BIBLE-ACHER obheas korpi (atam tankam Jehovache Sakxi mhunn vollkhotat) sumar 40 vorsam adinch, 1914 hea vorsa mhotvacheo ghoddnneo ghoddttoleo mhunn porgott kortale. Hea vorsa kosleo ghoddnneo zauncheo asleo? Ani tem ek mhotvachem voros mhunn amkam koxem kolltta?

Lukas 21:24-ant, Jezu mhunntta, “Videxiancho kall bhoro-sor . . . videxi Jerusaleak paiam tolla mostitole.” Jeruzalem hem Judev raxttrachem ek mukhel xar aslem ani tantunt Davidachea kullantle raza razvott choloitale. (Stotr 48:1, 2) He raza sonvsaracher aslolea dusrea razam poros veglle asle. Te ‘Sorvesporachea xinvasonar’ boson, tache pasot raj choloitale. (Jeremias 3:17) Ani takach lagon, Jeruzalem xar Jehovachea razvottkechem xinvason koxem aslem.

 “Videxi Jerusaleak paiam tolla mostitole” him utram kednam ani koxim ghoddon ailim? Kristi Xoka adim, 607 vorsak, Jeruzalemacher Babilon raxttran zoit vhelem tednam him utram ghoddon ailim. “Sorvesporachem xinvason” khali zalem, ani tednam thaun Davidachea kullantlean konnuch raza zaun tacher bosonk na. (2 Raza 25:1-26) Hem ‘mostivop’ sodankal chalu urtolem kai? Na. Karonn ainz Gabrielan, Marie lagim uloitana Jezu vixim oxem mhunnttlam, “Davidachem xinvason Sorvespor Dev taka ditolo.” (Lukas 1:32, 33) Tor Jezu raza zalea uprant hem ‘mostivop’ somptolem.

Jezu kednam raza zalo? Videxiancho kall kabar zatolo mhunn Jezun sanglolem. To kall kitlo lamb astolo tachi somzonni amkam Danielachea pustokant, odheai 4-ant melltta. Ho odheai amkam Babilonacho raza, Nebukadnezzarak poddlolea sopna vixim sangta. Tea sopnant tannem ek vhodd rukh katrun uddoilolo, to polloilo. To rukh porot vaddona zaunk, tachem mull lokhonddachea ani pitullichea pott’ttean “sat vorsam” porian bandun dovorlolem.—Daniel 4:10-13.

Bible-ant thodde pavtt, munxancheo razvottkeo rukhank sor keleat. (Ezekiel 17:22-24; 31:2-5) Tor ho rukh Jehovachi razvottki dakhoita, zantunt Jeruzalemantle raza raj choloitole. Tea rukhachem katrop, Devachi razvottki modench thambtoli mhunn dakhoita. Punn tea sopnant dakhoilolea pormonnem, Jeruzalemachem ‘mostivop’ thoddoch kall, mhunnttlear “sat vorsam” porian chalu urtolem. Him “sat vorsam”, aichea pormonnem meztat toso sat vorsancho kall nhoi. Toxem zalear, ho kall kitlo lamb astolo?

Prokasovnni 12:6, 14-ant, sadde-tin vorsam mhunnttlear “baraixim satth dis” (1,260) mhunn dakhoilam. Hacho orth, “sat vorsam” mhunnttlear 2,520 dis. Punn Jeruzalemacho nas zalea uprant, 2,520 disamnim tachem ‘mostivop’ bond zaunk na. Hea pasot, ho kall khub lamb asa mhunn kolltta. Lokgonnti 14:34 ani Ezekiel 4:6 sangta, “ek dis ek voros koxem.” Haka lagon, him “sat vorsam” mhunnttlear 2,520 vorsam.

 Him 2,520 vorsam, Otumbrachea mhoineant 607 vorsak Kristi Xoka adim * suru zalim. Tea vellar, Babilon raxttran Jeruzalemacher zoit vhelem ani Davidachea kullantlea razak xinvasona velo kaddlo. Ho 2,520 vorsancho kall, 1914 hea vorsa Otumbrachea mhoineant somplo. Tednam “Videxeancho kall” kabar zalo ani Jezu Krist sorgar Raza zalo. *—Stotr 2:1-6; Daniel 7:13, 14.

 Jezun aplea ‘ienneachea’ vellar, zhuzam zatolim, bhuk poddttoli, bhuimkamp zatole ani voxeachi pidda posortoli mhunn sanglolem. Ani to sorgar raza zalo tednam thaun, oxench ghoddot asa. (Matev 24:3-8; Lukas 21:11) Heo sogleo ghoddnneo, Devachem Raj, 1914 hea vorsa sorgar suru zalem mhunn khatri ditat. Toxench heo ghoddnneo, atanchea vaitt sonvsarache “nimanne dis” suru zale mhunn dakhoun ditat.—2 Timotak 3:1-5.