HNA ahnithe petre kö ekö hnene la itre ka inine la Tusi Hmitrötr, footre lao macatre qëmeken matre traqa pi hë e 1914, laka troa ketre macatre lai ka tru alien, qa ngöne laka, troa traqa ngöne la macatre cili la itre ewekë ka tru. Nemene la itre ewekë cili, nge nemene la ka amamane hnyawa laka, nyipici ame la 1914, tre, ketre macatre ka nyipi ewekë?

Tune la hna cinyihane ngöne la Luka 21:​24, hnei Iesu hna qaja ka hape: “Tro ha waja Ierusalema hnene la nöjei ethen, uti hë e pexejë hë la ite ijine i angete ethen.” Ierusalema la traone ka tru ne la nöje Iudra​—celë hi hna nyi joxu, ene lo itre joxu ka fetra qa ngöne la matrane la  lapa i Davita Joxu. (Salamo 48:​1, 2) Ngo itre joxu lai ka ketrepengöne kö hune la itre joxu ne la itre nöj. Hnei angatr hna lapa hune la “therone i Iehova,” matre angatre hi lai a itre qene qaja i Nyidrë. (1 Aqane Lapa Ite Joxu 29:23) Haawe, Ierusalema hi a nyihatren e celë la musi Iehova.

Hna tune kaa nge eu lo kola nyiqaane “waja hnene la nöjei ethen” la musi Akötresie? Hna nyiqaane ngöne la macatre 607 M.P.K. ngöne lo kola thapa e Ierusalema hnei angetre Babulona. Pë ju hi ka lapan la “therone i Iehova,” nge ketre hna pë mina fe hi e cili lo xötre joxu ka uti xötrë qaathene la itre matra i Davita. (2 Ite Joxu 25:​1-​26) Tro ha paatre palua la ewekë cili, ene la kola ‘waja’ la musi Akötresie? Ohea, ke hna qaja hnene la hna perofetan hnei Ezekiela göi Zedekia, joxu tixenuë ne la hna nyi joxu e Ierusalema, ka hape: “Xome jë la itrapet, xomejë fe la korona ; . . . tha ejë hë lai uti hë traqa ha nyidëti ate troa amekötin, nge tro ni a hamëne kow.” (Ezekiela 21:​26, 27) Ame la sipu atre troa “amekötin” hune la therone i Davita, tre, Iesu Keriso. (Luka 1:​32, 33) Haawe, matre kola troa nyipun troa ‘waja’ la musi Akötresie, ngöne la kola Joxu hnei Iesu.

 Eu la kola traqa la ewekë ka tru cili? Hnei Iesu hna amamane ka hape, tro la itre ethen a musi ngöne la ketre hnepe ijin. Kola mama ngöne Daniela mekene 4 la aqane troa e la eqean lai hnepe ijine cili. Kola mama lai jëne la ketre pu hna meköle goeën hnei Nebukaneza Joxu ne Babulona. Hnei nyidrë hna öhne la ketre isinöe ka tru hna sa trij. Hna othe hnene la otrene fao me kopa la tidrön ne la isinöe, matre thaa tro kö eje a xöle hmaca. Hna qaja hnene la ketre angela ka hape, troa nue “uti hë ase hë la sevene lao ijine i nyën.”​—Daniela 4:​10-​16, MN.

Hnene la Tusi Hmitrötr hna xome e itre xaa ijin la itre isinöe, matre nyine nyihatren la mus. (Ezekiela 17:​22-​24; 31:​2-5) Haawe, ame la kola thupa lai sinöe, tre, kolo hi a nyihatren la aqane apën la musi Akötresie lo hna cilëne hnene la itre joxu ka lapa hune la therone i Nyidrë e Ierusalema. Ngo hna amamane hnene lai ewekë hna meköle goeën, ka hape, ame la kola ‘waja huji Ierusalema’ tre, thaa kolo kö a troa waja huje paluan, ketre hnepe ijine hi, ‘sevene lao ijine’ la etrun. Nemene la eqean lai hneijine cili?

Ame ngöne Hna Amamane 12:​6, 14, kola qaja ka hape, ame la köni ijin nge caa sin, tre, kösë “ca thauzane nge lue hadede nge köniate [sikisitre].” Matre ame lai ‘sevene lao ijine’ tre, kösë kola alua e lai köni ijine nge sin, matre ame la etrune asë, tre, 2 520 lao drai. Ngo thaa hna hmaca kö hnene la itre nöje ne la itre Ethen troa ‘waja’ la musi Akötresie, ngo ngöne hi la 2 520 lao drai thupene la hna kei hnei Ierusalema. Haawe, e tro sa wang, tre, thaa ihmeku kö la itre drai celë memine lo hnepe ijine hna perofetan. Celë matre, loi e troa tuluthe la hnepe ijine cili thenge la hna qaja ngöne Numera 14:34 me Ezekiela 4:​6, ame la “ca drai cei tune me ca macate,” matre, kösë ame la ‘sevene lao ijine’ tre 2 520 lao macatre.

Hna nyiqaane lai 2 520 lao macatre ngöne lo Okotropa 607 M.P.K. ngöne lo kola lepe e Ierusalema hnei angetre Babulona, nge hna thapa la joxu qa ngöne therone i Davita. Hna nyipune lai ijine cili ngone lo treu Okotropa 1914. Ame ngöne la ijine cili, kola nyipune la “ite ijine i angete ethen,” nge hna acili Iesu Keriso, matre Joxu i Akötresie e koho hnengödrai. *​—Salamo 2:​1-6; Daniela 7:​13, 14.

 Tune la hna ahnithe hë hnei Iesu, ame la “hlepëti” i nyidrë ceitun me Joxu e hnengödrai, tre, hna nyihatren hnene la itre ewekë ka ngazo ka traqa e celë fen, tune la itre isi, me jiin, me itre sa, me itre mec. (Mataio 24:​3-8; Luka 21:11) Itre ewekë atraqatr ka anyipicine hnyawa laka, ame la macatre 1914, tre, celë hi lo macatre ne acil lo Baselaia i Akötresie e koho hnengödrai, nge kolo fe a nyiqaane melën la “ite drai hnapin” ne la fene ka ngazo celë.​—2 Timoteo 3:​1-5.