YAʼ ti Biblia an jach chaʼpʼejl uxpʼejl texto baqui miʼ subentel Miguel juntiquil ángel. Pero ti jiñi texto tac baqui miʼ yʌjlel, tiʼ pejtelel ora an chuqui woli i mel. Yaʼ ti libro i chaʼan Daniel mi yʌl chaʼan Miguel yʌquel ti guerra yicʼot jontol bʌ ángelob. Jiñi carta i chaʼan Judas mi yʌl chaʼan woliʼ contrajin Diablo, i yaʼ ti Apocalipsis (o Revelación) mi yʌl chaʼan woli ti guerra yicʼot Satanás yicʼot i xibajob. Tiʼ pejtelel ora miʼ chaʼlen guerra tiʼ tojlel i contrajob Dios come miʼ qʼuel Jehová bajcheʼ Rey. Cheʼ bajcheʼ iliyi, miʼ yʌcʼ ti qʼuelol ti ñuc i cʼabaʼ, yom bʌ i yʌl «¿Majqui lajal bʌ bajcheʼ Dios?». Cheʼ jiñi, ¿majqui jiñi Miguel?

Laʼ lac ñaxan al chaʼan an wiñicob xʼixicob añoʼ bʌ chaʼpʼejl o uxpʼejl i cʼabaʼob ti wajali. Cheʼ bajcheʼ ili ejemplo, Jacob i jol bʌ jumpʼejl colem familia, tsaʼ cʌjñi jaʼel bajcheʼ Israel, i jiñi apóstol Pedro tsaʼ cʌjñi bajcheʼ Simón (Génesis 49:1, 2; Mateo 10:2). Cheʼ lajal jaʼel, jiñi Biblia mi yʌl chaʼan jiñi Miguel jiñʌch yambʌ i cʼabaʼ muʼ bʌ i subentel Jesucristo, maʼañic tsaʼ qʼuextʌyi cheʼ bʌ  muʼto caj i tilel ti Pañimil mi jiñic to cheʼ bʌ ti chaʼ majli yaʼ ti panchan. Laʼ laj qʼuel yaʼ ti Biblia chucoch mi la cʌl chaʼan jiñi Miguel jiñʌch yambʌ i cʼabaʼ Jesús.

Cʼax ñuc bʌ ángel. Jiñi i Tʼan Dios miʼ yʌcʼ ti cʌñol Miguel bajcheʼ «jiñi cʼax ñuc bʌ ángel» (Judas 9). Ili yom i yʌl chaʼan jiñʌch «i yumob jiñi ángelob». Yaʼ ti Biblia mi laj qʼuel chaʼan Miguel cʌmbil bajcheʼ jiñi cʼax ñuc bʌ ángel, ili miʼ yʌcʼ ti ñaʼtʌntel chaʼan maʼañic yambʌ ángelob cheʼ bʌ miʼ subentel bajcheʼ jiñi. Jiñi Biblia maʼañic miʼ taj ti tʼan chaʼan an cabʌl «cʼax ñuc bʌ ángel», cojach miʼ taj ti tʼan juntiquil. Cheʼ jaʼel, mi laj qʼuel chaʼan Jesús miʼ pʌs chaʼan woliyʌch i mel i yeʼtel bajcheʼ cʼax ñuc bʌ ángel. Cheʼ mi laj qʼuel yaʼ ti 1 Tesalonicenses 4:16, baqui mi yʌl chuqui mi caj i mel Jesucristo tsaʼ bʌ tejchisʌnti: «Jiñi lac Yum mi caj i jubel tilel ti panchan. Mi caj i chaʼlen mandar. Jiñi ñuc bʌ ángel miʼ caj ti tʼan yicʼot jaʼel i trompeta Dios». Ti ili texto mi yʌl chaʼan Jesús miʼ caj ti tʼan bajcheʼ jiñi cʼax ñuc bʌ ángel. Jin chaʼan, ili miʼ yʌcʼ ti ñaʼtʌntel chaʼan Jesús jiñʌch jiñi cʼax ñuc bʌ ángel Miguel.

Ñuc bʌ yumʌl tiʼ tojlel ángelob. Jiñi Biblia mi yʌl chaʼan «Miguel yicʼot i yángelob tsiʼ chaʼleyob guerra tiʼ contra jiñi ajin yicʼot i yángelob jiñi ajin» (Apocalipsis 12:7). Jin chaʼan, Miguel jiñʌch jiñi ñuc bʌ yumʌl tiʼ tojlel ángelob xucʼuloʼ bʌ. Jiñi libro chaʼan Apocalipsis miʼ yʌcʼ ti cʌjñel Jesús bajcheʼ jiñi ñuc bʌ yumʌl tiʼ tojlel ángelob xucʼuloʼ bʌ (Apocalipsis 19:14-16). Cheʼ jaʼel jiñi apóstol Pablo tsiʼ taja ti tʼan «lac Yum Jesús» yicʼot «jiñi ángelob am bʌ i pʼʌtʌlel» (2 Tesalonicenses 1:7). Jin chaʼan, jiñi Biblia miʼ taj ti tʼan Miguel yicʼot «i yángelob», cheʼ jaʼel mi taj ti tʼan Jesús yicʼot «i yángelob» (Mateo 13:41; 16:27; 24:31; 1 Pedro 3:22). Jiñi i Tʼan Dios maʼañic baqui mi yʌl chaʼan an chaʼtiquil yumʌl tiʼ tojlel ángelob, juntiquil am bʌ ti wenta Miguel yicʼot yambʌ am bʌ tiʼ wenta Jesús, cojach mi taj ti tʼan juntiquil. Jin chaʼan, miʼ mejlel laj cʌl chaʼan Miguel jiñʌch Jesucristo woli bʌ i mel i yeʼtel yaʼ ti panchan. *