OVIWEZIWAKO
Owaṋi ngu isanewa Mikael omuengeli otjiuru?
OTJIUTWA tjombepo tji tji isanewa Mikael katji tamunwa tjinene mOmbeibela. Nungwari indu tji tja tamunwa, otjo tji tamunwa atji ri motjiungura. Membo rOmbeibela raDaniel, Mikael wa ri ama ru ku novaengeli ovarunde; morutuu rwaJudas, eye wa ri nombatasaneno kuna Satan; nu mOmavandururiro, eye wa ri ama rwisa Omudiaboli nozondemone ze. Mokurwira ouhonapare waJehova nokurwisa ovanavita vaMukuru, Mikael u tjita otja ena re pu mari hee. Oro ri heya kutja, “Owaṋi ngu ri otja Mukuru?” Mikael hapo omungendu?
Ovandu tjiva ve nomana omengi. Okutara kotjihorera, Jakob wina aa tjiukwa otja Israel, nu omuapostele Petrus aa tjiukwa otja Simon. (Genesis 49:1, 2; Mateus 10:2) Momuano tjingewo Ombeibela i raisa kutja Mikael ena raJesus Kristus rarwe, ngunda eehi ye ya kombanda yehi na indu tja yaruka keyuru. Ngatu tare komapu womOmatjangwa kutja ongwaye tji matu tja nao.
Omuengeli otjiuru. Embo raMukuru ri tja Mikael “omuengeli otjiuru.” (Judas 9) Ombeibela tji mai ungurisa embo ndi “omuengeli otjiuru” oyo i hungira ohunga nomuengeli umwe uriri? Ihi matji hee kutja ku nomuengeli ngo umwe uriri ngu ri otjiuru. Nakombanda yanao, Jesus u tamunwa otja omuengeli otjiuru. Ohunga na Muhona Jesus Kristus ngwa pendurwa movakoke, mo-
Omuhongore wotjimbumba tjovita. Ombeibela mai tja “Mikael novaengeli ve va rwisire otjitjupamuriro, . . . novaengeli vatjo.” (Omavandururiro 12:7) Okutja Mikael Omuhongore wotjimbumba tjovita tjovaengeli ovaṱakame. Omavandururiro wina maye raisa Jesus otja Omuhongore wotjimbumba tjovita tjovaengeli ovaṱakame. (Omavandururiro 19:14-16) Nu omuapostele Paulus ma tamuna momuano wapeke kutja “Muhona Jesus” me ya puna “ovaengeli ve ovanamasa.” (2 Ovatesalonika 1:7) Okutja Ombeibela mai hungire ohunga noviṋa vivari mbi: Mikael puna “ovaengeli ve” na Jesus puna “ovaengeli ve.” (Mateus 13:41; 16:27; 24:31; 1 Petrus 3:22) Embo raMukuru kari na pu ri raisa kutja ku novimbumba vivari vyovaengeli ovaṱakame meyuru, tjimwe tji tji hongorerwa i Mikael na tjarwe tji tji hongorerwa i Jesus. Okutja Mikael oJesus Kristus motjiungura tje tjomeyuru. *
^ par. 1 Tji mo vanga ondjiviro yokomurungu kutja ena ndi Mikael ena rOmuna waMukuru, tara membo ndi Insight on the Scriptures, oritja-2, pomikuma 393-4. Embo ndi ra yandjwa i Ovahongonone vaJehova.
