YƲƲM 40 la bal sẽn deng yʋʋmd 1914, Biiblã zãmsdb togsa neba tɩ yel-kãsems n da na n zĩnd yʋʋm-kãng pʋgẽ. Yel-kãens yɩɩ yel-bʋse, la kaset bʋg n wilgd tɩ yʋʋmd 1914 yɩɩ kãseng woto?

Wala b sẽn gʋls tɩ be Luk 21:24 pʋgẽ wã, a Zezi yeelame: “Buud wʋsg na n sooga Zerizalɛm ne pãng hal tɩ bu-zẽmsa wakat sɛ.” Zerizalɛm da yaa Zʋɩf rãmbã na-tẽnga, zĩig ning rĩm dãmb nins sẽn da yit rĩm a Davɩɩd pendẽ wã sẽn da rɩt naamã. (Yɩɩl Sõamyã 48:2, 3) La rĩm dãmb kãens ra pa wala  bu-zẽmsã nanambs ye. Bãmb ra zĩi a Zeova naam geerã zug n dɩt naam Wẽnnaam yʋʋr yĩnga. (1 Kibaya 29:23) Woto, Zerizalɛm da makda a Zeova naamã.

La yaa wãn to, la wakat bʋg la bu-zẽmsã sɩng Wẽnnaam tẽng zug naamã ‘soogr ne pãnga’? Rẽ zĩnda yʋʋmd 607 sẽn deng a Zezi rogmã, Babilon nebã sẽn wa n tõog Zerizalɛmmã. Rẽ tɛka, ned baa a ye da pa rɩt naam a Zeova yʋʋr yĩng ye. A Davɩɩd roogã nanambs naam dɩɩb ra yalsame. (2 Rĩm dãmba 25:1-26) Ra na n kell n yɩɩ woto wakat sẽn pa sat bɩ? Ayo, bala a Ezekɩɛll bãngr-gomdã yeta woto Zerizalɛm yaoolem rĩm a Sedesias wɛɛngẽ: “Fõk f naam maanfa ne f zug peendã. . . . La yõwã me [maanfã] ka na n zĩnd hal tɩ ned ninga sẽn so noora wa tɩ m kõ-a tẽngã.” (Ezekɩɛll 21:31, 32) Ned ning ‘sẽn so noor’ ne a Davɩɩd roogã naam maanf yaa Kirist Zezi. (Luk 1:32, 33) Woto, bu-zẽmsã ‘soogr ne pãngã’ ra segd n saa a Zezi sẽn wat n lebg Rĩma sasa.

 Yaa wakat bʋg la yel-kãseng kãngã ra na n zĩndi? A Zezi wilgame tɩ wakat ning bu-zẽmsã sẽn da na n dɩ naamã yãka tɛka. Kibar ning sẽn be Daniɛll sak a 4 pʋgẽ wã tara yɛl sẽn sõngd tõnd tɩ d bãng wakat kãng sẽn da na n kaoos to-to. A gomda zãmsd sẽn togsd yɛl sẽn wat beoogo, Babilon rĩm a Nebukadnezaar sẽn zãms yelle. Rĩmã yãa tɩ-kãseng b sẽn kɛ n lubi. A viukã ra pa tõe n tob ye, bala b sẽbg-a-la ne kut la zũudu. Malɛk n yeel t’a na n paa woto ‘hal tɩ wakat a yopoe looge.’—Daniɛll 4:7-13.

Biiblã pʋgẽ, wakat ninga b sã n na n bilg naam, b makd-a-la ne tɩɩse. (Ezekɩɛll 17:22-24; 31:2-5) Rẽnd wa b sẽn keeg tɩɩgã n lubã, Wẽnnaam naamã Zerizalɛm rĩm dãmbã sẽn da rɩtã, ra na n wa yalsa wakat a wãna. La yãabã sɩd wilgame tɩ b “na n sooga Zerizalɛm ne pãnga,” la yaa “wakat a yopoe” bala. Rẽ kaoosa yʋʋm a wãna?

Wilgri 12:6, 14 wilgdame tɩ wakat a tãab la pʋɩ-sʋk zema rasem ‘tusr la kobs-yi la pis-yoobe.’ Rẽnd “wakat a yopoe” wã yaa sõor kãng naoor a yiibu, sẽn dat n yeel tɩ rasem 2520. La bu-zẽmsã pa bas Wẽnnaam naamã ‘soogr ne pãng’ rasem 2520 bal Zerizalɛm lʋɩɩsã poor ye. Rẽnd vẽenega, bãngr-gom-kãngã kaoosda wakat wok sẽn yɩɩd woto. D sã n tik Sõdbo 14:34 la Ezekɩɛll 4:6 zugu, sẽn yet tɩ ‘daar a ye fãa yaa yʋʋmdã,’ “wakat a yopoe” wã yaa yʋʋm 2520.

Yʋʋm 2520 wã sɩnga yʋʋmd 607 zĩ-likr kiuugu, Zerizalɛm sẽn wa n lʋɩ Babilon nebã nusẽ tɩ b sik rĩm ning sẽn da zao a Davɩɩd naam geerã zugã. Wakat kãng saa yʋʋmd 1914 zĩ-likr kiuugã. Sasa kãnga, ‘bu-zẽmsã wakat’ taa a tɛka, tɩ Wẽnnaam kɩt t’a Zezi Kirist lebg rĩm saasẽ. *—Yɩɩl Sõamyã 2:1-6; Daniɛll 7:13, 14.

 Wala a Zezi sẽn pĩnd n togsã, a sã n da wa lebg Rĩm saasẽ, yel-tood n da na n zĩnd dũniyã gill zugu. Yaa zaba, kom, tẽn-digimds la bã-longdse. (Matɩe 24:3-8; Luk 21:11) Yel-kãensã yaa kaset sẽn tar pãng sẽn wilgd tɩ yʋʋmd 1914 sɩd yɩɩ Wẽnnaam saasẽ Rĩungã luglgu, la dũni wẽng kãngã “yaoolem dayã” sɩngre.—2 Tɩmote 3:1-5.