MELIKAT ke dikumbai Mikael jarang disebut ba Bup Kudus. Tang, maya iya disebut, iya ngereja pengawa. Ba Bup Daniel, Mikael ngelaban bala melikat ti jai; ba surat Jude, iya bechakah enggau Sitan; lalu ba Pemandang, iya beperang ngelaban Sitan enggau bala antu iya. Enggau ngetanka kuasa merintah ari Jehovah sereta ngelaban munsuh Petara, Mikael idup sejalai enggau reti nama iya—“Sapa Ti Baka Petara?” Tang, sapa Mikael nya?

Kekadang, seiku orang bisi lebih ari siti nama. Chunto, Jakop mega dikumbai Israel, lalu rasul Peter mega dikumbai Simon. (Pemungkal 49:1, 2; Matthew 10:2) Baka nya mega, Bup Kudus nerangka Mikael nya nama Jesus Kristus ti bukai, sebedau iya idup ba dunya tu enggau pengudah iya niki ke serega. Aram kitai meda ayat ari Bup Kudus ti nyukung pekara tu.

Tuai Melikat. Jaku Petara ngumbai Mikael “tuai melikat.” (Jude 9) Peratika semina Mikael aja ti dikumbai tuai melikat. Nadai melikat bukai ngena gelar tu. Pia mega, Bup Kudus madah semina Jesus aja ti megai penuduk nyadi tuai melikat. Pasal Tuan Jesus Kristus ti diangkat idup baru ari mati, 1 Tesalonika 4:16 madah: ‘Tuan empu deka nurun ari serega enggau nyawa ti inggar, enggau nyawa tuai melikat.’ Ketegal nyawa Jesus digambarka  baka nyawa tuai melikat, nya alai, ayat tu ngumbai Jesus nya tuai melikat ti benama Mikael.

Tuai Soldadu. Bup Kudus madah “Mikael enggau bala melikat iya beperang ngelaban naga nya . . . enggau bala melikat iya.” (Pemandang 12:7) Nyadi, Mikael nya Tuai soldadu bala melikat ke tetap ati. Pemandang mega nerangka Jesus nya Tuai soldadu bala melikat ke tetap ati. (Pemandang 19:14-16) Lalu rasul Paul madah enggau terang ‘Tuan Jesus’ enggau ‘bala melikat iya ti bekuasa.’ (2 Tesalonika 1:7) Bup Kudus bejaku pasal Mikael enggau ‘bala melikat iya’ sereta Jesus enggau ‘bala melikat iya.’ (Matthew 13:41; 16:27; 24:31; 1 Peter 3:22) Laban Jaku Petara nadai madah pasal dua bengkah soldadu melikat di serega—siti betuaika Mikael, lalu siti agi betuaika Jesus—nyadi kitai ulih nyimpulka Mikael nya endang Jesus Kristus. *