APENDISI
1914 — Un anu importanti na profesia di Biblia
KUAS korenta anus antis, studantis di Biblia falaba ja kuma, i na ten akontisimentus importanti na 1914. Es i kal akontisimentus, i kal provas ku mostra kuma 1914 i un anu importanti?
Suma ki skirbidu na Lukas 21:24, Jesus fala: “Jintius na masa Jerusalen te ora ku se tempu kompleta.” Jerusalen seduba kapital di Judeus — tronu di reis di jorson di Rei Davi. (Salmu 48:1, 2) Ma, es reis seduba diferenti ku lideris di utrus nasons. E ta sintaba na “tronu di SIÑOR” suma representantis di Jeova Deus. (1 Kronikas 29:23) Asin, Jerusalen seduba un simbulu di guvernu di Jeova.
Kuma ki “jintius na masa” guvernu di Deus i kal tempu ke kumsa fasil? Es akontisi na 607 A.E.K. oca Jerusalen konkistadu pa Babilonius. ‘Tronu di Jeova’ ka tene mas un rei, jorson di reis ku ta represental i ku bin di Davi ntrumpidu. (2 Reis 25:1-26) Sera ki Jerusalen na ‘masadu’ pa tudu tempu? Nau, pabia profesia di Ezekiel fala sin, aserka di ultimu rei di Jerusalen, Zedekias: “Tiral koroa na kabesa, bu pul di ladu. . . . I ka na kumpudu mas tok kil ku sedu si propi dunu bin; N na dal el.” (Ezekiel 21:26, 27) Algin ku sedu “propi dunu” di koroa di Davi i Jesus Kristu. (Lukas 1:32, 33) Asin, Jerusalen na para ‘masadu’ ora ki Jesus torna Rei.
Kal tempu kes akontisimentu importanti na sedu? Jesus mostraba kuma Jintius na guverna pa un tempu markadu. Relatu ku sta na kapitulu 4 di Daniel tene nformason ku pudi judanu kalkula kantu tempu kes piriudu na dura. I fala di un suñu profetiku ku Rei di Babilonia Nabukodonosor tene. I ojaba un arvuri di altura garandi ku batidu. Si tronku ka pudi kirsi pabia i maradu ku banda di feru i ku kobri. Un anju fala: “Tok seti tempu pasa riba del.” — Anos ku pui italiku; Daniel 4:10-16.
I ta ten bias ku Biblia ta usa arvuris pa representa guvernu. (Ezekiel 17:22-24; 31:2-5) Asin, kaida di arvuri simboliku representa kuma ki guvernu di Deus, ku reis na Jerusalen ta representaba, na ntrumpidu. Asin, vison ta mostra kuma, ‘Jerusalen na masadu’ pa puku tempu — un piriudu di “seti tempu.” Kantu tempu kes piriudu na dura?
Apokalipsi 12:6, 14 mostra ki tris tempu i meiu korospundi “1.260 dia.” Asin, “seti tempu” na sedu dobru, o 2.520 dia. Ma, Jintius ka para “masa” guvernu di Deus so na 2.520 dia dipus di Jerusalen kai. Sin duvida, es profesia dura mas tempu. Sugundu ke ki faladu na Numerus 14:34 ku Ezekiel 4:6, ku fala di “un anu pa kada dia,” “seti tempu” na sedu 2.520 anu.
2.520 anu kumsa na Otubru di 607 A.E.K., oca Jerusalen kai dianti di Babilonius i renu di jorson di Davi kabadu kel. Es piriudu kaba na Otubru di 1914. Na ki anu, ‘tempu kompletu di jintius’ kaba, i Jesus Kristu mposadu suma Rei ku Deus kuji na seu. * — Salmu 2:1-6; Daniel 7:13, 14.
Jesus falaba ja kuma, akontisimentus garandi na mundu — geras, fomi, tirmidura di con, duensas — na marka tempu ki na bin torna Rei na seu. I kila ki bin akontisi. (Mateus 24:3-8; Lukas 21:11) Es akontisimentus i un prova garandi ku ta mostra kuma, na bardadi, 1914 i anu ku Renu di Deus stabilisidu na seu, i kumsa ‘ultimus dias’ des sistema di kusas mau. — 2 Timótiu 3:1-5.
^ par. 4 Di Otubru di 607 A.E.K te na Otubru di 1 A.E.K. i pasa 606 anu. Suma anu zeru ka ten, di Otubru di 1 A.E.K. te na Otubru di 1914 E.K. i pasa 1.914 anu. Si no soma 606 anu ku 1914 anu, no na tene 2.520 anu. Pa tene nformason aserka di kaida di Jerusalen na 607 A.E.K, bu pudi jubi asuntu “Cronologia” na livru Estudo Perspicaz das Escrituras, publikadu pa Tustumuñas di Jeova, dispunivel na purtugis.
