ພາກຜະໜວກ ປີ 1914—ປີທີ່ສຳຄັນໃນຄຳພະຍາກອນຂອງຄຳພີໄບເບິນ ເປີດ ປີ 1914—ປີທີ່ສຳຄັນໃນຄຳພະຍາກອນຂອງຄຳພີໄບເບິນ ນັກສຶກສາຄຳພີໄບເບິນໄດ້ປະກາດໄວ້ລ່ວງໜ້າເປັນເວລາຫຼາຍສິບປີວ່າຈະມີເຫດການທີ່ສຳຄັນເກີດຂຶ້ນໃນປີ 1914. ເຫດການເຫຼົ່ານັ້ນມີຫຍັງແດ່ ແລະມີຫຼັກຖານອັນໃດຊີ້ບອກວ່າປີ 1914 ເປັນປີທີ່ສຳຄັນ? ດັ່ງທີ່ບັນທຶກໄວ້ໃນລືກາ 21:24 ພະເຍຊູກ່າວວ່າ “ເມືອງເຢຣຶຊາເລມຈະເປັນທີ່ຢຽບເສຍດ້ວຍຕີນພວກຕ່າງປະເທດຈົນເຖິງເວລາກຳນົດຂອງພວກຕ່າງປະເທດນັ້ນຈະໄດ້ສຳເລັດແລ້ວ.” ເມືອງເຢຣຶຊາເລມເຄີຍເປັນເມືອງຫຼວງຂອງຊາດຢິວ ພ້ອມທັງເປັນສູນກາງ ການປົກຄອງຂອງກະສັດອົງຕ່າງໆໃນລາຊະວົງຂອງກະສັດດາວິດ. (ຄຳເພງ 48:1, 2) ແນວໃດກໍຕາມ ກະສັດເຫຼົ່ານີ້ບໍ່ຄືກັບບັນດາຜູ້ນຳຂອງຊາດອື່ນໆ. ກະສັດເຫຼົ່ານີ້ນັ່ງເທິງ “ພະທີ່ນັ່ງຂອງພະເຢໂຫວາ” ໃນຖານະເປັນຕົວແທນຂອງພະເຈົ້າ. (1 ຂ່າວຄາວ 29:23) ດ້ວຍເຫດນີ້ ເມືອງເຢຣຶຊາເລມຈຶ່ງເປັນສັນຍະລັກໝາຍເຖິງການປົກຄອງຂອງພະເຢໂຫວາ. ແຕ່ການປົກຄອງຂອງພະເຈົ້າເລີ່ມຖືກ “ຢຽບເສຍດ້ວຍຕີນພວກຕ່າງປະເທດ” ໂດຍວິທີໃດແລະເມື່ອໃດ? ເຫດການນີ້ເກີດຂຶ້ນໃນປີ 607 ກ່ອນ ສ.ສ. ຕອນທີ່ຊາວບາບີໂລນພິຊິດເມືອງເຢຣຶຊາເລມ. ບໍ່ມີໃຜນັ່ງເທິງ “ພະທີ່ນັ່ງຂອງພະເຢໂຫວາ” ແລະລາຊະວົງຂອງກະສັດທີ່ສືບເຊື້ອສາຍມາຈາກດາວິດຖືກຂັດຈັງຫວະ. (2 ກະສັດ 25:1-26) ການ “ຢຽບ” ນີ້ຈະດຳເນີນໄປຕະຫຼອດການບໍ? ບໍ່ແມ່ນ ເພາະຄຳພະຍາກອນຂອງເອເຊກຽນໄດ້ກ່າວເຖິງເຊເດເຊຍເຊກະສັດອົງສຸດທ້າຍຂອງເຢຣຶຊາເລມວ່າ “ຈົ່ງຖອດແພຄຽນຫົວ ຈົ່ງເອົາກະໂຈມອອກໄປ. . . . ສິ່ງນີ້ທັງມວນຈະບໍ່ເປັນຕໍ່ໄປຈົນເຖິງຜູ້ທີ່ມີການຕັດສິນ [“ສິດ,” ລ.