MANARAQ 1914 wata chämuptinmi, wallkaqlla Bibliata estudiaqkuna atska watapana willakïkäyarqan tsë 1914 wata alläpa importante kanampaq kaqta. ¿Imakunaraq pasanan karqan? ¿Ima pruëbakunataq 1914 wata alläpa importante kanqanta rikätsimantsik?

Lucas 21:24 nishqanchömi Jesus nerqan: “Diosman mana marcäcoq caru nunacunam Jerusalenta jalucuyanqa, asta Dios dispunishqan tiempucamayaq” nishpa. Judía markapa principal markanmi karqan Jerusalenqa. Y tsëpita patsëmi Davidpa kastampita reykuna gobernayaq (Salmo 48:1, 2). Kë reykunaqa ‘Jehová mandakur täranqanmanmi’ gobernayänampaq täkuyaq, tsëmi wakin nacionkunachö reykunapita hukläya kayaq, awmi, Dios Yayapa representantenkunam kayaq (1 Crónicas 29:23). Tsënöpam Jerusalenqa Jehová Dios gobernanampaq täkunan sitio karqan.

 Tsëpenqa, ¿imanö y imëtaq Diosta mana adoraq nunakuna Jehová Diospa gobiernonta halur qallëkuyarqan? Këqa pasarqan 607  wata manaraq Jesus shamuptinmi (m.J.sh.), Jerusalén markaman babiloniokuna ushakätsiyänampaq yëkuriyaptin. Tsënöpam, “Jehová mandakur täränqan” sitiochöqa Davidpa kastampita reykuna manana kayarqannatsu (2 Reyes 25:1-26). Pero, ¿mananatsuraq Davidpa kastampita reykuna imëpis gobernayanmanna karqan? Mä rikärishun, Ezequiel nishqan librochömi, Jerusalenpa último kaq Reynin Sedequiasta Jehová mandarqan: “Horqë peqëki wankuränanta, y corönëkitapis. Y manam pipaqpis kanqatsu këqa, hasta gobernamunampaq derëchoyoq kaq chämonqanyaq y pëtam këtaqa entregashaq” nishpa (Ezequiel 21:26, 27). Davidpa corönan chaskeq y gobernamunampaq ‘derëchoyoq kaqqa’ Jesucristom (Lucas 1:32, 33). Tsëmi, Jesus Rey tikrariptenqa, Diosta mana adoraq nunakuna Jerusalenta manana gobernayänannatsu karqan.

 ¿Imëtaq tsëqa pasarqan? Kikin Jesusmi willakorqan, Diosta mana adoraq nunakunaqa huk tiempo Jerusalenta gobernayänanta. Y ëka tiempopis duranantaqa Daniel capítulo 4 nishqanchömi alleq willamantsik. Tsëchömi willamantsik Babiloniapa reynin Nabucodonosor nishqampa suëñininta. Tsë suëñochömi rikarqan huk hatun montita walluyanqanta. Y hawa troncontam hierrowan cobrewan watayarqan mana winanampaq. Tsëpitanam huk ángel mandakorqan: Tsë troncoqa watarätsun “qanchis tiempokuna” nishpa (Daniel 4:10-16).

Bibliachö, hatusaq montikuna nerqa, höraqa gobiernokunapaqmi parlan (Ezequiel 17:22-24; 31:2-5). Tsëmi, tsë hatun montita roquyanqanqa rikätsikorqan, Diospa gobiernon Jerusalenchö akrashqa reyninkunawan huk tiempo manana gobernananta. Hina tsë suëñochöqa rikarqan qanchis tiempolla “Jerusalén” “jalushqa” kanqantam. ¿Ëka tiemporaq kanman karqan tsë qanchis tiempokuna?

Apocalipsis 12:6, 14, QKW, nishqanchömi willamantsik, kë kima tiempo y pullanyoqqa, “waranqa ishke pachak joqta chunka” (1.260) hunaqkuna kanqanta. Tsëmi, kë kima tiempo y pullanyoqman más kima tiempo y pullanyoqta yaparishqaqa “qanchis tiempoman” tikrarin, y qanchis tiempota yuparishqanam 2.520 hunaqkunana ratarin. Pero, Dios mana adoraq nunakunaqa manam Jerusalén ishkirenqampita 2.520 hunaqllachötsu Diospa gobiernonta halur ushariyarqan. Këqa alleqmi tanteatsimantsik kë profecïaqa más tiempo durananta. Números 14:34 y Ezequiel 4:6, nishqanta ashirishqaqa, “huk hunaq huk wata kanqantam” rikätsimantsik. Y tsëmi “qanchis tiempokunaqa” 2.520 hunaqkunallatsu, sinöqa 2.520 watakuna.

Tsë 2.520 watakunaqa qallarerqan, 607 watapa octubre killanchömi, manaraq Jesus shamuptin —tsë watachömi Babilonia markapita nunakuna Jerusalenman yëkurir, Davidpa kastampita reyta horqariyarqan— 1914 watapa octubre killanchömi usharerqan. Y kë watachömi “Diosta mana adoraq markakunapa tiempon usharerqan”, hina kë 1914 watallachömi  Dios Yaya tsurin Jesucristuta churarerqan ciëlochö Rey kanampaq (Salmo 2:1-6; Daniel 7:13, 14). *

Kikin Jesusmi willakorqan, ciëlochö Rey këman chäriptenqa, guerrakuna, mallaqëkuna, patsa kuyïkuna y imëka qeshyakunapis kananta (Mateo 24:3-8; Lucas 21:11). Y tsënömi kashqa. 1914 watapita patsëmi Diospa Reinon ciëlochö gobernar qallëkorqan, tsënöllam hina mana alli nunakunapa ushakënin tiempopis qallëkorqan (2 Timoteu 3:1-5).