira fana ko ‘Jerusalɛm bɛna cɔngɔ.’ A waati tun tɛna mɛn, “waati wolonwula” dɔrɔn. O waati janya ye waati joli ye?
Ka kɛɲɛ ni Jirali 12:6, 14 ye, waati saba ni tila bɛ bɛn “don 1 260 ma.” O la sa, “waati wolonwula” bɛ bɛn waati saba ni tila siɲɛ fila ma, n’o bɛ bɛn don 2 520 ma. Nka, don 2 520 Jerusalɛm binnen kɔfɛ, siya wɛrɛ mɔgɔw ma Ala ka kuntigiya ‘cɔngɔli’ dabila. A jɛlen don ko nin kirayakuma bɛ waati caman de kofɔ. N’an y’an sinsin Nɔmburuw 14:34 ani Ezekiɛl 4:6 kan, n’u b’a fɔ ko “tile kelen ye san kelen ye”, “Waati wolonwula” bɛ bɛn san 2 520 ma.
O san 2 520 daminɛna san 607, Ɔkutɔburukalo la ka kɔn Krisita tile ɲɛ, Babilonɛkaw ye se sɔrɔ Jerusalɛm kan tuma min na ani Dawuda bɔnsɔn min tun ye masakɛ ye, k’o bɔ masaya la. O waati banna san 1914 Ɔkutɔburukalo la. ‘Siyaw ka waati dafara’ o waati de la ani Yesu Krisita kɛra Ala ka Masakɛ sigilen ye sankolo la. *—Zaburu 2:1-6; Daniɛl 7:13, 14.
I ko Yesu y’a fɔ cogo min na, a “nali” i ko sankolo Masakɛ, o ko jirala ka jɛya diɲɛ dakabanakow fɛ i n’a fɔ kɛlɛw, kɔngɔw, dugukoloyɛrɛyɛrɛw ani fiɲɛ banaw. (Matiyu 24:3-8; Luka 21:11) O kow b’a sɛmɛntiya kosɛbɛ ko Ala ka sankolo Masaya sigira san 1914 na ani ko nin diɲɛ sigicogo jugu “laban donw” daminɛna fana.—2 Timote 3:1-5.
^ dak. 4 K’a ta san 607 Ɔkutɔburukalo la ka kɔn Krisita tile ɲɛ ka na san 1 la Ɔkutɔburukalo la ka kɔn Krisita tile ɲɛ, o bɛ bɛn san 606 de ma. Ikomi san fu (san 0) tɛ yɛn, k’a ta san 1 la Ɔkutɔburukalo la ka kɔn Krisita tile ɲɛ ka na a bila san 1914 Ɔkutɔburukalo la Krisita tile la, o bɛ bɛn san 1914 de ma. O la sa, n’an ye san 606 ani san 1914 fara ɲɔgɔn kan, a bɛ bɛn san 2 520 ma. Walisa ka kunnafoni wɛrɛw sɔrɔ Jerusalɛm binni kan san 607 ka kɔn Krisita tile ɲɛ, gafe min bɛ wele tubabukan na ko Étude perspicace des Écritures, o barokun min bɛ kuma “ Chronologie ” kan, i ka o lajɛ. A dilanna Jehova Seerew fɛ.
