Mokanwo
1914—Ɛvolɛ Titile wɔ Baebolo Ngapezo Nu
ƆHALE kɛyɛ ɛvolɛ 40 na ɛvolɛ 1914 adwu la, Baebolo sukoavoma hanle kɛ edwɛkɛ titile basisi wɔ zɔhane ɛvolɛ ne anu. Duzu edwɛkɛ ɔ, na daselɛ boni a kile kɛ ɛvolɛ 1914 le ɛvolɛ titile a?
Kɛmɔ bɛhɛlɛ ye wɔ Luku 21:24 la, Gyisɛse zele kɛ: “Menli mɔɔ ɛnze Nyamenle la barava Gyɛlusalɛm azɛlɛ ye adɛnla zo kɔkpula kɛ bɛ mekɛ kɛdwu.” Ɛnee Gyɛlusalɛm a le Dwuda maanle ne suakpole a
Noko, mekɛ boni a ‘menli mɔɔ ɛnze Nyamenle la ravale Nyamenle ebialilɛ ne dɛnlanle zo a,’ na kɛzi bɛyɛle ye ɛ? Ɛhye zile 607 K.Y.M., mekɛ mɔɔ Babelɔnma zɛkyele Gyɛlusalɛm la. Ɛnee ‘Gyihova ebia ne’ ɛnlɛ belemgbunli anzɛɛ ye gyimalilɛ ne abo pɛle, na arelemgbunli mɔɔ vi Devidi abusua nu mɔɔ ɛnee gyi ɔ gyakɛ anu la anyia adenle anli ebia. (2 Arelemgbunli 25:1-26) Asoo ɛnee ‘ɛvalɛ’ ɛhye bahɔ zo dahuu? Kyɛkyɛ, ɔboalekɛ anwumabɔvolɛ Geebeleɛle zele Mɛle kɛ ‘Awulae Nyamenle bayɛ Gyisɛse belemgbunli kɛ ɔ nlenya Devidi la.’ (Luku 1:32, 33) Ɛhye ati, ɛnee ‘ɛvalɛ’ ne bara awieleɛ wɔ mekɛ mɔɔ Gyisɛse ɛrayɛ Belemgbunli la.
Ɛnee mekɛ boni a edwɛkɛ kpole ɛhye bazi a? Gyisɛse hilele kɛ menli mɔɔ ɛnze Nyamenle la bali tumi wɔ mekɛ kpɔtee bie anu. Edwɛkɛ ne mɔɔ wɔ Daneɛle tile 4 la maa yɛnwu kɛzi zɔhane mekɛ ne tendenle bayɛ la. Ɔfane ɛlalɛ bie mɔɔ ɔle ngapezo mɔɔ Babelɔn Belemgbunli Nɛbukadenɛza hanle la anwo. Ɔnwunle baka kpole tendenle bie mɔɔ bɛpɛle bɛdole aze la. Ye dosinli ne angola fifi ɔluakɛ bɛvale mbulalɛ nee kɔbele bɛnyinyinle nwolɛ. Nwolɛ ɛnyinyilɛ ne bayɛ ‘ɛvolɛ nsuu.’
Wɔ Baebolo ne anu, ɔdwu mekɛ ne bie a bɛfa mbaka bɛgyinla ɛkɛ bɛmaa tumililɛ. (Yizikeɛle 17:22-24; 31:2-5) Yemɔti sɛkɛlɛneɛ adenle zo baka ne mɔɔ bɛpɛle bɛdole aze la kile kɛzi Nyamenle tumi, mɔɔ ɛnee ɔdua arelemgbunli mɔɔ wɔ Gyɛlusalɛm anwo zo ɔdi la abo bapɛ la. Noko akee, ɛnyelɛzodeɛnwunlɛ ne hilele kɛ ‘Gyɛlusalɛm ɛvalɛ’ ɛhye bayɛ mekɛ ezinra nu debie
Yekile 12:6, 14 kile kɛ ngapezo ɛvolɛ nsa nee foa le “kenle apenle ko, ɛya nwiɔ abulasia.” Ɛhye ati ngapezo “ɛvolɛ nsuu” ne bayɛ kenle 2,520. Noko menli mɔɔ ɛnze Nyamenle la angyakyi Nyamenle ebialilɛ ne ‘ɛvalɛ’ wɔ kenle 2,520 anzi wɔ mekɛ mɔɔ bɛzɛkyele Gyɛlusalɛm la. Ɔda ali kɛ ngapezo mekɛ ɛhye wale tɛla kenle 2,520. Saa yɛfa Yizikeɛle 4:6 yɛɛ Ɛdianlɛ 14:34, mɔɔ ka kɛ, “kenle ko biala le . . . ɛvolɛ ko” la yɛdi gyima a, ɛnee ngapezo “ɛvolɛ nsuu” ne bayɛ ɛvolɛ 2,520.
Ɛvolɛ 2,520 ne bɔle ɔ bo wɔ October 607 K.Y.M., mekɛ mɔɔ Babelɔnma zɛkyele Gyɛlusalɛm na bɛzɛkyele Devidi ebialilɛ ne mɔɔ ɛnee gyi ɛkɛ ne maa Nyamenle la. Mekɛ zɔhane rale awieleɛ wɔ October 1914. Zɔhane mekɛ ne a ‘menli mɔɔ ɛnze Nyamenle la mekɛ ne’ rale awieleɛ a, na Nyamenle vale Gyisɛse Kelaese ziele ɛkɛ ne kɛ ye anwuma Belemgbunli. *
Kɛmɔ Gyisɛse hanle dole ɛkɛ ne la, ye “ɛralɛ” mɔɔ yera kɛ anwuma Belemgbunli la ɛva ninyɛne le kɛ konle konle, ɛhɔne, azɛlɛkpuzulɛ yɛɛ ewule ngakyile ɛra ewiade. (Mateyu 24:3-8; Luku 21:11) Ninyɛne ɛhye mɔ di daselɛ kpole kɛ amgba 1914 a bɛvale Nyamenle anwuma Belemgbunlilɛ ne bɛziele ɛkɛ ne a, na ewiade ɛtane ɛhye “awieleɛ mekɛ ne” bɔle ɔ bo wɔ zɔhane mekɛ ne.
^ ɛden. 4 Ɛbɔ ye October 607 K.Y.M. mɔɔ ba October 1 K.Y.M. la le ɛvolɛ 606. Ɔbɔ ye October 1 K.Y.M. mɔɔ badwu October 1914 Y.M. la le ɛvolɛ 1,914. Saa yɛfa ɛvolɛ 606 yɛboka ɛvolɛ 1,914 anwo a, yɛnyia ɛvolɛ 2,520. Saa ɛkpondɛ Gyɛlusalɛm ɛzɛkyelɛ ne mɔɔ zile wɔ 607 K.Y.M. la anwo edwɛkɛ dɔɔnwo a nea edwɛkɛtile mɔɔ se “Chronology” mɔɔ wɔ Insight on the Scriptures, mɔɔ Gyihova Alasevolɛ ɛyɛ la anu.
