APPENDICE
Za a ne Archange Michel?
ÉTÉTÉA é ne nsisime ba loene na Michel é nji toteban abui biyoñe Kalate Zambe été. Ve éyoñ a kobô ajô dé, a liti nye a bo’o jôm éziñ. Kalate Daniel été, Michel a juan a mbia beange; e kalate Jude, ba Satan ba sañetan; e kalate Nlitan, ba Diable a mimbia minsisime mié ba bo bita. Asu na a kaman éto njô Yéhôva, a bo bita a besiñe be Zambe, Michel a bo mam éyoñe te fo’o ve ane éyôlé jé ja tinan—“Za a ne ane Zambe?” Ve za a ne Michel?
E wô’ô kui na môte wua a bi abui biyôlé. Bi tame nyoñ éve’an, Jacob a mbe fe jôé na Israël; nlômane Pierre a mbe a bili éyôlé éfe na Simon. (Metata’a 49:1, 2; Matthieu 10:2) Avale te fe, Kalate Zambe a liti na Michel a ne éyôlé Yésus Krist éfe, ôsusua na a zu si, a éyoñ a nga bulane yôp. Bi tame zu nyoñe b’amu béziñ Mintilan été ba bo na bi jô na nne é ne nalé.
Archange. Kalate Zambe a loene Michel na ‘archange.’ (Jude 9) Éfia te ja tinane na “Njô beange.” E Kalate Zambe ô bili, ba loene nye na “beta ange,” sa ke ‘beta beange.’ Nalé ate a bo na bi fase na fo’o ve éngele wua nye a ne nkôñe te. Ô ne jeñe Kalate Zambe ase, teke na wo ye yen éfia ‘bearchange,’ nge ki ‘bejôé beange’ vôm éziñ. Nge ô vaa nalé, ésaé archange, nge ki njô beange é tii a Yésus. Kalate 1 Bethessalonicien 4:16 a jô mfa’a ya Tate Yésus Krist a nga wômô miñwuane na: “Tate émien a ye sis a so’o yôp, a beta nloen, a tyiñ ya [archange, NW].” Vôme nyi, tyiñe Yésus é ne ane nyi archange. Efuse te ja bo fe bi fase na Yésus émien nye a ne archange Michel.
Njôé nkane bita. Kalate Zambe a jô na “Michel ba be beange bé be nga ke wosane dragon ate . . . ba be beange bé.” (Nlitan 12:7) Nalé ate a liti na Michel a ne Njô ya nkane bita bezôsô beange. Nlitan fe a kobô ajô Yésus a liti’i na a ne Njôô ya nkane bita bezôsô beange. (Nlitan 19:14-16) Nlômane Paul fe a nga yene “Tate Yésus” a “Beange ya ngule jé.” (2 Bethessalonicien 1:7) Ajô te Kalate Zambe a kobô ajô ya Michel a “beange ya ngule jé” a Yésus a “beange bé.” (Matthieu 13:41; 16:27; 24:31; 1 Pierre 3:22) Ve mbôle Kalate Zambe a nji liti vôm éziñe na minkane bita bezôsô beange mibaé mi ne yôp—Michel a wulu’u a wua, Yésus ki a wulu’u a wu vok—nde bia suu vôme nyi na Michel a nji bo môte mfe, a ne Yésus; a yôban éyôlé te éyoñ a bo bisaé bia fombô mame ya yôp. *
^ É.N. 1 Nge wo kômbô yeme mam mefe ma liti na Michel a ne éyôlé Mon Zambe, kele lañ volume 2, afep 280-1, ya Étude perspicace des Écritures, Bengaa be Yéhôva be nga tili.
