‘E FẠU hisaghul ne ofiafua famör rak Puk Ha‘a rak‘ȧk jen ne la sok ‘e fạu 1914. Te tes ‘atama, ma aier‘ạkiạg teset tä rak‘ȧk ne 1914 iạ fạu ‘es fuạgat?

Fakma ne fȧ‘ vạhia ‘e Luke 21:24, Jisu ‘eag: “Jerusalem ‘i täla jar‘ȧk sio ‘e lelea‘ Jentaili, la hele‘ se ‘on la vạhiag ne av ‘on lelea‘ Jentaili.” Jerusalemi iạ ta hanuạ noh fakgagaj ‘on lelea‘ Jiu—ta fuạg puer ne ạf sạu, ne fuạg sạu ‘on Sạu ta Tevita. (Salamo 48:1, 2) Ka, sạu ‘i tu pạu ‘e famör puer ne hanuạ tūtū. Iris ‘i päe se “fuạg faksau ‘on Jihova” la mat ‘on iạ ‘Ạitu. (1 Puk Asoat Se Puk ‘On Sau 29:23) Ma ta ‘on‘on Jerusalemi iạ ta faki‘oag ne puer ‘on Jihova.

Ka, sok tapen,ma ‘e av hes ta puer ‘on ‘Ạitu kamat la “jar‘ȧk sio ‘e lelea‘ Jentaili”? Te te‘is sok ‘e fạu 607 M.A.K. ‘e avat ne lelea‘ Papiloni fakrava‘ȧk Jerusalemi. Ma kat ‘es sạu ra ‘e “fuạg faksau ‘on Jihova,” ma sạu ne leum ‘e ạf ne tör ‘on Tevita fu‘uena. (2 Puk On Sau 25:1-26) Tei ka ‘jar‘ȧk’ te te‘ kal fu‘ ra ‘e ta avat? ‘Igke‘, Isikeli fäeag parofesại‘ȧk vạhia hün se sạu fakmür ne Jerusalemi, Setekaia: “Tekạiof ‘ou fạ‘purou faksau heta, ma ‘ou ‘ornoa‘ heta…Ka ne tē te‘is kal sok ra, la hele‘ se av het ne ia ne gou hil vȧh…la hạ‘ume e. Ma kotä gou sap‘ȧk hanuạ noh ta se iag.” (Isikeli 21:26, 27) Jisu Karisto ia ta “hil vȧh” la po‘ia fạ‘purou faksạu ‘on Tevita. (Luke 1:32, 33) Ma ‘jar‘ȧk’ te ta la vȧh ‘e avat ne Jisu la fu la Sạu e.

Te ‘es‘ao te‘is la sok ‘e av hes? Jisu kel‘ȧk ne te‘ ne matantu Jentaili la puer ‘e laloag ne av het ne fại vạhia. Te ne fȧ‘ ‘e Taniela väe 4 ta la pola haiasoagan ‘is la ‘inea‘ia ‘on roa ne av het ne te ‘i la soko e. Väe ta‘ag rak‘ạkim re mös ‘on Sạu ne Papiloni Nepukatnesa ne kel‘ạkim te ne la sok ‘e ‘on fakmuri. Iạ räe se ta ‘ại hu lamlam fakapạut ne fại sio. ‘On huni kat pora la fup ‘e reko iạ takại‘ȧk ‘e ta ‘o‘orot ne re ‘e ‘ia ma parasa. Ma ta ‘agerot ‘eag: “Ma av hif la siriag ‘e ‘on rere.”—Taniela 4:10-16.

‘E av ‘e ‘on rerege Puk Ha‘a a‘mou a‘es‘ao‘ȧk ‘ại hu la a‘tạtạu‘ȧk se pure. (Isikeli 17:22-24; 31:2-5) Ma fạiạg ne ‘ại hūut ne a‘tatạu‘ȧk se puer ‘on ‘Ạitu, ne kel‘ạkim ‘e sạu ne Jerusalemi täla fu‘uena. Ka, te räe‘ȧk te‘ ne rak‘ạkim ‘e ‘jar‘ạkiag ne Jerusalemi’ kal fumou ra—‘on roa la “av hif.” Ma la tapen ‘on roa ne “av hif” ta‘ag?

