SULUʼU tü Wiwüliakat Miguel münüshi wanee aapiee otta aʼyataashi nia waneepia. Naashin Daniel atkaashi namaa na aapiee mojulaashiikana; naashin Judas aʼülüjiraashi nümaa Satanaa otta saashin Alateetkat Mapeena atkaashi nümaa Satanaa otta na yolujaakana. Atkaashi nia namaa na nüʼünüükana Maleiwa süpüla niiʼiyatüin niain Jeʼwaa Aluwataain. Sükajee tia yaletüsü nünülia nutuma, «¿Jarai chi makai aka naaʼin Maleiwa?», maluʼulu tü nünüliakat. ¿Jarai chi kanüliakai Miguel?

Soto waaʼin eein wayuu eeka nnojoluin waneesiain nanülia. Maʼaka naaʼin chi aluwataaushikai Pablo, Saulo münüshi nia otta chi aluwataaushikai Pedro, Simón münüshi nia (Aluwataaushikana 13:9; Mateo 10:2). Saashin tü Wiwüliakat Miguel nia Jesukürisüto. Nünüliasü shia chaiwaʼaya nia sirumatuʼu otta nüleʼejapa. Wekirajaa sünain tü Wiwüliakat süpüla watüjaain saaʼu tia.

Sülaüla aapiee. Saashin tü Wiwüliakat ‹sülaüla aapiee› Miguel (Judas 9). Chi sülaülakai aapiee münüshi Miguel süka  waneeshiain neʼe nia. Nnojotsü süküjüin tü Wiwüliakat wainmain nalaüla na aapieekana, waneeshia neʼe nia. Otta müshia Jesuu niʼyataa anainrü tü niʼyataakalü anain wanee sülaüla aapiee. Müsü 1 Tesalónica 4:16 süchiki tü naainjainjatkat Jesukürisüto: ‹Ashakateechi chi Senyotkai Jesuu iipünaajee, aapüneerü nünüiki chi sülaülakai tü aapieekalüirua›. Saashin pütchikat tia, aashajaainjachi Jesuu maʼaka naaʼin wanee sülaüla aapiee. Sutuma tia, Jesuu nia Miguel, chi sülaülakai aapiee.

Sülaüla surulaat. Saashin tü Wiwüliakat ‹chi aapiee müleʼoshikai kanüliakai Miguel je na aapiee nümaajanakana, atkaashii nümaa chi kayuushikai› (Alateetkat Mapeena 12:7). Miguel müshi aka naaʼin wanee sülaüla surulaat, nalaülashi na aapiee oonookana waneepia sümaa nünüiki Maleiwa maʼaka süküjüin Alateetkat Mapeena 19:14-16. Nüküjüin Pablo nüchiki «chi Wasenyotsekai Jesukürisüto» otta «na aapiee pülashiikana maʼi» (2 Tesalónica 1:7). Süküjüin tü Wiwüliakat nüchiki Miguel otta ‹na aapiee nümaajanakana›, Jesuu otta ‹na aapiee nümaajanakana› (Mateo 13:41; 16:27; 24:31; 1 Pedro 3:22). Nnojotsü süküjüin tü Wiwüliakat süchiki naatain na aapiee nümaajanakana Miguel noulia na nümaajanakana Jesuu. Sutuma tia, Miguel nia Jesukürisüto sünain aʼyatawaa sirumatuʼu. *