ມ.] ອັນຊອບທຳຈະສະເດັດມາ ແລະເຮົາຈະຍົກສິ່ງນັ້ນໃຫ້ຜູ້ນັ້ນ.” (ເອເຊກຽນ 21:26, 27) ຜູ້ທີ່ “ມີສິດອັນຊອບທຳ” ທີ່ຈະໄດ້ຮັບມົງກຸດຂອງດາວິດແມ່ນພະຄລິດເຍຊູ. (ລືກາ 1:32, 33) ດັ່ງນັ້ນ ການ “ຢຽບ” ຈະສິ້ນສຸດລົງເມື່ອພະເຍຊູເປັນກະສັດ. ເຫດການທີ່ສຳຄັນນີ້ເກີດຂຶ້ນຕອນໃດ? ພະເຍຊູຊີ້ແຈງວ່າພວກຕ່າງປະເທດຈະປົກຄອງຕະຫຼອດໄລຍະເວລາໜຶ່ງທີ່ມີການກຳນົດໄວ້. ເລື່ອງໃນພະທຳດານຽນບົດທີ 4 ເປັນລູກກະແຈທີ່ຊ່ວຍໃຫ້ຮູ້ວ່າໄລຍະເວລານັ້ນດົນປານໃດ. ເລື່ອງນັ້ນກ່ຽວຂ້ອງກັບຄວາມຝັນທີ່ມີລັກສະນະເປັນຄຳພະຍາກອນທີ່ເນບຶກາດເນດຊາຣກະສັດຂອງປະເທດບາບີໂລນໄດ້ຝັນ. ລາວໄດ້ເຫັນຕົ້ນໄມ້ໃຫຍ່ຕົ້ນໜຶ່ງຖືກປໍ້າລົງ. ຕໍຂອງຕົ້ນໄມ້ນັ້ນບໍ່ສາມາດປົ່ງຂຶ້ນໃໝ່ໄດ້ເພາະມີປອກເຫຼັກແລະປອກທອງແດງຮັດໄວ້. ທູດສະຫວັນອົງໜຶ່ງປະກາດວ່າ “ໃຫ້ມີຍາມທັງເຈັດ ກາຍໄປເທິງມັນ.”—ດານຽນ 4:10-16. ໃນພະຄຳພີ ບາງເທື່ອມີການໃຊ້ຕົ້ນໄມ້ເພື່ອໝາຍເຖິງການປົກຄອງ. (ເອເຊກຽນ 17:22-24; 31:2-5) ດັ່ງນັ້ນ ການປໍ້າຕົ້ນໄມ້ໂດຍໄນຈຶ່ງເປັນສັນຍະລັກທີ່ສະແດງວ່າການປົກຄອງຂອງພະເຈົ້າເຊິ່ງມີກະສັດທີ່ຢູ່ເມືອງເຢຣຶຊາເລມເປັນຕົວແທນນັ້ນຈະຖືກຂັດຈັງຫວະ. ແຕ່ຄວາມຝັນນັ້ນໄດ້ສະແດງໃຫ້ເຫັນວ່າ “ເມືອງເຢຣຶຊາເລມຈະເປັນທີ່ຢຽບເສຍ” ໃນເວລາຊົ່ວຄາວ ນັ້ນຄືໄລຍະເວລາ “ຍາມທັງເຈັດ.” ໄລຍະເວລານີ້ດົນປານໃດ? ຄຳປາກົດ 12:6, 14 ຊີ້ແຈງວ່າສາມຍາມເຄິ່ງເທົ່າກັບ “1.260 ວັນ.” ດັ່ງນັ້ນ “ຍາມທັງເຈັດ” ຈະດົນສອງທົບ ຫຼື 2.520 ວັນ. ແຕ່ເມື່ອ 2.520 ວັນຜ່ານໄປນັບຕັ້ງແຕ່ເມືອງເຢຣຶຊາເລມຖືກພິຊິດ ພວກຕ່າງປະເທດກໍຍັງບໍ່ເຊົາ “ຢຽບ” ການປົກຄອງຂອງພະເຈົ້າ. ດັ່ງນັ້ນຈຶ່ງເຫັນໄດ້ແຈ້ງວ່າຄຳພະຍາກອນນີ້ລວມເອົາໄລຍະເວລາທີ່ດົນກວ່ານັ້ນຫຼາຍ. ໂດຍອີງຕາມຈົດເຊັນບັນຊີ 14:34 ແລະເອເຊກຽນ 4:6 ເຊິ່ງກ່າວເຖິງ “ວັນໜຶ່ງໃຊ້ຕາງປີໜຶ່ງ” “ຍາມທັງເຈັດ” ຈະກິນເວລາ 2.520 ປີ. ເວລາ 2.520 ປີເລີ່ມຕົ້ນໃນເດືອນຕຸລາ ປີ 607 ກ່ອນ ສ.