VIMPANDE VIA KU VUEZAKO
1914—Muaka ua Seho ya Kama mu Vupolofeto vua Mbimbiliya
IMO miaka 40 ku nima, vakua ku Lilongesa Mbimbiliya va ambuluile nguavo mu 1914 mu ka soloka viuma via seho ya kama. Viuma vika? Kaha vukaleho vuka vua muesa ngecize 1914, ua puile muaka ua seho ya kama?
Ngue mu va soneka ku Luka 21:24 ngecize Yesu ua handekele ngueni: “Vakua vifuti va ka liatangela Yelusalema, noho zintsimbu zia vakua vifuti zi ka puisamo.” Yelusalema ya puile nganda ya vaYundeya, citumamo ca vuangana ca cikota ca vamiangana va ku ndzivo ya Muangana Ndaviti. (Visamo 48:1, 2) Vunoni ava vamiangana vaco va puile va ku lifuila ku tuvakana vamiangana vose va mu vifuti vieka. Va kele na ku sika ha “citumamo ca Yehova” mu ku mu imanena. (1 Mizimbu 29:23) Ngeci mukemuo Yelusalema yemanenene Vuangana vua Yehova.
Ntsimbu ika, kaha mu cifua cika ‘vakua vifuti va putukile ku liatangela’ vuangana vua Njambi? Va putukile mu muaka ua 607 AEC, mu va vulile Yelusalema kuli vakua Mbambilone. Ha “citumamo ca Yehova” ka ha kele muangana, kaha mukana ua vamiangana va ku cikota ca Ndaviti va u vatuisilile. (2 Vamiangana 25:1-26) Vuno ku ‘liatangela’ caco ca tualeleleho miaka yose ni? Houe, muomu vupolofeto vua Ezekiele vua handekele via Zendekiya muangana ua ku manusuila ua mu Yelusalema, nguavo: “Fumisenu lilesu, zulenu cilongo . . . Eci naua ka ci ka kala naua, noho a keza uze i ca pandama; kaha nji ka mu hiaco.” (Ezekiele 21:26, 27) “Uze i ca pandama” cilongo ca vuangana vua Ndaviti ikeye Kilistu Yesu. (Luka 1:32, 33) Ngeci mukemuo, ku ‘liatangela’ ca huile omo Yesu ua puile Muangana.
Ntsimbu ika ca solokele eci cuma ca seho ya kama ngecize? Yesu ua muesele ngecize Vakua Vifuti va ka sika lika mu ntsimbu ya ku puamo. Visoneka via mu livulu lia Ndaniele kapitulu 4 vi hasa ku tu kuasa ku nongonona nga ntsimbu ya ku pua kulihi ye ku hitilemo. Va sonekako via cilota ca Nevukaneza Muangana ua Mbambilone. Ua muene muti ua kama va u pakula. Kaha cimbundi cauo ka ca kolele muomu va ci kutile na lilenge lia vutale na nkengelezi. Kaha umo kangelo ua tambekele ngueni: “Ku mu hitile zintsimbu zitanu na zivali.”—Ndaniele 4:10-16.
Vintsimbu vimo, mu Mbimbiliya miti ve ku i setekesa na vuangana. (Ezekiele 17:22-24; 31:2-5) Ngeci mukemuo, cimueso ca ku pakula muti ca muesele vati va vatuisilile ku sika ca Njambi, mu ku tanganesa vamiangana va ku Yelusalema. Cimona ca soluele ngecize Yelusalema ka va ka i liatangela ku miaka yose, vunoni va ka i liata lika “zintsimbu zitanu na zivali.” Vati tua pande ku tanda eyi ntsimbu?
Ku-Solola 12:6, 14 ya muesa ngecize vintsimbu vitatu na mutamba ua ntsimbu via pua “likulukazi na vihita vivali via matangua na matangua makumi atanu na limo [1.260].” Eci ca lomboloka ngecize “zintsimbu zitanu na zivali” zia pande ku pua matangua 2.520. Vunoni vakua vifuti ka va ‘liatangelele’ ha ku sika ca Njambi mu matangua 2.520 lika mu nima ya kuua ca Yelusalema houe. Ngue mu tua mono, ovu vupolofeto vuesualele ntsimbu ya kama. Ku liya na Numelu 14:34 na Ezekiele 4:6 ize ya muesa ngecize “ku litangua limo muaka umo,” “zintsimbu zitanu na zivali” zia pua miaka 2.520.
Miaka 2.520 ya putukile mu Outubro ya 607 AEC omo vakua Mbambilone va vulile Yelusalema, kaha muangana ua ku cikota ca Ndaviti va mu tundisile ha citumamo ca vuangana. Miaka yaco ya huile mu Outubro ya 1914. Mu muaka uze “zintsimbu zia vakua vifuti” zia huile, kaha Yesu Kilistu va mu vialekele ha Vuangana vua Njambi muilu. *—Visamo 2:1-6; Ndaniele 7:13, 14.
Ngue mua handekele laza Yesu ngueni viuma via ku komouesa vika soloka ha mavu—zindzita, ndzala, mandunduma, mavezi a ku litambuisa—mu ntsimbu ya ka pua Muangana ua muilu. Kaha mukemuo vene mu via puile. (Mateo 24:3-8; Luka 21:11) Evi viuma viaco, via pua vukaleho vua kama vua muesa ngecize muaka ua 1914 ukeuo mpundu u va tumbikile Vuangana vua Njambi muilu na ku putuka ca ‘matangua a ku kotokela’ a ano mavu a api.—2 Timoteo 3:1-5.
^ cin. 9 Tunde mu Outubro ya 607 AEC ku tuala mu Outubro ya 1 AEC, mua hitile miaka 606. Tunde mu Outubro ya 1 AEC ku tuala mu Outubro ya 1914 mua hitile miaka 1.914. Nga tu pandakana miaka 606 ku miaka 1.914 tu uana miaka 2.520. Mu hasa ku tanda via mizimbu ya kuua ca Yelusalema mu 607 AEC mu livulu Estudo Perspicaz das Escrituras ha mutue “Cronologia,” li va tuhula Vakaleho va Yehova.
