MƆ TIN DƐN FƆ NO
Di Ia 1914—Na Impɔtant Ia we di Baybul Bin Dɔn Tɔk Bɔt
FƆ LƐK fɔti ia so bifo 1914, pipul dɛn we bin de stɔdi di Baybul bin tɔk se impɔtant tin dɛn go apin insay da ia de. Wetin na dɛn impɔtant tin ya ɛn wetin sho se 1914 na impɔtant ia?
Insay Lyuk 21:24, Jizɔs tɔk se: “Dɛn pipul we nɔ sabi Gɔd, go pwɛl Jerusɛlɛm ɔltogɛda, te dɛn kɔmɔt na pawa.” Jerusɛlɛm na bin di kapital siti fɔ di Ju pipul dɛn. Dat min se na de ɔl di kiŋ dɛn bin de we dɛn de rul. Di kiŋ dɛn na bin Kiŋ Devid in fambul dɛn. (Sam 48:1, 2) We yu kɔmpia dɛn kiŋ ya to di kiŋ dɛn we bin de rul ɔda kɔntri dɛn, dɛn wan ya bin difrɛn. I bin tan lɛk dɛn sidɔm na “Jiova in chia” de rul, bikɔs na dɛn Jiova bin de yuz fɔ rul in pipul dɛn. (1 Krɔnikuls 29:23, NW) So di kiŋ dɛn we bin de rul na Jerusɛlɛm bin de rul fɔ Jiova.
Aw dɛn pipul we nɔ sabi Gɔd, go bigin pwɛl di rul we Gɔd bin de rul? Ustɛm dɛn go du dat? Dis bin apin insay di ia 607 bifo dɛn bɔn Jizɔs. Na da ia de di pipul dɛn na Babilɔn bin kam pwɛl Jerusɛlɛm. We dis apin, nɔbɔdi nɔ bin sidɔm na Jiova in chia fɔ rul. So fɔ sɔm tɛm, di kiŋ dɛn we na Devid in fambul dɛn bin stɔp fɔ rul. (Sɛkɛn Kiŋ 25:1-26) Yu tink se na so Jerusɛlɛm go de sote go? Nɔ, bikɔs Pɔl tɔk wetin Ayzaya bin dɔn se: “Wan pɔsin we go kɔmɔt na Jɛsi in fambul layn, go kam; Gɔd go mek i rul dɛn pipul we nɔto Ju.” (Lɛta Fɔ Rom 15:12) Di man we dɛn tin ya go apin to, na Jizɔs Krays. (Lyuk 1:32, 33) So Jerusɛlɛm in “pwɛl” wan go dɔn we Jizɔs bi Kiŋ.
Ustɛm da impɔtant tin de go apin? Jizɔs bin sho se na fɔ sɔm tɛm nɔmɔ dɛn pipul we nɔto Ju go rul. Daniɛl chapta 4 go ɛp wi fɔ no aw lɔng da tɛm de go tek. Insay da skripchɔ de, Daniɛl tɔk bɔt wan drim we Kiŋ Nɛbukanɛza we bin de rul na Babilɔn, bin drim. Insay di drim, di kiŋ si wan big stik we dɛn kɔt. We dɛn kɔt am, af pat bin lɛf na grɔn. Bɔt i nɔ gro igen bikɔs dɛn rap ayɛn ɛn kɔpa rawnd am. Wan enjɛl bin tɔk se: “Lɛ i de so fɔ sɛvin ia.”—Daniɛl 4:10-16.
Sɔntɛnde, we di Baybul kin tɔk bɔt stik, i kin min di rul we pɔsin de rul. (Izikɛl 17:22-24; 31:2-5) So di kɔt we dɛn kɔt di stik insay di drim, min se di wan dɛn we Gɔd bin de yuz fɔ rul, go lɛf fɔ rul fɔ sɔm tɛm. Bɔt di vishɔn sho wi bak se di pwɛl we dɛn bin pwɛl Jerusɛlɛm, na fɔ smɔl tɛm nɔmɔ dis go apin. Na fɔ “sɛvin tɛm” nɔmɔ. Aw lɔng dis go tek?
Rɛvɛleshɔn 12:6, 14 sho wi se tri ɛn af ia we min tri ɛn af tɛm, ikwal to “wan tawzin, tu ɔndrɛd ɛn siksti de.” So dat min se “sɛvin tɛm” go bi 1,260 dez tayms tu, ɛn dat go gi wi 2,520 dez. Bɔt nɔto jɔs 2,520 dez nɔmɔ dɛn pipul we nɔto Ju bin pwɛl di rul we Gɔd bin de rul. Dis sho wi klia wan se di tɛm we dɛn tɔk bɔt, lɔng pas 2,520 dez. If wi yuz wetin de na Di Nɔmba Dɛm 14:34, ɛn Izikɛl 4:6, we tɔk bɔt ‘wande fɔ wan ia,’ wi go si se di “sɛvin tɛm” go tek 2,520 ia.
Di 2,520 ia bigin frɔm Ɔktoba insay di ia 607 bifo dɛn bɔn Jizɔs. Na da ia de di pipul dɛn na Babilɔn bin kam pwɛl Jerusɛlɛm ɛn pul di kiŋ na in chia. Di 2,520 ia dɔn insay Ɔktoba 1914. Na da tɛm de, dɛn pipul we nɔ sabi Gɔd, bin stɔp fɔ rul ɛn na da sem tɛm de Jizɔs Krays bi Kiŋ na ɛvin. *—Sam 2:1-6; Daniɛl 7:13, 14.
Jizɔs bin tɔk se di tɛm we i go bi Kiŋ na ɛvin, bɔku bad bad tin dɛn go apin na di wɔl. Tin dɛn lɛk wɔ, bad angri, atkwek, ɛn sik dɛn we de prɛd. Ɛn na so i dɔn bi. (Matyu 24:3-8; Lyuk 21:11) Dɛn tin ya de sho klia wan se fɔ tru na insay 1914 Gɔd in Kiŋdɔm bigin rul. Ɛn na frɔm da ia de tin dɛn bigin apin we de sho se i nɔ go te igen di wɔl go dɔn.—Sɛkɛn Lɛta To Timoti 3:1-5.
^ par. 9 Frɔm Ɔktoba insay di ia 607 bifo dɛn bɔn Jizɔs to Ɔktoba insay di ia 1, na 606 ia. Ziro ia nɔ de. So frɔm Ɔktoba insay di ia 1 to Ɔktoba insay di ia 1914, na 1,914 ia. So if wi ad 606 ia to 1,914 ia, wi go gɛt 2,520 ia. (606+1,914=2,520) Fɔ no mɔ bɔt di pwɛl we dɛn pwɛl Jerusɛlɛm insay di ia 607 bifo dɛn bɔn Jizɔs, na fɔ rid di tɔpik we dɛn kɔl “Chronology” insay wan buk we dɛn kɔl Insight on the Scriptures. Na Jiova Witnɛs dɛn mek dis buk.
