AOLIA nun sran mɔ be flɛ i Misɛli’n, Biblu’n bomɛn i dunman’n kpɛ sunman. Sanngɛ, kɛ Biblu’n kɛ́n i ndɛ’n, nn ɔ su di junman. Daniɛl fluwa nun’n, Misɛli nin mmusu kun be kun alɛ. Zid fluwa nun’n, ɔ nin Satan be si akplowa. Kpɛkun, Sa Nglo Yilɛ fluwa nun’n, ɔ fa alɛ wla Satan nin i mmusu’m be sin. Kɛ mɔ Misɛli jran Zoova i famiɛn dilɛ’n i sin’n, m’ɔ nin Ɲanmiɛn i kpɔfuɛ’m be kun alɛ’n ti’n, i sɔ’n kle kɛ like nga i dunman’n kle’n, i su yɛ ɔ nian nanti ɔ. I dunman’n i bo’n yɛle “?Wan yɛ ɔ ti kɛ Ɲanmiɛn sa ɔ?” ?Sanngɛ yoo, wan yɛ be flɛ i Misɛli’n niɔn?

Ɔ ju wie’n, be kwla fa dunman nɲɔn be flɛ sran kun. I wie yɛle sran oke Zakɔbu mɔ be flɛ i ekun kɛ Izraɛli’n, ɔ nin akoto Piɛli mɔ be flɛ i ekun kɛ Simɔn’n. (Bo Bolɛ 46:8; Matie 10:2) I kunngba’n, Biblu’n kle kɛ kwlaa naan Zezi Klist w’a ba asiɛ’n su wa’n, kpɛkun kɛ ɔ wuli m’ɔ sɛli i sin ɲanmiɛn su lɔ’n, i dunman nga be fa flɛ i’n yɛle Misɛli. Maan e nian Biblu’n nun ndɛ mma nga ti yɛ e kwla se sɔ’n.

Anzi kpɛnngbɛn. Ɲanmiɛn Ndɛ’n kan ‘anzi kpɛnngbɛn,’ Misɛli’n i ndɛ. (Zid 9) Sie i nzɔliɛ kɛ, kɛ Biblu’n kán ‘anzi kpɛnngbɛn’ Misɛli i ndɛ’n, Biblu’n w’a seman kɛ “anzi kpɛnngbɛn mun.” Sanngɛ ‘anzi kpɛnngbɛn’ kunngba cɛ i ndɛ yɛ Biblu’n kan ɔn. Asa ekun’n, ɲrun nga anzi kpɛnngbɛn’n le i’n, Zezi yɛ be fa sunnzun i ɔ. E Min Zezi Klist mɔ Ɲanmiɛn cɛnnin i’n, i ndɛ nga 1 Tɛsalonikfuɛ Mun 4:16 kan’n yɛ: “E Min’n bɔbɔ fin ɲanmiɛn su lɔ su jra, ɔ nin kpanlɛ dan, ɔ nin anzi kpɛnngbɛn’n  i aniɛn’n, NW.” Ɔ maan, be se kɛ Zezi i nɛn’n yɛle anzi kpɛnngbɛn’n i nɛn’n. I sɔ ti’n, Biblu’n nun ndɛ mma ngalɛ’n kle kɛ Zezi bɔbɔ yɛ ɔ ti anzi kpɛnngbɛn mɔ be flɛ i Misɛli’n niɔn.

Alɛ kunfuɛ’m be su kpɛn’n. Biblu’n se kɛ: ‘Misɛli nin i anzi mun be nin dragɔn nin i anzi mun be kunnin.’ (Sa Nglo Yilɛ 12:7). Ɔ maan, Misɛli ti anzi nanwlɛfuɛ kpanngban be su kpɛn’n. Sa Nglo Yilɛ fluwa’n kle ekun kɛ Zezi ti anzi alɛ kunfuɛ nanwlɛfuɛ kpanngban be su kpɛn. (Sa Nglo Yilɛ 19:14-16) Kpɛkun akoto Pɔlu kannin ‘e Min Zezi’ nin ‘i anzi mɔ be le fanngan dan’n,’ be ndɛ. (2 Tɛsalonikfuɛ Mun 1:7) Ɔ maan, Biblu’n kan Misɛli nin ‘i anzi mun’ ɔ nin Zezi nin ‘i anzi mun’ be ndɛ. (Matie 13:41; 16:27; 24:31; 1 Piɛr 3:22) Ɲanmiɛn Ndɛ’n seman lika fi kɛ, ɔ le anzi alɛ kunfuɛ nanwlɛfuɛ akpasua nɲɔn ɲanmiɛn su lɔ, naan Misɛli ti akpasua kun su kpɛn kpɛkun Zezi ti akpasua kun ekun su kpɛn. I sɔ ti’n, ɔ ti weiin kɛ, kɛ Zezi Klist o ɲanmiɛn su lɔ’n, dunman Misɛli’n yɛ be fa flɛ i ɔ. *