TIDAN Bíbülia fiúrügüñein bérusu le ñein lubéi lagúarua Migeli lun somu sífiri gürigia. Ani lidan súngubei súnwandan láfuachun adüga somu katei. Tidan liliburun Danieli, lageindaguña hama ánheligu wuribatiña, tidan ligaradan Húdasi, lasigenehaña luma Mafia, tidan líburu Arufudúni lawuribuhaña kóntüra Satanási hama lumáfianu. Le linarün aban katei, súnwandan lageindagun luéigiñe lilurudun Heowá kei Urúei ani awuribuhati hama laganiñu Bungiu. Ítara liña líchugun inebesei lun liri, mini lan iri ligía “Ka Ítarabei Kei Bungiu?”. Gama lumoun, ka Migelibei?

Furumiñe, haritagua wamá añahein lan gürigia mámarügüñein aban hiri. Kei burí Hakobu le meha lichügüdina aban óunwenbu familia, subudiwati kei Ísüraeli ani apostolu Féduru, kei Simón (Agumesehani 49:1, 2; Matéu 10:2). Ítarameme, anihein adundehani tidan Bíbülia luagu Migeli lan amu iri leresibirun Hesusu dandu lubaragiñe kei lárigiñe liabin ubouagun. Ariha waméi ka burí lan resun wadarirubei tidan Bíbülia lun wachülürün lidoun saminaü le.

Arükánheli. Arufuda tumuti Bíbülia Migeli kei “arükánheli” (Húdasi 9). Mini lan dimurei le “hábuti ánheligu”. Ariha wamuti wawati lan lun Migeli arükánheli, afuranguagüdati le, ábanrügüñein lan hádangiñe ánheli ha. Le linarün aban katei, mayusu tumuti Bíbülia dimurei “arükánheli” houn bandi ánheligu, súnwandan lúnrügüñein lan aban tayusurei. Adimurehouati giñe luagu Hesusu adügei luadigimari arükánheli. Arufudúati le lunbei ladügüni Hesukrístu lárigiñe láguyugun: “Larariruba Aburemei siélugiñe lau aban agúaraguni, lau lumalali arükánheli” (1 Tesalónikana 4:16, RVA). Ariñagati bérusu  le, ladimurehaba lan Hesusu lau lumalali arükánheli. Ligíati, afuranguagüdati luagu Hesusu guánarügü lan arükánhelibei Migeli.

Gumadan. Ariñagatu Bíbülia “ageindaguati lan arükánheli Migeli hau lani ánheligu luma düragón hau lani ánheligu” (Arufudúni 12:7). Menefánti Migeli lan gumadanbei houn saragu ánheligu ha úaraguabaña. Arufuda tumuti líburu Arufudúni Hesusu kei Gumadan lani aban sétanu ánheligu úaraguatiña (Arufudúni 19:14-16). Adimurehati giñe apostolu Pábulu luagu “Wabureme Hesusu [...] hau lani ánheligu ha gabafubaña” (2 Tesalónikana 1:7). Ítara liñati adimureha tan Bíbülia dandu luagu Migeli hau “lani ánheligu” kei luagu Hesusu hau “lani ánheligu” (Matéu 13:41; 16:27; 24:31; 1 Féduru 3:22). Mariñaguntu Bíbülia lidan ni aban bérusu añahein lan biama sétanu ánheligu úaraguatiña, aban lalidihan Migeli, aban lalidihan Hesusu. Ligíati, garichatiwa lun wasaminarun luagu Hesusu lan Migelibei adügei luadigimari sielu. *