I NANON te maan ae kaania abwi te ririki imwain 1914, ao a tataekinna taan reirei n te Baibara bwa iai baika namataki aika a na riki n te ririki anne. Baikara baikai, ao bwaai ni kakoaua aika kotokotea 1914 bwa te ririki ae kakawaki?

E taku Iesu n Ruka 21:24: “E na toutouaki Ierutarem irouia botannaomata aika tiaki I-Iutaia ni karokoa kakororaoan aia tai botannaomata ae baireaki.” Ierutarem boni kautun abaia I-Iutaia, are te tabo are e a waaki mai iai, aia tautaeka ueea ake kanoan te Uea are  Tawita. (Taian Areru 48:1, 2) Ma a okoro ueea aikai ma taan tautaeka n te aonnaba, ibukina bwa a tekateka i aon “ana kaintokanuea Iehova” n tei ibukina. (1 Rongorongo 29:23) Mangaia are e tei Ierutarem ibukin ana tautaeka Iehova.

N te aro raa ae e ‘toutouaki iai ana tautaeka te Atua irouia botannaomata,’ ao man ningai? E riki aei n 607 B.C.E. ngke e a tauaki Ierutarem irouia kaaini Baburon. Ai akea ngkanne te uea n “ana kaintokanuea Iehova,” ao e a aki manga reitinako karekeaia ueea ake kanoan Tawita. (2 Uea 25:1-26) E na teimatoa n aki toki ‘touakin Ierutarem’ n aron aei? E na aki, bwa e taku ana taetae ni burabeti Etekiera ni kaineti ma te kabanea n uea i Ierutarem are Tetekia: “Kanakoa te bwara ae te kunnikai ao buuta te baunuea. . . . Akea temanna ae e na bwaina te mwaaka n tautaeka aei, ni karokoa rokon teuare bon iai riaina ni bwainna, ao N na anganna.” (Etekiera 21:26, 27) Teuare “iai riaina ni bwainna” irouia ueea ake kanoan Tawita bon Kristo Iesu. (Ruka 1:32, 33) Mangaia are e na toki ‘touakin Ierutarem’ ngkana e a riki Iesu bwa te Uea.

 E na roko n ningai te tai ane kakawaki anne? E kaotia Iesu bwa e na toki aia tautaeka Tientaire ngkana e koro te tai ae baireaki. E ataaki aroni warebwaiana bwa maanra te tai anne, n ana rongorongo Taniera mwakorona 4. E karakinaki iai te mii ni burabeti ae miin Ueani Baburon are Nebukaneta. E nora iai te aroka teuana ae moan te totoakaei are e tataaki ni kabwakaaki. E a aki kona ni manga rikirake boton te kai aei bwa a kabaeaki botona n te biti ma te buraati. E taku te anera: “Ke e tiku n arona anne i nanon taai aika itiua.”—Taniera 4:10-16.

Aroka ke kaai n tabetai n te Baibara, a tei ibukin te kairiri. (Etekiera 17:22-24; 31:2-5) Mangaia are tataakin te kai ni kabwakaaki n te kabotau aei, e tei ibukini katokan ana tautaeka te Atua rinanoia ueea ake i Ierutarem. Mangaia are e taekinaki n te miitara aei bwa e na aki teimatoa ‘toutouakin Ierutarem,’ bwa tii i nanon te maan ae “itiua te tai.” Maanra te tai anne?

E kateretereaki n Te Kaotioti 12:6, 14 bwa tenua ao te iterana te tai, titeboo ma “1,260 te bong.” E na taboro ngkanne ngkana ai “taai aika itiua” ke 2,520 te bong. Ma e aki toki ‘toutouakin’ ana tautaeka te Atua irouia Tientaire ngke e a koro raoi 2,520 te bong imwini bwakan Ierutarem. E teretere ngkanne bwa e nanonaki te tai ae maan riki n te taetae ni burabeti aei. Ni kaineti ma Warekaia Iteraera 14:34 ao Etekiera 4:6, ake a taekinna bwa “tebongina ibukin teuana te ririki,” nanona bwa “taai aika itiua” bon ririki aika 2,520.

E moanaki warebwaian ririki aika 2,520 n Okitobwa 607 B.C.E. ngke e kabwakaaki Ierutarem irouia kaaini Baburon, ao e kabwakaaki naba iai te uea are kanoan Tawita. E toki te tai anne n Okitobwa 1914. N te tai anne, e a toki “aia tai natannaomata ae baireaki” ao e a kaueaaki Iesu Kristo iroun te Atua bwa te Uea i karawa. *—Taian Areru 2:1-6; Taniera 7:13, 14.

N aron are e a kaman taekinna Iesu, e na kanikinaeaki ‘okina ma n tiku’ bwa te Uea i karawa, ni baika kakuba ma ni kakaiaki aroia aika a na riki n te aonnaba. Baikai bon taiani buaka, roongo, mwaeiei, ao ai aoraki aika kamamate. (Mataio 24:3-8; Ruka 21:11) A boni kakoauaaki raoi ni baikai bwa e bon tei Ana Tautaeka n Uea te Atua i karawa n te ririki 1914, ao a a moanaki naba iai “kabaneani boong” ibukin te waaki ae buakaka ae ngkai.—2 Timoteo 3:1-5.