ДЬ КʹЬТЕБА Пирозда дәрһәԛа әʹфрине рʹӧһʹани бь наве Мьхайил, тʹәне чәнд щара те готьне. У ван һәр щара ньвисар ә кӧ әԝ, ча бежи шьхӧл дькә. Дь кʹьтеба Данийелда те готьне кӧ Мьхайил тʹәви мьлйакʹәтед зӧлм шәрʹ дькә, дь нәʹма Щьһудада әԝ мьԛабьли Мире-щьна дәрдькʹәвә, ле дь кʹьтеба Әʹйантида те готьне, кӧ әԝ тʹәви щьна у Мире-щьна шәрʹ дькә. Мәʹна наве Мьхайил әв ә: «Кʹи Мина Хԝәде йә?». Бь ве йәке кӧ Мьхайил пьшта сәрԝертийа Йаһоԝа дьгьрә у тʹәви дьжмьнед Хԝәде шәрʹ дькә, әԝ рʹьнд дьдә кʹьфше кӧ наве ԝи чь те һʹәсабе.

Һәнә мәрьвед ӧса кӧ чәнд навед ван һәнә. Мәсәлә, Аԛуб пʹехәмбәр әʹйан бу ча Исраел, Пәтрусе шандирʹа жи дьготьн Шьмһʹун (Дәстпебун 49:1, 2; Мәтта 10:2). Ләма жи анәгори ве йәке, Мьхайил әв диса навәки Иса Мәсиһ йә, ӧса ԝирʹа дьготьн пешийа ԝе йәке ча әԝ һатә ль сәр әʹрде у паши ԝе йәке, ча әԝ жь мьрийа рʹабу. Ԝәрә әм бьньһерʹьн, кӧ ль сәр һʹиме кʹижан рʹеза жь кʹьтеба Пироз, әм дькарьн әве йәке избат кьн.

Сәрәкмьлйакʹәт. Дь Хәбәра Хԝәдеда ньвисар ә кӧ Мьхайил һәйә «сәрәкмьлйакʹәт» (1 Тʹесалоники 4:16). Дина хԝә бьде кӧ дь Кʹьтеба Пирозда әв хәбәр «сәрәкмьлйакʹәт», тʹәне йәканида те ньвисаре у тʹӧщар гәләканида найе ньвисаре. Демәк тʹәне мьлйакʹәтәк дькарә сәрәкмьлйакʹәт бә. Хенщи ве йәке жь Кʹьтеба Пироз әм педьһʹәсьн, кӧ дәрһәԛа Иса Мәсиһ ча дәрһәԛа сәрәкмьлйакʹәт те ньвисаре. Дәрһәԛа Иса Мәсиһ, кӧ жь мьрийа һатә рʹакьрьне дь 1 Тʹесалоники  4:16-да ньвисар ә: «Хӧдане хԝәха бь әʹламәтикә фәрмани, бь дәнге сәрәкмьлйакʹәт у лехьстьна борʹийа Хԝәде жь әʹзмен бе хԝаре». Ча жь ве рʹезе те кʹьфше Иса бь дәнге сәрәкмьлйакʹәт хәбәр дьдә, демәк Иса һәйә Мьхайиле сәрәкмьлйакʹәт.

Сәрԝере Ордийа. Дь Кʹьтеба Пирозда ньвисар ә, кӧ «Мьхайил мьлйакʹәтед хԝәва тʹәви зийе шәрʹ кьр, зийе жи мьлйакʹәтед хԝәва тʹәви ԝан» (Әʹйанти 12:7). Демәк Мьхайил әв һәйә Сәрԝере ордийа мьлйакʹәтед амьн. Ӧса жи дь Әʹйантида ньвисар ә, кӧ Иса йә Сәрԝере ордийа мьлйакʹәтед амьн (Әʹйанти 19:14-16). Паԝлосе шанди жи дьньвиси дәрһәԛа «Хӧдан Иса» у «мьлйакʹәтед» ԝийә зор (2 Тʹесалоники 1:7; Мәтта 16:27; 24:31; 1 Пәтрус 3:22). Жь Кʹьтеба Пироз әм дьбиньн кӧ һьн Мьхайил ә сәрәке мьлйакʹәта, һьн Иса Мәсиһ (Мәтта 13:41). Ле хенщи ве йәке, дь Кʹьтеба Пирозда тʹӧ щикида найе ньвисаре кӧ ль әʹзмана дӧ ордийед мьлйакʹәтед амьн һәнә у ԝәки сәрԝере ордики Мьхайил ә, йе дьне жи Иса йә. Ләма жи әм фәʹм дькьн, кӧ Мьхайил әв һәйә Иса Мәсиһ. *