OSHISHITWA shopamhepo osho hashi ifanwa Mikael inashi tumbulwa mo luhapu mOmbibeli. Ndele peemhito opo sha popiwa, osha popiwa tashi longo sha. Membo laDaniel, Mikael okwa popiwa ta lu novaengeli ovakolokoshi; monhumwafo yaJudas, okwa popiwa ta tu eemhata naSatana; nosho yo mEhololo, okwa popiwa ta lwifa Ondiaboli neendemoni dayo. Molwaashi Mikael oha popile epangelo laJehova noha lwifa ovatondi vaJehova, oha kala metwokumwe nedina laye, olo tali ti “Olyelye a fa Kalunga?” Ndele mbela Mikael oye lyelye?

Ovanhu vamwe ove na omadina mahapu. Pashihopaenenwa, tatekulululwa Jakob okwa li yo hai ifanwa Israel; omuyapostoli Petrus okwa li yo ha ifanwa Simon. (Genesis 49:1, 2; Mateus 10:2) Sha faafana, Ombibeli otai ulike kutya Mikael olo edina limwe laJesus Kristus, fimbo a li ine uya kombada yedu nosho yo eshi a shuna meulu. Natu konakoneni omatomheno opamishangwa kutya omolwashike taku tilwa ngaho.

Omwengeli omukulunhu. Eendjovo daKalunga otadi popi Mikael “omwengeli omukulunhu.” (Judas 9) Outumbulilo “omwengeli omukulunhu” owa holoka ashike paushimwe mOmbibeli, ndele hapauhapu. Osho otashi ulike kutya oku na ashike omwengeli a tya ngaho umwe. Natango, Jesus okwa tumbulwa e li pondodo yomwengeli omukulunhu. Shi na sha nomunyumunwa Omwene Jesus Kristus, 1 Ovatessaloniki 4:16 otava ti: “Omwene Ye mwene ota ka londoloka keulu neingido lelombwelo nondaka [yomwengeli] omukulunhu.” Kungaha, ondaka yaJesus oya popiwa kutya oyomwengeli omukulunhu. Onghee hano,  omushangwa oo otau ulike kutya Jesus oye omwengeli omukulunhu Mikael.

Omuwiliki womatanga ovakwaita. Ombibeli otai ti kutya ‘Mikael novaengeli vaye ova lwifa ongadu novaengeli vayo.’ (Ehololo 12:7) Onghee hano, Mikael oku li Omuwiliki womatanga ovakwaita ovaengeli ovadiinini. Ehololo otali hokolola yo Jesus e li Omuwiliki womatanga ovakwaita ovaengeli ovadiinini. (Ehololo 19:14-16) Omuyapostoli Paulus okwa tumbula yo kondadalunde ‘Omwene Jesus’ nosho yo ‘ovaengeli vaye ovanaenghono.’ (2 Ovatessaloniki 1:7) Onghee hano, Ombibeli otai popi Mikael “novaengeli vaye” nosho yo Jesus ‘novaengeli vaye.’ (Mateus 13:41; 16:27; 24:31; 1 Petrus 3:22) Molwaashi Eendjovo daKalunga kadi na apa tadi popi kutya oku na omatanga ovakwaita opavali ovaengeli ovadiinini meulu — limwe ngeno tali wilikwa kuMikael nalikwao okuJesus — oshi li pandunge okufika pexulifodiladilo kutya Mikael oye lela Jesus Kristus e li pondodo yaye yomeulu. *