ARU nga dekada nige na 1914, dati ngana nga nelammuyag na estudiante ira na Biblia nga egga ira importante nga mesimmu tatun nga dagun. Anni ira yatun, anna anni ira i mamakurug nga talaga importante nga dagun i 1914?

Nerekord ta Lucas 21:24 [NW ] i kinagi ni Jesus: “Ibatabatay noka na nasa-nasion i Jerusalem adde ta ketuppal na natunno nga tiempo na nasa-nasion [“tiempo na Hentil ira,” King James Version].” I Jerusalem i kabisera nga siudad na nasion na Juda—i sentro na pammaguray na patul ira nga naggafu ta gaka ni  Patul David. (Salmo 48:1, 2) Ngem nerumuruma yaw ira nga patul ta lider ira na karuan nga nasion. Nagitubang ira ta “trono ni Jehova” bilang representante mismu na Dios. (1 Cronicas 29:23) Simbolo gafu na pammaguray ni Jehova i Jerusalem.

Kunnasi anna kanni gafu nga namegafu nga ‘nebatabatay na nasa-nasion’ i pammaguray ni Jehova? Nesimmu yaw turi ta naffù na Babilonia i Jerusalem turi 607 B.C.E. Nabakante i “trono ni Jehova,” anna nagattà i linia na patul ira nga naggafu ta gaka-gaka ni David. (2 Patul ira 25:1-26) Mannanayun kari yaw nga ‘kebatabatay’? Ari, megafu ta nakagi ta profesiya ni Ezekiel meyannung ta ultimo nga patul na Jerusalem nga si Zedekias: “Ariammu i turbante, anna laffutammu i korona. . . . Awan tu makakkukua tatun adde sonu duttal i tadday nga egga legal nga kepangngattanna, tapus iyawa ku yatun sa.” (Ezekiel 21:26, 27) Si Jesu-Cristo i “egga legal nga kepangngattanna” ta Davidiko nga korona. (Lucas 1:32, 33) Yari tu mangultimo i ‘kebatabatay’ sonu mammaguray ngana si Jesus bilang Patul.

 Sonu anni i kesimmuna yatun? Nepasingan ni Jesus nga mammaguray i Hentil ira ta unag na natunno laman nga tiempo. I rekord na Daniel kapitulo 4 i makoffun tape mammuattam nu kunnasi kabayag na yatun nga tiempo. Meyannung yatun ta neprofesiya nga tatageno ni Nabucodonosor nga patul na Babilonia. Nasinganna i daka-dakal nga kayu nga natukag. Ari nga makatarengi i funna megafu ta nabalabbaggan tu balayang anna bronse. Kinagi na anghel: “Mapappasa labbi i pitu nga tiempo.”—Daniel 4:10-16.

Ta Biblia, meyusa nu karuan i kayu nga mangisimbolo ta pammaguray. (Ezekiel 17:22-24; 31:2-5) Yatutta, isimbolo na nekagappo na simboliko nga kayu i pangultimo na pammaguray na Dios, nga irepresenta na patul ira ta Jerusalem. Maski nu kunnatun, nepasingan na sirmata nga temporario laman i ‘kebatabatay na Jerusalem’​—ta unag laman na “pitu nga tiempo.” Kunnasi kapadduna yatun nga tiempo?

Kagian na Nepakannammu 12:6, 14 nga i tallu-anna-gaddua nga tiempo, katumbas na i ‘1,260 aggaw.’ Nu madoble yatun nga agga-aggaw, katumbas na i pitu nga tiempo onu 2,520 aggaw. Ngem 2,520 aggaw kabalin na nekaffù na Jerusalem, ari gamma nga nagimmang i Hentil ira nga nasion nga ‘nangibatabatay’ ta pammaguray na Dios. Kebalinanna gafu nga mas apaddu nga tiempo i tukuyan na profesiya. Nakagi ta Numeros 14:34 anna Ezekiel 4:6 nga “tadday aggaw para ta tangaragun.” I 2,520 nga aggaw gafu, onu “pitu nga tiempo,” ay 2,520 dagun.

Namegafu i 2,520 dagun turi Oktubre 607 B.C.E., turi ta naffù na Babilonia i Jerusalem tapus nari ta trono i patul nga naggafu ta gaka-gaka ni David. Nangultimo i periodo turi Oktubre 1914. Nangultimo i “natunno nga tiempo na nasa-nasion,” tatun nga tiempo, tapus nammaguray si Jesu-Cristo bilang Patul ta nelangitan nga Pappatulan na Dios. *​—Salmo 2:1-6; Daniel 7:13, 14.

 Kagitta na neprofesiya ni Jesus, masingan i “keggana” bilang nelangitan nga Patul gukaban na kritikal ira nga mesissimmu​—gerra, bisin, lunu-lunig, epidemia. (Mateo 24:3-8; Lucas 21:11) Yatun ira nga mesissimmu i manawag nga ebidensia nga turi ta 1914, nammaguray ngana i nelangitan nga Pappatulan na Dios anna namegafu ngana gapa i “pangultimuan nga aggaw” na maddaggun nga marakay nga sistema na gannagannug.​—2 Timoteo 3:1-5.