TRA PRENSPARI SANI
1914—Wan prenspari yari na ini Bijbel profeititori
SOMENI tenti yari na fesi, Bijbel ondrosukuman ben e meki bekènti taki prenspari sani ben o pasa na ini 1914. San ben pasa, èn sortu buweisi de di e sori taki 1914 na so wan prenspari yari?
Na ini Lukas 21:24, Yesus taki: "Trakondre sma o masi Yerusalem, teleki a reti ten fu den trakondre sma ["da tem foe dem heiden soema”, Da Bijbel na ini Sranantongo] doro en kaba.” Yerusalem ben de a mamafoto fu a Dyu nâsi èn fu drape ala den kownu di ben de bakapikin fu Kownu David, ben e tiri a kondre (Psalm 48:1, 2). Ma den kownu disi ben de heri tra fasi leki den tiriman fu tra kondre. Den ben e sidon na tapu "a kownusturu fu Yehovah”, leki sma di ben e teki presi gi Gado srefi (1 Kroniki 29:23). Sobun, Yerusalem ben e prenki a tirimakti fu Yehovah.
Ma fa den ’trakondre sma bigin masi’ a tirimakti fu Gado èn o ten den bigin du dati? A sani dati pasa na ini 607 b.G.T., di den Babilonsma teki Yerusalem abra. Nowan sma ben e sidon moro na tapu "a kownusturu fu Yehovah”, èn nowan bakapikin fu David ben e tiri leki kownu moro (2 Kownu 25:1-26). A de so taki den ben o "masi” Yerusalem fu ala ten? Nôno, bika luku san a profeititori fu Esekièl ben taki fu Sedekia, a lasti kownu fu Yerusalem: "Puru na edebanti di de na tapu yu ede, èn puru a kownu-ati…. Seiker a no sa tron fu nowan sma teleki en kon, di abi a reti na tapu, soleki fa wet e taki, èn mi musu gi en dati” (Esekièl 21:26, 27). A sma di abi "a reti” fu kisi a kownu-ati fu David ’leki fa wet ben e taki’, na Krestes Yesus (Lukas 1:32, 33). Sobun, a ’masi di den trakondre sma ben o masi Yerusalem’ ben o kon na wan kaba te Yesus ben tron Kownu.
O ten a prenspari sani dati ben o pasa? Yesus ben taki dati den trakondre sma ben o tiri fu wan spesrutu pisi ten nomo. A tori di skrifi na ini Danièl kapitel 4 e fruteri wi wan prenspari sani di e yepi wi fu kon sabi o langa a pisi ten disi ben o teki. A e taki fu wan dren di Kownu Nebukadnesar fu Babilon ben kisi èn di ben abi fu du nanga wan profeititori. A ben si wan bun bigi bon di sma ben koti trowe. A tompu fu a bon no ben man gro fu di a ben tai nanga wan isri banti èn nanga wan kopro banti. Wan engel ben taki: "Meki seibi ten pasa.”—Danièl 4:10-16.
Na ini Bijbel, bon e prenki tirimakti son leisi (Esekièl 17:22-24; 31:2-5). Sobun, a koti di sma koti na agersi bon trowe, e sori taki wan pisi ten ben o kon pe Gado no ben o abi wan tirimakti fu teki presi gi en, soleki fa den kownu na ini Yerusalem ben e du dati. Ma a fisyun ben sori taki den ’trakondre sma ben o masi Yerusalem’ fu wan pisi ten nomo, namku wan pisi ten fu "seibi ten”. O langa den "seibi ten” de?
Openbaring 12:6, 14 e sori taki dri nanga afu ten, de a srefi leki "wan dusun tu hondro nanga siksitenti dei”. Fu dati ede, den "seibi ten” ben o de tu tron so langa leki dati, sobun 2520 dei. Ma 2520 dei baka di Yerusalem fadon, den trakondre sma no ben tapu ete fu "masi” a tirimakti fu Gado. Sobun, a de krin taki a profeititori disi e taki fu wan moro langa pisi ten. Efu wi luku san skrifi na ini Numeri 14:34 nanga Esekièl 4:6, dan wi musu teri "wan dei fu wan yari”, sobun den "seibi ten” ben o de wan pisi ten fu 2520 yari.
Den 2520 yari ben bigin na ini oktober 607 b.G.T., di den Babilonsma teki Yerusalem abra èn di den puru a bakapikin fu David fu a kownusturu. A pisi ten dati kon na wan kaba na ini oktober 1914. Na a ten dati, "a reti ten fu den trakondre sma” ben kon na wan kaba, èn Gado ben poti Yesus Krestes leki Kownu na ini hemel.* —Psalm 2:1-6; Danièl 7:13, 14.
Neleki fa Yesus ben taki na fesi, dan span sani ben o pasa na grontapu na a pisi ten fu a "denoya” fu en leki Kownu na ini hemel; a ben taki fu sani soleki orloku, angriten, gronseki, nanga takru siki di e kiri ipi-ipi sma (Mateyus 24:3-8; Lukas 21:11). Den sortu sani disi di e pasa, na bigi buweisi di ben sori taki a hemel Kownukondre fu Gado bigin tiri trutru na ini 1914 èn taki "den lasti dei” fu na ogri sistema disi, bigin na ini a yari dati.—2 Timoteyus 3:1-5.
* Fu oktober 607 b.G.T. te go miti oktober 1 b.G.T., na 606 yari. Fu di a yari nul no de, meki oktober 1 b.G.T. te go miti oktober 1914 G.T., na 1914 yari. Te wi e teri den 606 yari nanga den 1914 yari kon na wán, dan wi e kisi 2520 yari. Efu yu wani kon sabi moro fu a pori fu Yerusalem na ini 607 b.G.T., dan luku a pisi di nen "Chronologie” na ini Inzicht in de Schrift, di Yehovah Kotoigi tyari kon na doro.
2520 yari | |||||
---|---|---|---|---|---|
606 1/4 yari oktober 607 b.G.T. te go miti 31 december, 1 b.G.T. | 1913 3/4 yari 1 yanuari, 1 G.T. te go miti oktober 1914 | ||||
607 "Trakondre sma o masi Yerusalem” | ←b.G.T. | G.T.→ | 1914 ’A sma kon di abi a reti na tapu, leki fa wet e taki’ |