KILENGWA kya mupashi kitelwa’mba Mikela kechi kyatongolwapo javula mu Baibolo ne. Pano bino umvwe kyatongolwa, ko kuba’mba kibena kubapo kimo. Mu buku wa Danyela, Mikela ubena kulwa na bapashi batama; mu nkalata ya kwa Yuda, ubena kutoboka na Satana; kabiji mu Lumwekesho, ubena kulwa nkondo na Diabola ne bademona banji. Kupichila mu kuzhikijila bukalama bwa Yehoba ne kulwa na balwanyi ba Lesa, Mikela wikala monka mwatala jizhina janji jilumbulula’mba, “Ñanyi Uji Nobe Lesa?” Pano nga Mikela ye ñanyi?

Bimye bimo, bantu batelwa mazhina avula. Kya kumwenako, mushakulu Yakoba utelwa ne kuba’mba Isalela, ne mutumwa Petelo naye utelwa’mba Shimona. (Ntendekelo 49:1, 2; Mateo 10:2) Byonkabyo, ne Baibolo waamba’mba Mikela ke jizhina jikwabo ja kwa Yesu Kilishitu, saka akyangye kwiya panopantanda ne panyuma ya kufumapo. Twayai tumone bishinka bya mu Binembelo bitulengela kwamba bino.

Malaika Mwine Mukatampe. Mambo a Lesa atongola Mikela “malaika mwine mukatampe.” (Yuda 9) Mwamona Mikela watongolwa pano’mba malaika mwine mukatampe. Kino kimwesha’mba uno malaika ujikotu umo. Ne byambo bine bya kuba’mba “malaika mwine mukatampe” byanembwa mu Baibolo kutongola muntu umo kechi bantu bavula ne. Kabiji Yesu watongolwa kwikala malaika mwine mukatampe. Pa mambo a Nkambo Yesu Kilishitu wasangwilwe, 1 Tesalonika 4:16 waamba’mba: “Nkambo mwine ukekila mwiulu na mbila, na jiwi ja malaika mwine mukatampe.”  Mu jino jishinda, jiwi ja kwa Yesu jalondololwa amba ja yewa malaika mwine mukatampe. Onkao mambo, kino kinembelo kibena kumwesha kuba’mba Yesu aye mwine ye Mikela malaika mwine mukatampe.

Mukulumpe wa Nzhita. Baibolo waamba’mba ‘Mikela ne bamalaika banji balwile ne aye nsuñunyi . . . ne bamalaika banji.’ (Lumwekesho 12:7) Ko kuba’mba, Mikela ye Mukulumpe wa nzhita ya bamalaika ba kishinka. Kabiji Lumwekesho wamulumbulula Yesu amba ye Mukulumpe wa nzhita ya bamalaika bakishinka. (Lumwekesho 19:14-16) Kabiji mutumwa Paulo watongola “Nkambo Yesu” ne “bamalaika ba bulume bwanji.” (2 Tesalonika 1:7; Mateo 16:27; 24:31; 1 Petelo 3:22) Baibolo watongola Mikela ne “bamalaika banji” ne Yesu ne “bamalaika banji.” (Mateo 13:41) Byo kiji kuba’mba kafwapo nangwa pamo Mambo a Lesa po aamba’mba kuji mabumba abiji a mazhita a bamalaika bakishinka mwiulu—nzhita imo itangijilwa na Mikela ne ikwabo itangijilwa na Yesu ne, kyayilamo kwamba’mba Mikela ye Yesu Kilishitu mu mwingilo wanji wa mwiulu. *