Kel‘ȧk Tē 12:6, 14 ‘ea ne ‘e avat av he fol ma hafat iạ tatạu se “terȧn äfet ma tarạu ruạ ma onaghul.” Ma “av hif” ta kop la a‘ruạ ‘on roa, ne terȧn 2,520. Ka kạinag Jentaili kat fu‘ ra ‘oris ‘jar‘ạkiag ne puer ‘on ‘Ạitu ‘e terȧn 2,520 ‘esea ‘e vạhiag ne ‘oris siạg‘ạkiag ne Jerusalemi. Ma taf pạu, ne fäeag parofesại te‘ hün‘ȧk se ta avat ne roa se‘. Ma ‘e reko te ne Hatag ne Famori 4:34 ma Isikeli 4:6 fạ‘i, ne ‘ea “terạnit ma, ma fạut,” ma ‘on roa ne “av hif” ta‘ag la fạu 2,520.

Fạu 2,520 ta kamat ‘e ‘Okotopa 607 M.A.K., ‘e avat ne Papiloni siạg‘ȧk Jerusalemi ma sạut ne torem Tevita ‘ut‘ȧk ‘e ‘on päeag faksạu. Ma av ta‘ag vȧh ‘e ‘Okotopa fạu 1914. ‘E av heta‘ag, “av ‘on lelea‘ Jentaili” vȧh‘ia, ma Jisu Karisto tä fu ‘e hevạni la Sạu ne Pure‘ag ‘on ‘Ạitu.*—Salamo 2:1-6; Taniela 7:13, 14.

La fakma ne Jisu parofesại‘ȧk vạhia, ‘on “mariugame” la Sau fakhevȧn ta faki‘oag ‘e te rue‘ȧk huạg titi‘ ne soksok ‘e rȧnte‘—la fakse pelu, soge, ruerueag ne hanua, ma masȧ‘ ma‘oi. (Mataio 24:3-8; Luke 21:11) Te tape‘ ne soksoko kel‘ȧk aier pạu ne fạu 1914 ta iạ ta faki‘ogan fu‘ạkiag ne, Pure‘ag fakhevȧn ‘on ‘Ạitu ma ‘on kamatag ne “terȧn fakmuri” ne rȧn raksa‘ te‘isi.—2 Timoti 3:1-5.

*  Kamatam ‘e ‘Okotopa 607 M.A.K. se ‘Okotopa 1 M.A.K. iạ fạu 606. ‘E reko kat ‘es fạu ‘ōot ra, hatam ‘e ‘Okotopa 1 M.A.K. se ‘Okotopa 1914 A.K. ma iạ la fạu 1,914. Ma la tạuna‘ia fạu 606 ma fạu 1,914, ma ‘is po se fạu 2,520. La ‘inea te ma‘oi hoi‘ȧk ‘e reko sigiạg ne Jerusalemi ‘e fạu 607 M.A.K., ‘is la ‘io se tē ne fȧ‘ ‘e “Chronology” ‘e Insight on the Scriptures, ne Jihova Uetnes ta fạ‘i.

“AV HIF”

fạu 2,520
fạu 606 1/4 ‘Okotopa 607 M.A.K. se Tisempa 31, 1 M.A.K.		fạu 1,913 3/4 Janueri 1, 1 A.K. se ‘Okotopa 1914
607 “Ma Jerusalem ‘i täla jar‘ȧk sio ‘e lelea‘ Jentaili”	←M.A.K.	A.K.→	1914 “La hele‘ se av het ne ia ne gou hil vȧh”

← Kel se ‘on väe ta