LA BÍBLIAPE saʼi oñeñeʼẽ pe espíritu hérava Miguélgui. Péro oñeñeʼẽ jave chugui, katuete ojapohína peteĩ mbaʼe. Pe lívro hérava Daniélpe, Miguel oñorairõhína umi ánhel añándi; Judas kuatiañeʼẽme, haʼe ojodiskutihína Satanás ndive, ha Revelaciónpe katu oñorairõhína Satanás ha idemoniokuéra ndive. Odefende rupi Jehová sãmbyhy ha oñorairõ rupi umi Ñandejárare oñemoĩva ndive, ojapo pe héra heʼiséva: “Mávapa Ñandejáraicha?”. Péro, mávapa Miguel?

Sapyʼánte, oĩ umi tapicha ojekuaáva heta téra rupi. Pór ehémplo, Jacob, omoakãvaʼekue peteĩ família tuicháva, oñehenoivaʼekue avei Israel, ha pe apóstol Pédrope, Simón (Génesis 49:1, 2; Mateo 10:2). Upéicha avei, la Biblia ohechauka Miguel haʼeha avei Jesucristo réra, ou mboyve ko Yvy ape ári ha oho jey rire yvágape. Jahecháta la Bíbliape mbaʼérepa jaʼekuaa ko mbaʼe.

Arkánhel. Ñandejára Ñeʼẽ ohenói Miguélpe ‘pe arkánhel’ (Judas 9). Ko ñeʼẽ heʼise ‘umi ánhel ruvicha’. Ha oñehenói rupi Miguélpe pe arkánhel, jahechakuaa upeichagua ánhel oĩha peteĩnte. Upévare, la Biblia oiporu jave ‘arkánhel’ oñeʼẽ peteĩguinte, ndahaʼéi hetágui. Avei, ohechauka Jesús ojapoha pe arkánhel rembiapo. Ha Jesucrístogui oñemoingove jey rire, 1 Tesalonicenses 4:16 heʼi: ‘oguejýta rupi pe Karai yvágagui mburuvicha ñeʼẽ reheve, pe arkánhel ñeʼẽ reheve’. Koʼápe jahecha Jesús oñeʼẽha peteĩ arkánhel ñeʼẽ  reheve. Upévare jaʼekuaa Jesús voi haʼeha pe arkánhel Miguel.

Omoakã peteĩ ehérsito. La Biblia heʼi: ‘Miguel ha hiʼanhelkuéra oñorairõ pe dragón [...] ha hiʼanhelkuéra ndive’ (Revelación 12:7). Upéicharõ, Miguel omoakã peteĩ ehérsito umi ánhel jeroviapýgui. Pe lívro hérava Revelación heʼi avei Jesús omoakãha peteĩ ehérsito umi ánhel jeroviapýgui (Revelación 19:14-16). Ha pe apóstol Pablo oñeʼẽ pe ‘Karai Jesús’ ha ‘hiʼanhelkuéra ipoderósova’ rehe (2 Tesalonicenses 1:7). Upéicharõ, la Biblia oñeʼẽ Miguel ha ‘hiʼanhelkuéragui’ ha avei Jesús ha ‘hiʼanhelkuéragui’ (Mateo 13:41; 16:27; 24:31; 1 Pedro 3:22). Ñandejára Ñeʼẽ ndeʼíri oĩha mokõi ehérsito umi ánhel jeroviapýgui, peteĩ omoakãva Miguel ha ambue Jesús. Upévare jaʼekuaa Miguel haʼeha Jesucristo ojapóvo hembiapo yvágape. *