ສ. ຕອນທີ່ຊາວບາບີໂລນພິຊິດເມືອງເຢຣຶຊາເລມແລະກະສັດໃນລາຊະວົງຂອງດາວິດຖືກຖອດຖອນອອກຈາກບັນລັງ. ໄລຍະເວລານັ້ນສິ້ນສຸດໃນເດືອນຕຸລາ ປີ 1914. ໃນຕອນນັ້ນ “ເວລາກຳນົດຂອງພວກຕ່າງປະເທດ” ສິ້ນສຸດລົງແລະພະເຍຊູຄລິດໄດ້ຮັບການແຕ່ງຕັ້ງໃຫ້ເປັນກະສັດຂອງພະເຈົ້າທີ່ຢູ່ໃນສະຫວັນ. *—ຄຳເພງ 2:1-6; ດານຽນ 7:13, 14. ດັງທີ່ພະເຍຊູໄດ້ພະຍາກອນໄວ້ ການ “ປະທັບ” ຂອງພະອົງຖານະເປັນກະສັດທາງພາກສະຫວັນຈະເຫັນໄດ້ຊັດເຈນຈາກເຫດການຕ່າງໆຂອງໂລກເຊັ່ນ ສົງຄາມ ຄວາມອຶດຢາກ ແຜ່ນດິນໄຫວ ໂລກລະບາດ. (ມັດທາຍ 24:3-8, ລ.ມ.; ລືກາ 21:11) ເຫດການດັ່ງກ່າວເປັນຫຼັກຖານທີ່ເຊື່ອຖືໄດ້ສຳລັບຄວາມເປັນຈິງທີ່ວ່າ ມີການຕັ້ງລາຊະອານາຈັກຂຶ້ນໃນປີ 1914 ຢ່າງແທ້ຈິງ ແລະ “ສະໄໝສຸດທ້າຍ” ຂອງລະບົບຊົ່ວໃນປັດຈຸບັນໄດ້ເລີ່ມຕົ້ນຂຶ້ນໃນປີນັ້ນເອງ.—2 ຕີໂມເຕ 3:1-5, ລ.ມ. ^ ຂໍ້ 4 ຕັ້ງແຕ່ເດືອນຕຸລາ ປີ 607 ກ່ອນ ສ.ສ. ເຖິງເດືອນຕຸລາ ປີ 1 ກ່ອນ ສ.ສ. ເປັນເວລາ 606 ປີ. ເນື່ອງຈາກບໍ່ມີປີສູນ ຕັ້ງແຕ່ເດືອນຕຸລາ ປີ 1 ກ່ອນ ສ.ສ. ເຖິງເດືອນຕຸລາ ປີ 1914 ສ.ສ. ຈຶ່ງເປັນເວລາ 1.914 ປີ. ເມືອເອົາ 606 ປີບວກກັບ 1.914 ປີ ກໍຈະໄດ້ 2.520 ປີ. ສຳລັບຂໍ້ມູນເລື່ອງເມືອງເຢຣຶຊາເລມຖືກພິຊິດໃນປີ 607 ກ່ອນ ສ.ສ. ຂໍໃຫ້ເບິ່ງຫົວຂໍ້ເລື່ອງ “ການຄິດໄລ່ເວລາ” ໃນປຶ້ມການຢັ່ງເຫັນເຂົ້າໃຈພະຄຳພີ (ພາສາອັງກິດ) ຈັດພິມໂດຍພະຍານພະເຢໂຫວາ. ຄືນຫຼັງ ຕໍ່ໄປ ພິມ ແຊຣ໌ ແຊຣ໌ ປີ 1914—ປີທີ່ສຳຄັນໃນຄຳພະຍາກອນຂອງຄຳພີໄບເບິນ ຄຳພີໄບເບິນສອນແນວໃດແທ້ໆ? ປີ 1914—ປີທີ່ສຳຄັນໃນຄຳພະຍາກອນຂອງຄຳພີໄບເບິນ ລາວ ປີ 1914—ປີທີ່ສຳຄັນໃນຄຳພະຍາກອນຂອງຄຳພີໄບເບິນ https://assetsnffrgf-a.akamaihd.net/assets/ct/46e9307b0a/images/syn_placeholder_sqr.png