LABIB pa mansyonn souvan sa lespri ki apel Misel. Me kan i mansyonn li, i dekrir li pe fer aksyon. Dan liv Danyel, Misel pe konbat avek bann move lanz; dan let Zid, i dan en diskisyon avek Satan; e dan Revelasyon, i pe lager avek Dyab ek son bann demon. Sa non Misel i vedir, “Lekel ki parey Bondye?” Misel i viv an akor avek son non par defann dominasyon Zeova e lager avek Son bann lennmi. Me lekel li Misel?

I annan dimoun ki lezot i konn zot par de non. Par egzanp, Zakob ti osi apel Izrael, e zapot Pyer ti osi apel Simon. (Zenez 49:1, 2; Matye 10:2) Labib i endike ki Misel i en lot non pour Zezi Kri, avan i ti vin lo later e apre ki i ti mont dan lesyel. Annou vwar bann rezon dan Labib ki fer nou tonm lo sa konklizyon.

Sef Lanz. Parol Bondye i dir Misel i “sef lanz.” (Zid 9) Sa mo ‘sef lanz’ oubyen ‘arkanz’ i toultan aparet an sengilye dan Labib, i pa zanmen an pliryel. Savedir i annan zis enn sa kalite lanz. Deplis, Zezi i ganny asosye avek pozisyon en sef lanz. Dan 1 Tesalonisyen 4:16, i dir sa konsernan Zezi Kri apre ki i ti’n resisite: “Avek lavwa en arkanz, e avek son  tronpet Bondye, Senyer limenm pou desann sorti dan lesyel.” Lavwa Zezi i ganny dekrir parey lavwa en arkanz. Sa pasaz Labib i montre alor ki Zezi li menm i sa sef lanz oubyen arkanz ki apel Misel.

Sef Larme. Labib i dir ki ‘Misel avek son bann lanz ti lager kont dragon . . . avek son bann lanz.’ (Revelasyon 12:7) Alors, Misel i Sef en larme lanz fidel. Revelasyon i osi dekrir Zezi konman Sef en larme lanz fidel. (Revelasyon 19:14-16) Zapot Pol osi ti mansyonn “Senyer Zezi” ek “son bann lanz pisan.” (2 Tesalonisyen 1:7; Matye 16:27; 24:31; 1 Pyer 3:22) Alors Labib i koz lo tou le de, Misel ek “son bann lanz” e Zezi ek “son bann lanz.” (Matye 13:41) Napa okenn landrwa dan Labib ki endike ki i annan de group larme lanz fidel dan lesyel, enn dirize par Misel e lot par Zezi. Alor i fer sans pour konklir ki Misel i li menm li Zezi Kri dan son rol dan lesyel. *