EESHII wanee ekirajaalii sünain tü Wiwüliakat aküjüshii pütchi soʼu wainma juya süchiki wanee kasa anasü maʼin alatajatü soʼu 1914. ¿Kasa wayuu tia? ¿Kasa eeʼiyataka anain maʼin tü juyakat 1914?

 Müshi Jesuu suluʼu Lucas 21:24: ‹Oʼtteena na gentilekana sünain laülaain saaʼu Jerusalén. Ooʼulaajeena naya suulia aluwatawaa sümaʼinruʼu ayatüin tü kaʼi aapünakat namüin nutuma Maleiwa süpüla aluwatawaa›. Aluwataashii nuuʼuliwoʼu David Jerusalén, tü shikiikat Judea (Salmo 48:1, 2). Wayuukana naainnua naata noulia na shikiipuʼukana mma süka ‹naikkalaapuʼuin saaʼu tü einaseekat eere nuluwataain Jeʼwaa› süka nüneekalain naya (1 Crónicas 29:23). Müsia shia, Jerusalén shiyaakuayaasü nuluwataaya Jeʼwaa.

¿Joujana oʼttüin na gentiilekana sünain mojutüin namüin nuluwataaya Maleiwa? ¿Jamüsü sukuwaʼipa natuma? Oʼttüsü tia soʼu tü juyakat 607 sü.w. wanaa sümaa naʼajüin Jerusalén na chejeʼewaliikana Babilonia. Nnojotsü jaralüin «aikkalaain saaʼu tü einaseekat eere nuluwataain Jeʼwaa» otta nnojoluinnapa  aluwataain na nuuʼuliwoʼukana David (2 Reyes 25:1-26, TNM). ¿‹Laülaainjanakaʼa na gentiilekana› waneepia saaʼu Jerusalén? Nnojo, müshi chi aapieekai Gabriel sümüin María: ‹Aneekuushi chi joʼuukai nutuma Maleiwa süpüla nuluwataainjatüin tü wayuu judíokalüirua, tü nuuʼuliwoʼukalüirua Jacob› (Lucas 1:32, 33). Chi ‹aluwataainjachikai› nia Jesuu. Nuluwataapa, ooʼulaainjana suulia ‹laülawaa saaʼu Jerusalén na gentiilekana›.

¿Joujatü alatüin tia? Naashin Jesuu na gentiilekana (na nnojoliikana judíoin) nnojoluinjana naya aluwataain waneepia. Suluʼu tü karalouktakat Daniel kapiitulo 4 süküjüin jeʼrain sükalia tia. Aküjünüsü yala nüʼlapüjaain Nabucodonosor sümaa wanee wunuʼulia miyoʼu maʼin ashottünüsü. Shia neʼe apütaaka tü shikiikat, kapüsü shia süka kachuweera otta cobre süpüla nnojoluin miyoʼuin shia süchikuaʼa. Süchikijee tia müshi wanee aapiee: «Alatüinjatü akaratshi kaʼi naaʼu» (Daniel 4:10-16, TNM).

Saashin tü Wiwüliakat tü wunuʼuliakat shiyaakuayaasü aluwataaya (Ezequiel 17:22-24; 31:2-5). Süshottünakaʼa, shia süka nooʼuleʼennüinjanain suulia aluwatawaa na wayuu niʼitaakana Jeʼwaa Jerusalén. Akatsaʼa süküjüin tü Wiwüliakat, laülaainjanain na nnojoliikana judíoin saaʼu Jerusalén soʼu «akaratshi kaʼi». ¿Jeʼra maʼin tia?

Tü apünüinkat juya shiatapünaamüin saashin Alateetkat Mapeena 12:6, 14 shia «1.260 kaʼi». Sutuma tia, tü «akaratshikat kaʼi» shia 2.520 kaʼi, piantua shiyaawajünüin 1.260 kaʼi. 2.520 kaʼi süchikijee saʼajünüin Jerusalén nnojoluinnapa aluwataain na gentiilekana. Kakaliainjatü tia pütchikat süpüla shikeraajüin. Waashajeʼerüle Números 14:34 otta Ezequiel 4:6, süküjeerü wamüin shiain «wanee juya tü waneekat kaʼi». Wayaawajüle tü «akaratshikat kaʼi» süka tü sümakat tü Wiwüliakat, eesü maʼaka 2.520 juya.

Oʼttüsü oʼutuupüroʼu soʼu tü juyakat 607 sü.w. tü 2.520 juya, wanaa sümaa nashutüin saaʼu Jerusalén na chejeʼewaliikana Babilonia otta nooʼuleʼerüin suulia aluwatawaa wanee nuuʼuliwoʼu David. Ajaʼttüsü shia oʼutuupüroʼu soʼu tü juyakat 1914. Ajaʼlajaasü ‹nakalia na gentiilekana› otta niʼitaaka  Maleiwa Jesukürisüto sünain Aluwatawaa sirumatuʼu (Salmo 2:1-6; Mateo 28:18) *.

Naashin Jesuu soʼutpünaa ‹nükalia› sünain Aluwatawaa sirumatuʼu eeinjatü atkawaa, ayuulii, jamü otta akutkujaainjatü mma (Mateo 24:3-8; Lucas 21:11). Müsia shia. Tia shiiʼiyatüin nuluwataain Jesukürisüto sirumatuʼu soʼujee tü juyakat 1914 otta ‹alüʼütsü sükalia sajaʼttajatüin tü kasa mojusükat› (2 Timoteo 3:1-5).