AṬAS n iseggasen uqbel 1914, Inelmaden n Wedlis Iqedsen bdan ţberriḥen belli deg useggas-​agi n 1914 a d-​ḍrunt tedyanin (timsal) ţ-​ţimeqranin. D acu-​tent tedyanin-​agi? Acu n leḥwayeǧ i geḍran i d-​iţbeyyinen belli 1914 d aseggas yesɛan azal?

 Ɛlaḥsab n Luqa 21:24, Ɛisa yenna-​d: “Yarucalim, a ţ-​rekḍen leǧnas, alamma yekfa lweqt n leǧnas.” Yarucalim ţ-​ţamdint n tmurt n Iyahudiyen, ideg i llan zedɣen igelliden i d-​yekkan si tarwa n Dawed. (Ahellil 48:2, 3) Acu kan, igelliden-​agi mxallafen ɣef wid n leǧnas nniḍen. Ţ-​ţideţ, llan ţɣaman ɣef “ukwersi n leḥkwem n [Yahwa]”, yeɛni ţmettilen-​d leḥkem n Ṛebbi s timmad-​is. (1 Amezruy 29:23) Ihi, Yarucalim tella teţmettil-​ed leḥkem n Yahwa.

Meɛna, amek yerna melmi i bdan ‘leǧnas rekkḍen’ leḥkem n Ṛebbi? Ayagi yeḍra-​d deg useggas n 607 uqbel Ɛisa, asmi i d-​kkren wat Babil steɛmṛen Yarucalim. ‘Akersi n leḥkem n Yahwa’ yeqqim d ilem (lfareɣ), yerna yeţwakkes leḥkem n igelliden i d-​yekkan si Dawed. (2 Igelliden 25:1-26) Eɛni Yarucalim aţ-​ţeţwarkeḍ i lebda? Ala, axaṭer nnbi Ḥizqiyal icar-​ed ɣef Ṣidqiya, i gellan d agellid aneggaru di temdint-​agi,  yenna-​d: “Kkes aɛmam, ḍegger akkin taɛeṣṣabt [...] alamma yusa-​d win ara yesɛun lḥeqq ad iḥaseb, yerna d nekk ara s-​t-​ifken.” (Ḥizqiyal 21:31, 32) Win ‘yesɛan lḥeqq’ ad yekseb taɛeṣṣabt n ugellid Dawed, d Ɛisa Lmasiḥ. (Luqa 1:32, 33) Ihi, Yarucalim ad ikfu fell-​as werkaḍ-​nni i “ţ-​rekḍen leǧnas” asm’ara yuɣal Ɛisa d Agellid.

Melmi ara d-​teḍru tedyant-​agi tameqrant? Ɛisa issenɛet-​ed belli leǧnas ad ḥekmen deg yiwet lmudda i sen-​d- iţwaḥudden. Yella di Danyil ixef wis 4 wayen ara ɣ-​iɛiwnen a nẓer acḥal ara tdum lmudda-​yagi. Ixef-​agi iḥekku-​d targit, yellan d licaṛa, i yurga Nabuxadnuẓur agellid n Babil. Yurga sseɣlin yiwet n ttejṛa ţ-​ţaɛlayant annect-​ila-​ţ yerna cudden lǧedra-​s s wuzzal d nnḥas iwakken ur teţɛawad ara a d-​temɣi. Sakin, yiwen n lmelk yeţberriḥ ɣef wayen yeɛnan ttejṛa-​nni, yeqqar: “Sebɛa n lewqat ara iɛeddin fell-​as.”—Danyil 4:7-13.

Deg Wedlis Iqedsen, ttjuṛ ţmettilent-​ed tikwal leḥkem. (Ḥizqiyal 17:22-24; 31:2-5) Ihi, Aţţan lmeɛna n ttejṛa-​yagi i geɣlin: leḥkem n Ṛebbi, i d-​ţmettilen igelliden n Yarucalim, yeḥbes. Acu kan, licaṛa-​nni teqqar-​ed belli ‘Yarucalim aţ-​ţeţwarkeḍ’ kra n lweqt, yeɛni “sebɛa n lewqat”. Acḥal ara tekk lmudda-​yagi?

Ɛlaḥsab n Uweḥḥi 12:6, 14, tlata n lewqat d wezgen deg-​sen “alef umitin useţţin n wussan.” Ihi, “sebɛa n lewqat” ad kken snat n tikkal akteṛ, yeɛni 2 520 wussan. Lameɛna, leǧnas ur ḥbisen ara arkaḍ n leḥkem n Ṛebbi mi ɛeddan 2 520 wussan segmi teɣli Yarucalim. Ɣef wakken i d-​iban, licaṛa-​yagi theddeṛ-​ed ɣef lmudda meqqren akteṛ. Ma nmeyyez ɣef Uneẓruf 14:34, ideg yura “mkul ass s useggwas”, akk-​d Ḥizqiyal 4:6 i d-​ihedṛen ɣef “yiwen n wass i mkul aseggwas”, a d-​nefhem belli imeslayen-​agi “sebɛa n lewqat” ad kken 2 520 n iseggasen.

Lmudda-​yagi n 2 520 n iseggasen tebda di tubeṛ 607 uqbel Ɛisa, asmi i teɣli Yarucalim ger ifassen n Babil yerna yeţwakkes leḥkem i ugellid-​is i d-​yekkan si tarwa n Dawed. Lmudda-​yagi tekfa di tubeṛ 1914. Imiren i fukken “lewqat n  leǧnas.” Imiren daɣen, Yahwa yesbedd Ɛisa Lmasiḥ d Agellid deg igenwan. *—Ahellil 2:1-6; Danyil 7:13, 14.

Ɛisa icar-​ed belli a d-​ḍrunt tedyanin timeqranin di ddunit: lgirrat, laẓ, zzelzlat akk-​d ţţerkat (lehlakat imeqranen). Tidyanin-​agi ad ilint d limaṛa ara d-​ibeggnen lweqt ideg ara yuɣal Ɛisa d agellid deg igenni. D ayen i geḍran swaswa. (Matta 24:3-8; Luqa 21:11) Tidyanin-​a ţbegginent-​ed ɛinani belli Tagelda n Ṛebbi tebda leḥkem deg igenni, yerna ‘ussan ineggura’ n ddunit-​agi tamcumt bdan deg useggas 1914.—2 Timutawus 3:1-5.