ANG espiritu nga tinuga nga gintawag Miguel talagsa lang ginasambit sa Biblia. Pero sa kada pagsambit sa iya, may ginahimo sia. Sa libro sang Daniel, si Miguel nagapakig-away sa malaut nga mga anghel; sa sulat ni Judas, nagapakigsuay sia kay  Satanas; kag sa Bugna, nagapakig-away sia sa Yawa kag sa mga demonyo sini. Paagi sa pagpangapin sa paggahom ni Jehova kag pagpakig-away sa mga kaaway sang Dios, ginasunod ni Miguel ang kahulugan sang iya ngalan—“Sin-o ang Kaangay sa Dios?” Pero sin-o si Miguel?

May mga indibiduwal nga indi lang isa ang ngalan. Halimbawa, si patriarka Jacob kilala man nga si Israel, kag si apostol Pedro kilala man nga si Simon. (Genesis 49:1, 2; Mateo 10:2) Pareho sini, ginapakita sang Biblia nga ang Miguel isa pa ka ngalan ni Jesucristo, antes kag pagkatapos sang iya kabuhi sa duta. Tun-an naton ang base sa Kasulatan nga mga rason kon ngaa.

Arkanghel. Gintawag sang Pulong sang Dios si Miguel bilang “arkanghel.” (Judas 9) Ini nga termino nagakahulugan sing “pangulo nga anghel.” Ang termino nga “arkanghel” gingamit sang Biblia nga pang-isahan lang (singular), indi nga pangmadamo (plural). Ginapakita sini nga isa lamang ang amo sini nga anghel. Isa pa, gin-angot si Jesus sa posisyon sang arkanghel. Parte sa ginbanhaw nga si Ginuong Jesucristo, ang 1 Tesalonica 4:16 nagasiling: “Ang Ginuo magapanaug halin sa langit, nga may pagmando, nga may tingog sang arkanghel.” Ginalaragway diri ang tingog ni Jesus subong tingog sang isa ka arkanghel. Gani ginapakita sini nga bersikulo nga si Miguel nga arkanghel amo mismo si Jesus.

Lider sang mga Hangaway. Ginapakita sang Biblia nga “si Miguel kag ang iya mga anghel nagpakig-away sa dragon kag . . . mga anghel sini.” (Bugna 12:7) Gani, si Miguel amo ang Lider sang hangaway sang matutom nga mga anghel. Ginalaragway man sang Bugna si Jesus bilang Lider sang hangaway sang matutom nga mga anghel. (Bugna 19:14-16) Kag ginsambit man ni apostol Pablo si “Ginuong Jesus” kag “ang iya gamhanan nga mga anghel.” (2 Tesalonica 1:7) Gani pareho nga ginasambit sang Biblia si Miguel kag ang “iya mga anghel” kag si Jesus kag “iya mga anghel.” (Mateo 13:41; 16:27; 24:31; 1 Pedro 3:22) Wala ginapakita sang Pulong sang Dios nga may duha ka hangaway sang matutom nga mga anghel sa langit—ang isa ginapangunahan ni Miguel kag ang isa ginapangunahan ni Jesus —gani masiling gid naton nga si Miguel amo mismo si Jesucristo sa iya katungdanan sa langit. *