ARI kuruga nakagi ta Biblia i anghel nga si Miguel. Ngem kada matukoy yaya, kanayun nga egga kukukuanna. Ta libru nga Daniel, makikkillaban si Miguel ta demonio ira; ta tura ni Judas, makididdiskusion kani Satanas; anna ta libru na Nepakannammu, makigeggerra ta Diablo anna ta demoniona ira. Gukaban na pangidepensa ta pammaguray na Dios anna pakillaban ta kontra ira na Dios, pappakurugan ni Miguel i kebalinan na ngaganna nga “Sinni i Kagitta na Dios?” Ngem sinni si Miguel?

Nu karuan, ari laman nga mammammu i tolay ta tadday laman nga ngagan. Angngariganna, si patriarka Jacob ay nammammu gapa tu Israel, anna nagalan gapa si apostol Pedro tu Simon. (Genesis 49:1, 2; Mateo 10:2) Kagian gapa na Biblia nga i Miguel ay tanakuan paga nga ngagan ni Jesu-Cristo, nige anna kabalin na nepattolena ta davvun. Ikonsidera tam i Katurakan ira nga mamakurug tatun.

Arkanghel. Tinukoy na Biblia si Miguel nga “i arkanghel.” (Judas 9, NW ) “Lider na anghel” i kaya na kagian yaw nga termino. Pansinammu nga nagalan si Miguel tu i arkanghel. Kebalinanna nga tattadday laman i kunnatun nga anghel. Kakuruganna, nu usan na Biblia i termino nga “arkanghel,” tadday laman nga anghel i tukuyanna, ari pulus nga neyusa na Biblia yatun nga termino nu aru nga anghel i tukuyanna. Fuera paga tatun, egga koneksionna kani Jesus i posision nga arkanghel. Nekagi ta 1 Tesalonica 4:16 meyannung ta napaginnolay nga si Jesu-Cristo: “Maginna noka i mandu nga mekulle ta masikan, maginna i ngaral na dakal na anghel ira (“arkanghel,” NW ).” Yari tu natukoy i  ngaral ni Jesus bilang ngaral na arkanghel. Pakuruganna gafu yaw nga teksto nga si Jesus mismu i Miguel nga arkanghel.

Lider na Armada. Kagian na Biblia nga “si Miguel tuange ta anghel na ira ay nakillaban ta dragon tuange gapa ta anghel na ira.” (Nepakannammu 12:7) Yari tu, si Miguel i Lider na armada na matalo nga angheles. Nakagi gapa ta libru na Nepakannammu nga si Jesus ay Lider na matalo nga armada na angheles. (Nepakannammu 19:14-16) Espesipiko gapa nga tinukoy ni apostol Pablo “i Yafu Jesus” anna “makapangngua nga anghel na ira.” (2 Tesalonica 1:7) Parehas gafu nga tinukoy na Biblia si Miguel anna “anghel na ira” tapus si Jesus anna “anghel na ira.” (Mateo 13:41; 16:27; 24:31; 1 Pedro 3:22) Megafu ta awan gamma tu kagian na Biblia nga egga dua nga armada na matalo nga angheles ta langi​—nga si Miguel i lider na tadday tapus si Jesus gapa i lider na tadday​—manawag gafu nga si Miguel ay yaya gabbalaman si Jesu-Cristo. *