KAHIRAKAHIRA lagani 40 idia hanaia murinai, Bible Student taudia idia gwau lagani 1914 ai gau badadia haida do idia vara.  Dahaka gau badadia idia vara, bona dahaka ese ia hahedinaraia lagani 1914 be mai anina bada laganina?

Luka 21:24 ai, Iesu ia gwau: “Idau bese taudia ese aena dekenai Ierusalema do idia moia tao, ia lao bona unai idau bese edia nega do ia ore.” Guna, Iuda taudia edia hanua badana, Ierusalema, be King Davida ena bese amo idia mai king taudia ese idia lohiaia. (Salamo 48:​1, 2) To, unai lohia taudia be bese ma haida edia hakaua taudia amo idia idau. Idia be Dirava ena gwaukau taudia bamona, “Lohiabada ena terona” latanai idia helai. (1 Sivarai 29:23) Unai dainai, Ierusalema be Iehova ena lohia siahuna ia laulaulaia.

Idau bese taudia ese edena bamona bona edena negai Dirava ena lohia siahuna idia moia tao matamaia? Lagani 607 B.C.E. ai, Ierusalema be Babulonia taudia ese idia halusia neganai, unai ia vara. “Lohiabada ena terona” dekenai ta ia helai lou lasi bona Davida ena bese amo idia mai king taudia edia lohia karana ia  doko. (2 King Taudia 25:​1-26) Dirava ena lohia siahuna be do idia “moia tao” ela bona hanaihanai, a? Lasi, badina Esekiela ese ena peroveta herevana ai Ierusalema ena king dokona, Sedekaia ia herevalaia neganai, ia gwau: “Oiemu kwarana kumia dabua do oi ruhaia, bona oiemu korona do oi kokia. . . . Ela bona iena Biaguna korikori be do ia mai, unai neganai ia dekenai do lau henia.” (Esekiela 21:​26, 27) Davida ena king dagina do ia abia “Biaguna korikori” be Keriso Iesu. (Luka 1:​32, 33) Unai dainai, Iesu be King ai ia lao neganai, Iehova ena lohia siahuna “moia tao” karana do ia ore.

Unai kara badana be edena negai ia vara? Iesu ese ia hahedinaraia Idau Bese taudia be nega kwadogina sibona lalonai do idia lohia. Daniela karoa 4 lalonai ia noho sivaraina ese ita do ia durua unai nega ena lata ita diba totona. Unai karoa ese Babulonia ena King Nebukanesa ena nihi ia herevalaia. Iena nihi dekenai ia itaia ta ese au badana ta ia utua. Unai au ena badina ia tubu diba lasi, badina auri bona kopa amo idia koua. Aneru ta ia gwau: “Unai bamona do ia noho ela bona lagani 7 idia ore.”​—Daniela 4:​10-16.

Baibel dekenai, nega haida au ese lohia siahuna ia laulaulaia. (Esekiela 17:​22-24; 31:​2-5) Unai dainai nihi dekenai au idia utua karana ese ia hahedinaraia Iehova ena terona ai idia lohia taudia, Ierusalema ena king taudia unai, edia lohia negana do ia doko. To, unai nihi ese ia hahedinaraia Ierusalema be nega daudau lalonai do idia “moia tao” lasi​—“lagani 7” sibona lalonai. Unai be lagani korikoridia lasi, to peroveta dalanai idia gwauraia laganidia. Unai lagani ena lata be edena bamona?

Apokalupo 12:​6, 14 ese ia hahedinaraia lagani toi mai kahana ta edia lata be “dina 1260.” Unai dainai “lagani 7” ena lata ita diba totona, dina 1,260 be nega rua ita haboua neganai, dina 2,520 ita abia. To Ierusalema ia moru murinai, Idau Bese taudia ese Dirava ena lohia siahuna be dina 2,520 lalonai sibona idia “moia tao” lasi. Unai dainai unai peroveta herevana be nega daudau lalonai do ia vara karana ia herevalaia. Numera 14:34 bona Esekiela 4:6 ese “dina 40 . . . be lagani 40“ ia gwauraia, unai dainai peroveta dalanai idia gwauraia “lagani 7“ (eiava dina 2,520) be lagani 2,520.

 Unai lagani 2,520 be October 607 B.C.E. ai ia matamaia, badina unai negai Babulonia taudia ese Ierusalema idia halusia bona Davida ena bese edia lohia dagina be ena terona amo idia kokia. Unai nega be October 1914 ai ia doko. Unai nega dekenai, “idau bese edia nega” ia ore, bona Iesu Keriso be King dagina ia abia. *​—Salamo 2:​1-6; Daniela 7:​13, 14.

Iesu ese ia perovetalaia bamona, ia be guba Pavapavana bamona do ia “giroa mai” neganai, tanobada dekenai gau badadia​—tuari, tano mareremarere, daihanai gorere​—do idia vara. (Mataio 24:​3-8; Luka 21:11) Unai gaudia ese idia hahedinaraia goevagoeva Dirava ena guba Basileiana be lagani 1914 ai ia lohia matamaia bona unai nega ai inai tanobada dikana “ena dokona” ia matamaia.​—2 Timoteo 3:​1-5.