ŨVOO WA KWONGELEELA
Mikaeli, Ũla Mũlaĩka Mũnene Nũũ?
MŨLAĨKA ũla wĩtawa Mikaeli ndawetetwe mũno Mbivilianĩ. Ĩndĩ yĩla wawetwa ethĩawa ayĩka ũndũ. Ĩvukunĩ ya Ndanieli Mikaeli awetetwe ayũkita na alaĩka athũku; ĩvukunĩ ya Yuta awetetwe aikandanĩa na Satani; na ĩvukunĩ ya Ũvuan’yo awetetwe ayũkita na Satani na ndaimoni syake. Yĩla Mikaeli ũkũtetea ũsumbĩki wa Yeova na kũkita na amaitha ma Ngai, ekaa kwĩanana na ũndũ syĩtwa yake yonanasya. Ũalyũlo wa syĩtwa Mikaeli nĩ—“Nũũ Ũilyĩ ta Ngai?” Ĩndĩ we Mikaeli nũũ?
Andũ nĩmethĩawa na masyĩtwa mbee wa yĩmwe. Kwa ngelekany’o, Yakovo ũla wa tene nowe wĩtawa Isilaeli, na mũtũmwa Vetelo nowe wĩtawa Simioni. (Mwambĩlĩlyo 49:1, 2; Mathayo 10:2) O ta ũu, Mbivilia yonanasya kana Mikaeli nĩ syĩtwa yĩngĩ ya Yesũ Klĩsto yatũmĩawa e ĩtunĩ mbee wa atanoka kũũ nthĩ. Syĩtwa yĩu yaendeeie o kũtũmĩwa ĩngĩ yĩla wasyokie ĩtunĩ. Twone Maandĩko ala meũtuma twasya ũu.
Mũlaĩka Mũnene. Ndeto ya Ngai ĩwetaa kana Mikaeli nĩ “ũla mũlaĩka mũnene.” (Yuta 9) Mikaeli etĩtwe ũla mũlaĩka mũnene, kwonany’a kana ve mũlaĩka o ũmwe ũla mũnene vyũ. Na ũu nĩw’o, nũndũ ndeto “mũlaĩka mũnene” yonekaa Mbivilianĩ ĩiweta ĩũlũ wa mũndũ o ũmwe, ĩndĩ ti aingĩ. Na ĩngĩ, Yesũ nũkonanĩtw’e na ũkũmũ wa mũlaĩka mũnene. Ĩandĩko ya 1 Athesalonika 4:16 yaasya ũũ ĩũlũ wa Yesũ amina kũthayũũkw’a: “Nĩkwĩthĩwa mwĩaĩi mwene akatheea kuma ĩtunĩ, na wasya mũtũlu, na wasya wa mũlaĩka mũnene.” Wasya wa Yesũ vaa wĩtĩtwe wasya wa mũlaĩka mũnene. Kwoou mũsoa ũsu wĩonany’a kana Yesũ mwene nĩwe Mikaeli ũla mũlaĩka mũnene.
Mũtongoi wa Ita. Mbivilia ĩwetaa ‘Mikaeli na alaĩka make maithi kũkita na ũla mũkũnga mũnene na alaĩka maw’o.’ (Ũvuan’yo 12:7) Kwoou, Mikaeli nĩwe Mũtongoi wa ita sya alaĩka aĩkĩĩku. Ĩvuku ya Ũvuan’yo nayo yaasya Yesũ nĩ Mũtongoi wa ita sya alaĩka aĩkĩĩku. (Ũvuan’yo 19:14-16) Mũtũmwa Vaulo nĩwawetie nesa ĩũlũ wa “Mwĩaĩi Yesũ” na “alaĩka make me vinya.” (2 Athesalonika 1:7, NTK; ) Kwoou Mbivilia ĩneenaa ĩũlũ wa Mikaeli na “alaĩka make” na Yesũ na “alaĩka make.” (Mathayo 13:41;16:27; 24:31; 1 Vetelo 3:22) Nũndũ vaiĩ vandũ Ndeto ya Ngai yonanĩtye kana ĩtunĩ kwĩ ita kũndũ kwĩlĩ sya alaĩka aĩkĩĩku —imwe itongoew’e nĩ Mikaeli na ingĩ itongoew’e nĩ Yesũ—nĩtũtonya kwasya Mikaeli no we Yesũ Klĩsto e kĩandanĩ kyake ĩtunĩ. *
^ kal. 1 Ũvoo mwingangĩ ũkwonany’a kana syĩtwa Mikaeli nĩ ya Mwana wa Ngai wĩ ĩvukunĩ ya Kutoa Sababu Kwa Kutumia Maandiko ĩthangũnĩ ya 436-437, yĩkyavĩthĩtw’e nĩ Ngũsĩ Sya Yeova.
