TE TAHI ’U FAKAMAHINO
Ko Te Ta’u 1914—Ko Te Ta’u Ma’uhiga ’i Te Lea Faka Polofeta ’o Te Tohi-Tapu
IA TA’U e fagofulu ia mu’a ’o te ta’u 1914, ne’e tala e te kau ako Tohi-Tapu, ’e hoko anai te ’u me’a ma’uhiga ’i te ta’u 1914. Ne’e koteā te ’u me’a ma’uhiga ’aia, pea koteā ’aē ne’e ina fakamo’oni ko te ta’u 1914 ne’e ko te ta’u ma’uhiga?
Iā Luka 21:24 (MN), ne’e ’ui e Sesu: “’E molomoloki anai ia Selusalemi e te ’u pule’aga, ’o a’u ki te ’osi fakahoko ’o te ’u temi ’aē kua fakakatofa ki te ’u pule’aga.” Ko Selusalemi ne’e ko te kolo taulaga ’o te pule’aga Sutea—te nofo’aga ’o te kau takitaki ’o te ’u hōloga hau ’aē ’e ha’u mai ia Tavite. (Pesalemo 48:1, 2) Kae ko te ’u hau ’aia ne’e mole nātou tatau mo te kau takitaki ’o te ’u pule’aga. Ko te ’u hau ’aia ne’e nātou heheka ’i te “heka’aga faka hau ’o Sehova” mo’o fakafofoga ia te ’Atua. (1 Fakamatala 29:23) Koia, ne’e fakatātā e Selusalemi ia te takitaki ’a Sehova.
Kae ko te takitaki ’a te ’Atua ne’e kamata ‘molomoloki e te ’u pule’aga’ ’i te temi fea, pea ne’e hoko feafea’i? Ne’e hoko ’i te ta’u 607 ’i mu’a ’o totatou temi, ’i te temi ’aē ne’e ’ohofi’i ai ia Selusalemi e te kau Papiloni. Ne’e mole kei ’i ai he tahi ne’e nofo ’i te “heka’aga faka hau ’o Sehova” pea ne’e mole kei ’i ai he hau mai te hōloga ’o Tavite. (2 Hau 25:1-26) ’E hoko anai ’o talu ai ia te “molomoloki” ’aia? Kailoa, he’e ’ui ’i te lea faka polofeta ’a Esekiele ’o ’uhiga mo Setesiasi te hau fakamuli ’o Selusalemi: “To’o te ha’i ’o tou ulu, pea to’o te kolona.…’E mole toe hili anai ki he tahi age ’o a’u ki te ha’u ’o ia ’aē ’e feala ke ina ma’u, pea ’e au foaki age anai ki ai.” (Esekiele 21:26, 27) Pea ne’e ko Kilisito Sesu ’aē “[ne’e] feala ke ina ma’u” te kolona hau ’o Tavite. (Luka 1:32, 33) Koia ko te “molomoloki” ne’e fakagata ’i te temi ’aē ne’e fakanofo Hau ai ia Sesu.
Ne’e hoko ’anafea ia te ’alu’aga ma’uhiga ’aia? Ne’e fakahā e Sesu ko te kau Senitile ’e nātou pule anai ’o a’u ki te temi ’aē kua fakakatofa. ’E tou ma’u ’i te kapite 4 ’o Taniela te ’u fakamahino pe’e ko temi e fia te loaloaga ’o te temi ’aia. ’E talanoa ai ki te moemisi faka polofeta ne’e fai e Nepukanesa te Hau ’o Papiloni. Ne’e sio ki te fu’u ’akau lahi ne’e tu’usi. Ko tona tāfito ne’e mole toe homo he ne’e ha’iha’i ’aki te ukamea pea mo te kapa. Pea ne’e ’ui fēnei e te ’āselo: “Ke fakalaka he ’u temi e fitu kiā te ia.”—Taniela 4:10-16.
’I te Tohi-Tapu, ’e tautau faka’aoga’i te ’u fu’u ’akau mo’o fakatā te takitaki. (Esekiele 17:22-24; 31:2-5) Koia ko te tu’usi ’o te fu’u ’aka’u, ’e ina fakatā te fakagata ’o te takitaki ’a te ’Atua ’aē ne’e fakafofoga e te ’u hau ’o Selusalemi. Kae ne’e hā ’i te moemisi ’aia ko te ‘molomoloki ’o Selusalemi’ ’e faka temi pe anai—he’e hoko lolotoga “temi e fitu.” E feafea’i te loaloaga ’o te ’u temi ’aia?
