1914 MANKA ba aimakras kainara, Baibil stadi tatakra daknika kum mita baha manka ra diara tara nani takaia kan ba kaina manas maisapahki kan. Dia takaia kan? Bara dia muni 1914 manka ba kulkanka tara brisa wiaia sip sa ki?

Luk 21:24 ra, Jisas ba naku aisan: “Ju apia nani mita Jerusalem ba ai mina ni taibia, pyua mangkan ba tnata alkbia ba kat”.  Jerusalem ba sika, Ju nisanka kapitalka kan. Bara Debit masraka king atia kan ba, baha kapitalka wina karnika alki bri kan (Lawana 48:1, 2). Sakuna kingka nani na, kanra sat wala kan nisan wala kingka nani ba wal, kan “[Jehova] king iwaika ra” iwi kan. Gâd lengstarka nani kan, wibia sa kaka, Gâd tawan aisasara bangwi kan (1 Kronikas 29:23). Baku bamna, Jerusalem ba sika, Jehova gabamintka karnika aimaki bri ba tanka kan.

Sakuna, ahkia wina bara nahki muni ‘Ju apia uplika ba mita Gâd gabamintka ba mina ni taibaia’ ta krikan ki? Baha ba, 607 yawan pyua nina [y.p.n.] manka ra ta krikan. Baha manka ra Babilun uplika ba Jerusalem ra rau sauhki pura luan, bara “[Jehova] king iwaika ra” upla apu taki, Debit masraka king nani kan ba mihta dakban (2 King nani 25:1-26). Jerusalem ra ban kaiara “mina ni taibi” briaia kan ki? Apia! Kan prapit Isikielku, Jerusalem kingka las Sidikaia ba ra, naha lâka yaban: “Lamla ra blaki kwalka ba man wina sakbia, kraunkam ba mihtam dakbi  bangwbia [...]. Sakuna naha na lika takbia, witinka yang adarki wal kasakka laka daukaia wisi balbia ba kat” (Isikiel 21:26, 27, Miskitu Testament Almuk, 1991). Witinka ‘Gâd adarka’ kat Debit kraunka briaia ba sika, Jisas Kraist (Luk 1:32, 33). Baku bamna, Jisas King aimakan kabia kat, Jerusalem ra “mina ni taibia” win.

Jisas ra King mangkan ba ahkia takan ki? Jisas bila Ju apia uplika ba mita, pyu mangkan ba kat lika karnika alki bribia win. Bara Danyal saptika 4 ba sika, baha pyua mangkan yarka tanka ba, lal kat marikisa. Baha saptika ra, Babilun kingka kum Nibyukadnisar maki ba mita, yaprisauhkanka kum ra diara takai ba kaina manas kaikan wisa. Yaprisauhkanka ra dus yahpa tara kum klaki batakan kan kaikan. Bara dusa ba pawras kabia mata, playka ra ayan bara bras ni wilkan kan kaikan. Ningka pali, insal kum mita adar muni win: “Baku kabia [...] 7 mani alkbia ba kat” (Danyal 4:10-16).

Baibil ra dus nani dahra aisi ba, sam taim gabamint nani tanka sa (Isikiel 17:22-24; 31:2-5). Baku bamna, dusa klakan kan kaikan ba sika, Gâd gabamintka ai lengstarka Jerusalem kingka nani wina mihta dakban kan ba tanka sa. Bara yaprisauhkanka ra sin, “Jerusalem” ra pyua mangkan ba kat “mina ni taibia” win, wibia sa kaka, “7 mani alkbia ba kat”. Baha 7 mani ba, nahki wihka kaia kan?

Param marikan [Reveleshan] 12:6, 14 bila, mani yuhmpa pura bakriki ba, “yu 1.260 prais” tanka sa wisa. Baku kaka, “7 mani” ba dubil takisa, wibia sa kaka, yu 2.520 takisa. Ban sakuna, Jerusalem rau muni sauhkan ba wina, yu 2.520 ningkara, Ju apia nisanka nani ba mita ban Jerusalem ra “mina ni taibi[...]” kan. Baha mita, naha kaina manas aisan ba, kau wihkara waia kan ba latan sa. Bara Kulki kaikan 14:34, wihki Isikiel 4:6 ra kaikbia sa kaka, wal sut ra kulki kaikaia lâ kum wankisa: ‘Yu kumi ba, mani kumi takisa’ wisa. Baha lâka ba kat, yu 2.520 ba, mani 2.520 takisa.

Mani 2.520 wihka ba, Waupasa [octubre] katka 607 y.p.n. manka wina ta krikan. Baha manka ra Babilun uplika ba Jerusalem rau sauhki muni, Debit masraka wina kingka bara kan ba sakan. Bara Waupasa [octubre] katka 1914 yawan pyua [y.p.] manka ba kat, wihka ba dan takan. Baha manka ra lika “pyua  mangkan ba tnata alk[an]”, bara Gâd bui Jisas Kraist ra heven ra King baku mangkan (Lawana 2:1-6; Danyal 7:13, 14). *

Jisas bui win witin heven ra pat King baku aimaki kabia taim, tasba ra diara sat sat aihka: War nani, plun wauhwan, tasba nikbanka nani, bara siknis saura nani sin takan kabia (Matyu 24:3-8; Luk 21:11). Bara baku takan sa! Naha sut taki aula ba mita, heven ra Gâd Kingka laka ba 1914 manka wina aimakan sa, bara 1914 ba wina naha tasba daukanka saura “tnata yua nani” ra iwi ba sin marikisa (2 Timoti 3:1-5).