I TE fia tausaga mai mua atu i ei, ne folafola atu ei ne tino a‵koga i te Tusi Tapu me ka isi ne mea tāua ‵ki ka ‵tupu i te 1914. Ne a mea konei, kae se a te fakamaoniga me i te 1914 se tausaga tāua ‵ki?

E pelā mo te mea ne tusi ki lalo i te Luka 21:24, ne fai mai a Iesu, penei: “Ka lakalaka Ielusalema ne fenua fakaa‵tea, ke oko ki te taimi e fakataunu ei aso o fenua fakaa‵tea.” A Ielusalema ko te laumua o te fenua ko Iutaia—ko te koga telā ne pule mai i ei a tupu  mai te kāiga o te Tupu ko Tavita. (Salamo 48:1, 2) Kae ne ‵kese a tupu konā mai pule o nisi atufenua. Ne ‵nofo atu latou i te “nofogaaliki” telā ne fai ne Ieova, e pelā me ne sui o te Atua. (1 Nofoaiga Tupu 29:23) Tela la, ne fai a Ielusalema mo fai se fakailoga o te pulega a Ieova.

Ne “lakalaka” pefea te pulega a te Atua “ne fenua fakaa‵tea,” kae ne tupu foki anafea te mea tenā? Ne tupu te mea tenei i te 607 T.L.M. i te taimi ne fakatakavale ei ne te kau Papelonia a Ielusalema. Ne seki toe nofo atu se tupu i te “nofogaaliki” telā ne fai ne Ieova kae ne seki toe ai foki se tino ne fai mo tupu mai te gafā tupu o Tavita. (2 Tupu 25:1-26) E mata, ka tumau eiloa ki te se-gata-mai te ‘lakalakaga’ tenei? Ikai, me ne fai mai te valoaga a Esekielu e uiga ki te ‵toe tupu o Ielusalema, ko Setekaia: “Tapale tou kalauna mo tou pulou laugatu. . . . Ka se tupu mua te mea tenei ke oko ki te taimi e oko mai ei a te tagata telā ko oti ne fili ne au . . . ko tuku atu ei ne au ki a ia.” (Esekielu 21:26, 27) A te tino telā e ‵tau o maua ne ia te “kalauna,” io me ko te foualiki o Tavita ko Keliso  Iesu. (Luka 1:32, 33) Tela la, ka gata atu te ‘lakalakaga’ tenā māfai ko fai a Iesu mo fai te Tupu.

Ne tupu anafea te mea tāua tenā? Ne fakaasi mai ne Iesu me ka isi se gataga ki te vaitaimi e pule mai ei a Fenua Fakaa‵tea. A te tala i te Tanielu mataupu e 4 e fakaasi mai i ei te auala e iloa aka ei te leva o te vaitaimi tenā. E fakamatala mai i ei se moemiti fakavaloaga telā ne maua ne te tupu o Papelonia ko Nepukanesa. Ne lavea ne ia se matugā lakau lasi telā ne ‵kati ki lalo. Ne seki mafai o toe ola aka tena tafito me ne sai ki filifili fiti mo palasi. Ne fakatonu atu se agelu ke tuku loa penā “i tausaga [taimi] e fitu.”—Tanielu 4:10-16.

E fakauiga i nisi taimi a lakau i te Tusi Tapu ki pulega. (Esekielu 17:22-24; 31:2-5) Tela la, a te ‵katiga ki lalo o te lakau fakatusa tenā e fakauiga ki te auala ne taofi aka ei te pulega a te Atua, telā e fakaata mai i tupu i Ielusalema. Kae e lavea atu i te moemiti tenā me i te ‘lakalakaga o Ielusalema’ ka se tumau—kae ka fai fua i se vaitaimi o ‘taimi e fitu.’ E pefea te leva o te vaitaimi tenā?

E fakaasi mai i te Fakaasiga 12:6, 14 me e ‵pau te tolu mo te āfa taimi mo “aso e afe lua selau ono sefulu.” Tela la, a ‘taimi e fitu’ e sili fakalua atu i te aofaki tenā, io me ko te 2,520 aso. Kae ne seki gata atu te ‘lakalakaga’ ne fenua fakaa‵tea a te pulega a te Atua mai tua ifo fua o aso e 2,520 i te otiga ne fakatakavale a Ielusalema. E fakamaoni mai i ei, me e leva atu te taimi telā e aofia i te valoaga tenei. E ‵tusa mo te Numela 14:34 mo te Esekielu 4:6, ‘a aso konā e ‵fuli ki tausaga,’ ko tena uiga, a ‘te fitu taimi’ ko tausaga e 2,520.

Ne kamata o lau aka a tausaga e 2,520 i a Oketopa i te 607 T.L.M., i te taimi ne fakatakavale ei a Ielusalema ne te kau Papelonia kae ne tapale i ei te gafā tupu o Tavita mai tena nofogaaliki. Ne gata atu te vaitaimi tenā i a Oketopa i te 1914. I te taimi tenā, ne gata atu ei a “aso o fenua fakaa‵tea,” kae ne fakasopo aka ei a Iesu mo fai te Tupu faka-te-lagi a te Atua. *—Salamo 2:1-6; Tanielu 7:13, 14.

 E pelā eiloa mo mea kolā ne ‵valo mai ne Iesu, ko oti ne fakamailoga tena fakatasi mai pelā me ko te Tupu i te lagi i mea fakama‵taku kolā e ‵tupu i te lalolagi nei—ko taua, ogegā meakai, mafuie, mo masaki ‵pisi. (Mataio 24:3-8; Luka 21:11) E tuku mai eiloa ne vaegā fakalavelave penā a fakamaoniga ‵tonu me i te 1914 ko te tausaga ne kamata o fakatu aka ei te Malo o te Atua i te lagi kae ko te kamataga foki tenā o “aso fakaoti” o te olaga masei tenei.—2 Timoteo 3:1-5.