KADIRINY efapolo taon̈o tsy haviany taon̈o 1914, pianatra Baiboly aby io efa nan̈ambara fa ho hisy raha maventy handalo amy taon̈o io. Ino ma raha zen̈y? Ino ahaizan̈a fa miavaka ankitin̈y taon̈o 1914 io?

Karaha ty nambarany Jesosy, amy Lioka 21:24: “Jerosalema hitsahindro firenena hafa aby io firaka fotoan̈a voatondro nindro firenena hafa io tapitry.” Jerosalema io renivohitry firenena jiosy ndreky foibeny fitondrasan̈a panjaka taranaka Davida. (Salamo 48:1, 2) Niavaka panjaka aby io, fotony iro namandraha nipetraka tamy “seziny Panjaka Jehovah.” Iro io tamy zen̈y solonten̈any Jehovah tambony tany teto. (1 Tantara 29:23) Dikanizen̈y, Jerosalema io ivolan̈ana fitondrasan̈a Jehovah.

 Karakory fo ‘nan̈itsahany firenena’ fitondrasan̈a Zan̈ahary? Ombian̈a ma raha zen̈y nandalo? Izikoa fa resiny Babylonianin̈y Jerosalema, tamy taon̈o 607 T.K., tsisy pitondra eky tamy “seziny Panjaka Jehovah”, ke tamy zen̈y nitsahatra fitondrasan̈a panjaka taranaka Davida. (2 Mpanjaka 25:1-26) Hitohy mandrakizay ma ‘fan̈itsahan̈a’ io? Tsy zen̈y, fotony karaha ty nambarany paminan̈y Ezekiela momba Zedekia, panjaka farany ta Jerosalema: ‘Adosoa satrokampanjaka, adosoa satroboninahitry... Tsisy olo hahazo raha zen̈y, mandrapaviany araiky manan̈a zo aradalàn̈a hahazo zen̈y, ke izio hamiako izy.’ (Ezekiela 21:26, 27) Tsy azovy “araiky manan̈a zo aradalàn̈a” io fa Kristy Jesosy. Izy manan̈a zo hipetraka amy seziny panjaka Davida io. (Lioka 1:32, 33) Tapitry ‘fan̈itsahan̈a’ io, Jesosy koa fa nanjary Panjaka.

Ombian̈a ma raha jiaby zen̈y nandalo? Nambarany Jesosy mazava fa ho voafetra fotoan̈a hanjakany firenena hafa aby  io. Daniela toko faha-4 man̈ampy atsika hahay halavasany fotoan̈a io. Voatantara ao fa Nebokadnezara panjakany Babylony nan̈inofy raha mbala ho avy. Izy nahita kakazo maventy be maniry nitapahin̈y. Fototro kakazo io tsy nitombo eky, fotony nasian̈a fehy vy ndreky varahin̈y. Misy anjely araiky nivolan̈a karaha ty: ‘Fetrandra fito lanin̈y aminany.’—­Daniela 4:10-16.

Ndraikindraiky Baiboly koa fa mikoran̈a momba kakazo zen̈y, fitondrasan̈a raha tiany volan̈iny. (Ezekiela 17:22-24; 31:2-5) Dikanizen̈y, fanapahan̈a kakazo tamy nofy in̈y man̈ambara fa hatsahatra antsendriky fitondrasan̈a Zan̈ahary ambony tany, ke tsy ho hisy panjaka hisolo ten̈a izy eky a Jerosalema. Hita baka amy raha hitany Daniela io koa fa ‘fan̈itsahan̈a Jerosalema’ io tsy handilatra “fetrandra fito.” Firy andra ma zen̈y?

Koran̈iny Apokalypsy 12:6, 14 fa fetrandra telo sy tapany mahadin̈y “arivo roanjato tsiotapolo” andra. Indroenizen̈y fetrandra fito. Dikanizen̈y, fetrandra fito man̈amia 2 520 andra. Mbala ‘nan̈itsaka’ fitondrasan̈a Zan̈ahary iro firenena hafa aby io tamy 2 520 andra tafarany naharesy Jerosalema. Zen̈y mivolan̈a fa mbala mahadin̈y elaelanizen̈y fetrandra fito io. Izikoa arehan̈a raha koran̈iny Nomery 14:34 ndreky Ezekiela 4:6, ke andra araiky soloan̈a taon̈o araiky, “fetrandra fito” io mahadin̈y 2 520 taon̈o.

Taminy Oktobra 607 T.K. nanomboko 2 520 taon̈o io. Jerosalema tamy zen̈y resiny Babylony, ke panjaka farany amy taranaka Davida nadoso tamy fitondrasan̈anany. Tapitry taminy Oktobra 1914 fotoan̈a voatondro io. Nataony Zan̈ahary Panjaka tandan̈itry tan̈y Jesosy Kristy tamy taon̈o io, ke tapitry “fotoan̈a voatondro nindro firenena hafa aby io.” *—Salamo 2:1-6; Daniela 7:13, 14.

 Jesosy efa nan̈ambara fa izy koa fa avy “fan̈atrehany” amy maha Panjaka izy andan̈itry an̈y, ho maro ‘antambo’ hiboaka. An̈atinizen̈y ady, mosary, horohorontany ndreky aretin̈y mamono. (Matio 24:3-8; Lioka 21:11) Zen̈y mivolan̈a fa tamy taon̈o 1914 io ankitin̈y Jesosy nanjary Panjaka tandan̈itry tan̈y, ke nanomboko tamy zen̈y koa ‘andra farany’ amy donia ratsy ty.—2 Timoty 3:1-5.