E NGAURU ua atu mataiti i mua ake, kua akakitekite te aronga apiipii Pipiria e ka tupu te au tupu anga puapinga i te 1914. Eaa teia au mea, e eaa te akakite anga tika te tou ra ki te 1914 ei mataiti puapinga ra?

Mei tei tataia i roto ia Luka 21:24, kua karanga a Iesu e: “E ka takatakaiia a Ierusalema e te au pa enua, e tae ua atu ki te tupuanga te au tuatau akatakaia no te au pa enua [“au tuatau o te  Kenitara,” King James Version].” (NW) Ko Ierusalema te oire maata o te enua ngati Iuda​—te noo anga tutara o te au ariki mei te ngutuare o te Ariki ko Davida. (Salamo 48:​1, 2) Inara, e au ariki umere teia i rotopu i te au arataki o te pa enua. Kua noo ratou ki runga i te “terono a Iehova” ei komono no te Atua uaorai. (1 Paraleipomeno 29:23) No reira e akatutu anga a Ierusalema no te tutara anga a Iehova.

Akapeea e i naea, i reira, te tutara anga a te Atua i akamata ai i te ‘takatakaiia e te au pa enua’? Kua tupu teia i te 607 M.T.N. i te autu angaia a Ierusalema e te au Babulonia. Kua va mai i reira te “terono a Iehova,” e kua tamanamanataia te au ariki mei ia Davida mai. (2 Ariki 25:​1-26) Ka tupu ainei teia ‘takatakai anga’ e tuatau ua atu? Kare, no te mea te karanga ra te totou a Ezekiela no runga i te ariki openga o Ierusalema, ko Zedekia e: “Ka apai ke atu i te pare ariki, kiriti i te korona . . . e ka kore roa ïa te reira, e kia tae mai aia ra te pu tikai ra; e naku e oronga atu nona.” (Ezekiela 21:​26, 27) Te mea koia “te pu tikai ra” ki te pare ariki o te taoonga o Davida  ko Iesu Karaiti. (Luka 1:​32, 33) No reira ka akamutu te ‘takatakai anga’ me riro mai a Iesu ei Ariki.

Aea te reira tupu anga mekameka e tupu ei? Kua akaari mai a Iesu e ka tutara te au Kenitara no tetai tuatau tei akanooia. Te mou ra te papaanga i roto ia Daniela pene 4 i te taviri no te kiteanga e eaa te roa e akamutu ei te reira tuatau. Te akakite ra te reira i tetai moemoea totou tei kiteia e te Ariki ko Nebukanesa o Babulonia. Kua kite aia i tetai tumu rakau maatamaata tei tipuia ki raro. Kare e rauka i tona tumu i te tupu akaou no te mea kua tapekaia te reira ki te auri e te veo. Kua akakite tetai angera e: “E kia itu ua atu tuatau i te na runga anga iaia ra.”​—Daniela 4:​10-16.

I roto i te Pipiria, te taangaangaia ra te au tumu rakau i etai taime ei akatutu anga i te tutara anga. (Ezekiela 17:​22-24; 31:​2-5) No reira te tipuanga ki raro o te tumu rakau akatutu ua, te akatutu ra e akapeea te tutara anga a te Atua, tei raveia na roto i te au ariki i Ierusalema ra, i te tamanamanata angaia. Inara, kua akakite te orama e ka riro teia ‘takatakai anga o Ierusalema’ ei mea poto ua​—e tuatau “itu ua atu tuatau.” Eaa te roa o te reira tuatau?

Te akakite maira a Apokalupo 12:​6, 14 e e toru e te apa taime aiteite ki te “okotai tausani, e rua anere, e ono ngauru i te rā.” Te “itu ua atu tuatau” e rua taime maata atu te roa, me kore e 2,520 au ra. Inara kare te au enua Kenitara i akamutu ana i te ‘takatakai anga’ i te tutara anga a te Atua no tetai mea 2,520 ua au ra i muri ake i te topa anga a Ierusalema. Tei kiteaia, i reira, ka roa atu te tuatau ka pou no teia totou. I te aru anga ia Numero 14:34 e Ezekiela 4:6, tei tuatua ra e “okotai rā okotai ïa mataiti,” ka pou te “itu ua atu tuatau” mei te 2,520 mataiti.

Kua akamata te 2,520 mataiti i roto ia Okotopa 607 M.T.N., i te topa anga a Ierusalema ki te au Babulonia e kua kiritiia te taoonga ariki o Davida mei tona terono. Kua akamutu te tuatau i roto ia Okotopa 1914. I te reira taime, kua ope “te au tuatau akatakaia no te au pa enua,” e kua akataoongaia a Iesu Karaiti ei Ariki i te rangi na te Atua. *​—Salamo 2:​1-6; Daniela 7:​13, 14.

 Mei ta Iesu i totou ra, kua akairoia tona “parutia” ei Ariki i te rangi na roto i te au tupu anga e kiteia ra i teianei ao​—te tamaki, te onge, te au ngaruerue enua, te au maki mate. (Mataio 24:​3-8, NW; Luka 21:11, NW) Te akaari maira taua au tupu anga i te akakite anga ririnui e ko te 1914 tei akairo tikai i te anau anga o te Patireia o te Atua i te rangi e te akamataanga o te “tuatau openga” o teia akatereanga kino o te au mea nei.​—2 Timoteo 3:​1-5.