Iā Apokalipesi 12:6, 14, ’e ’ui ai ko temi e tolu vaelua ’e ko “aho e afe lua geau onogofulu.” Koia, ko “temi e fitu” ’e tu’a lua anai tona loaloaga, pe’e ko ’aho e 2 520. Kae ko te ’u pule’aga Senitile ne’e mole gata pe tanatou “molomoloki” te takitaki ’a te ’Atua ia ’aho e 2 520 ’i te ’osi faka’auha ’o Selusalemi. ’E mahino mai, ko te lea faka polofeta ’aia ’e loaloaga age. Iā Faka au 14:34 pea mo Esekiele 4:6, ’e ’ui ai ko “he ’aho e tahi ’e ko te ta’u kātoa,” koia ko “temi e fitu” ’e ko ta’u anai e 2 520.
Ko te ’u ta’u e 2 520 ne’e kamata ’i ’Oketopeli 607 ’i mu’a ’o totatou temi, ’i te temi ’aē ne’e faka’auha ai ia Selusalemi e te kau Papiloni pea ne’e fakahifo ai te hau ’o te hōloga ’o Tavite. Ne’e ’osi te temi ’aia ’i te māhina ’o ’Oketopeli 1914. ’I te temi ’aia, ne’e faka’osi ai “te ’u temi ’aē kua fakakatofa ki te ’u pule’aga,” kae fakanofo e te ’Atua ia Sesu Kilisito ko te Hau ’i te lagi.*—Pesalemo 2:1-6; Taniela 7:13, 14.
Ohage ko tona fakakikite e Sesu, ne’e faka’iloga tana “’i henī” ’i tona ’uhiga Hau ’i selo, ’aki te ’u fetogi fakamataku ’aē ne’e hoko ’i te malamanei—te tau, te hoge, te ’u mafuike, te ’u ta’i mahaki. (Mateo 24:3-8, MN; Luka 21:11) Ko te ’u fetogi ’aia ’e ko he fakamo’oni lahi ko te ta’u 1914 ne’e ina faka’iloga te fakatu’u ’o te Pule’aga ’o Te ’Atua ’i selo, pea mo te kamata’aga ’o “te u aho fakamuli” ’o te tu’u agakovi ’o te ’u fa’ahiga me’a ’aenī.—2 Timoteo 3:1-5.
* Mai te māhina ’o ’Oketopeli 607 ’i mu’a ’o totatou temi ’o a’u ki te ’uluaki ’aho ’o ’Oketopeli ’i mu’a ’o totatou temi, ’e ko ta’u e 606. Mai tona ’alu’aga ’aē ’e mole ’i ai he ta’u selo, ’e ko ta’u e 1914 mai te ’uluaki ’aho ’o ’Oketopeli ’i mu’a ’o totatou temi ’o a’u ki te māhina ’o ’Oketopeli 1914. Ka tou fakatahi’i te ’u ta’u e 606 pea mo te ’u ta’u e 1914, ’e tou ma’u ko ta’u e 2 520. Kapau ’e koutou fia ma’u he tahi ’u fakamahino ’o ’uhiga mo te faka’auha ’o Selusalemi ’i te ta’u 607 ’i mu’a ’o totatou temi, vaka’i te alatike “Chronologie” ’i te tohi Étude perspicace des Écritures, ne’e tā e te kau Fakamo’oni ’a Sehova.
Ko ta’u e 2 520 | |||||
---|---|---|---|---|---|
Ko ta’u e 606 pea mo māhina e tolu ’I ’Oketopeli 607 ’i mu’a ’o totatou temi ’o a’u ki te ’aho 31 ’o Tesepeli, ’o te ta’u 1 ’i mu’a ’o totatou temi | Ko ta’u e 1 913 pea mo māhina e hiva ’I te ’aho 1 ’o Sānualio, ’o te ta’u 1 ’o totatou temi ’o a’u ki te māhina ’o ’Oketopeli 1914 | ||||
607 “’E molomoloki anai ia Selusalemi e te ’u pule’aga” ![]() | ←’I MU’A ’O TOTATOU TEMI | ’O TOTATOU TEMI→ | 1914 “Ki te ha’u ’o ia ’aē ’e feala ke ina ma’u” ![]() |