(APÉNDICE) NI ZEEDA LU RIʼ
1914: iza nabé risaca ni zeeda lade ca diidxaʼ ni na Biblia chigaca
CAADXI binni ni cayuundaʼ Biblia guniʼcaʼ biaʼ cuarenta iza ante de 1914 xi guiráʼ nga zazaaca lu iza que. Xii nga chiguizaaca yaʼ. Xi culuíʼ nabé risaca iza 1914 que yaʼ.
Lu libru stiʼ Lucas 21:24 cá caadxi diidxaʼ stiʼ Jesús: «Zutu ñee cani cadi judíu guidxi Jerusalén biaʼ dxi udii Dios lugar laacaʼ». Jerusalén nga guca capital stiʼ xquidxi ca judíu. Dede raqué nga biʼniʼ mandar caadxi rey ni zeeda de familia stiʼ David (Salmo 48:1, 2). Gadxepeʼ guca ca rey que de ca xaíque stiʼ xcaadxi guidxi que, purtiʼ gurícabe «lu trono stiʼ Jiobá» ne biʼniʼ mandárcabe casi ñaca Dios ñuni ni (1 Crónicas 29:23). Ngue runi, Jerusalén que casi ñaca laani nga gobiernu stiʼ Jiobá.
Yanna, ximodo nga bizulú ca guidxi que bituñeecaʼ gobiernu stiʼ Dios ne padxí guca ni yaʼ. Bizaaca ni lu iza 607 ante gueeda Jesús (a.J.), dxi binitilú ca binni de Babilonia guidxi Jerusalén. Guirútiruʼ nibí lu «trono stiʼ Jiobá» ne laaca maʼ que nibí nin tobi de cani zá de David casi rey (2 Reyes 25:1-26). Ñee qué ziuu dxi gusaana de gutuñeecabe Jerusalén la? Ziuu pue, purtiʼ lu libru stiʼ Ezequiel cá xi chigaca. Jiobá gudxi Sedequías últimu rey stiʼ guidxi que ca diidxaʼ riʼ: «Gulee lari nuu íqueluʼ ca ne guxha corona ca. [...] Guirutiʼ zaca stini dede ora gueeda ni napa derechu guicaa ni, ne zudieeʼ ni laa» (Ezequiel 21:26, 27). «Ni napa derechu» guiaanané corona stiʼ David que nga Jesucristu (Lucas 1:32, 33). Nga runi, maʼ qué ñutuñeecabe Jerusalén dxi guca Jesús rey.
Padxí bizaaca nga yaʼ. Jesús guníʼ maca nexheʼ pabiáʼ dxi guni mandar cani cadi naca judíu. Capítulo 4 stiʼ Daniel racané laanu gánnanu pabiáʼ zandaa ni. Luni rieeteʼ ti bacaandaʼ ni gupa ti rey láʼ Nabucodonosor de ni chiguizaaca despué. Lu bacaandaʼ riʼ biiyabe cusábacabe ti yaga nabé nasoo. Ne bindiibicabe guiibaʼ ne cobre ñee yaga ni bisaanacabe que, ti maʼ cadi igaani. De raqué guníʼ ti ángel: «Tiidiʼ gadxe tiempu luguiáʼ ni» (Daniel 4:10-16).
Nuu tiru ruzeeteʼ Biblia ca gobiernu ca casi ti yaga (Ezequiel 17:22-24; 31:2-5). Nga runi, ra bigá yaga que la? riníʼ ni ziaanadxí Dios de guni mandar, o de cuí ca rey stibe Jerusalén. Peru visión que laaca na zusaana de «[g]utu ñee[cabe] [...] Jerusalén» ne «gadxe tiempu» si nga zutuñeecabe ni. Pabiaʼpeʼ nga zandaa ni yaʼ.
Apocalipsis 12:6, 14 caníʼ chonna tiempu arondaʼ nga «ti mil chupa gayuaa sesenta dxi». Nga runi, «gadxe tiempu» ca zandaa ni: 2,520 dxi. Peru ra bizaa 2,520 dxi que la? qué nusaana ca guidxi ni cadi naca judíu que de ñutuñeecaʼ gobiernu stiʼ Dios despué de binitilú Jerusalén. Nga ruluíʼ jma zandaa ca tiempu ni guníʼ Daniel que. Pa guyúbinu lu Biblia Números 14:34 ne Ezequiel 4:6 la? zadúʼyanu gudíxhecabe igabaʼ «ti dxi pur ti iza». Yanna, pa ugábanu «gadxe tiempu» ca modo gudíxhecabe ni ca la? rizaa ni 2,520 iza.
Lu octubre stiʼ iza 607 a.J. bizulú 2,520 iza ca —dxi binitilú ca binni de Babilonia Jerusalén ne gundísacaʼ rey ni zeeda de David que lu trono— ne biluxe ni lu octubre stiʼ iza 1914. Dxi que nga bizaa dxi bidii Dios lugar ca guidxi ni cadi naca judíu gutuñeecaʼ xquídxibe ne dxiqué nga bicuí Dios Jesucristu casi Rey guibáʼ (Salmo 2:1-6; Daniel 7:13, 14). *
Guníʼ Jesús zazaaca stale cosa ni qué huahuinni ora mayaca gueeda, casi guendaridinde, guendarindaana, xu ne guendahuará (Mateo 24:3-8; Lucas 21:11). Ne zacá huayaca ni. Guiráʼ ni cazaaca riʼ cusihuinni cani iza 1914 nga bizulú Rey stiʼ Dios cayuni mandar guibáʼ ne bizulú ca últimu dxi stiʼ guidxilayú qué iquiiñeʼ riʼ (2 Timoteo 3:1-5).
^ párrafo 4 De octubre iza 607 a.J. dede octubre 1 a.J. maʼ gudiʼdiʼ 606 iza. Cumu gastiʼ iza cero la? de octubre 1 a.J. dede octubre iza 1914 despué de Jesús (d.J.) biaʼsi maʼ gudiʼdiʼ 1,914 iza. Yanna pa ugábanu 606 ne 1,914, biaʼsi rudii ni laanu 2,520 iza. Pa racaláʼdxiluʼ gúʼyaluʼ xcaadxi ra caníʼ dxandíʼ binitilú Jerusalén lu iza 607 a.J. la? biyubi lu Perspicacia para comprender las Escrituras, stiʼ ca testigu stiʼ Jiobá ra na «Cronología».
