တၢ်ပိာ်ထွဲ
မူခိၣ်ကလူးအခိၣ် မံၤက့လးန့ၣ် မ့ၢ်မတၤလဲၣ်
ပှၤနီၢ်သးလၢအမံၤမ့ၢ် မံၤက့လးန့ၣ် လံာ်စီဆှံတပာ်ဖျါအီၤ တလီၢ်လီၢ်ဘၣ်. ဘၣ်ဆၣ် ဖဲတၢ်ယၢၤထီၣ်အီၤအခါ ပာ်ဖျါဃုာ်ဝဲဒီး အဝဲအတၢ်ဖံးတၢ်မၤလီၤ. လံာ်ဒၤနံးယ့လးအပူၤန့ၣ် မံၤက့လး ဒုးတၢ်ဒီး မူခိၣ်ကလူးအအၢတဖၣ်လီၤ, လံာ်ယူဒၤအပူၤန့ၣ် အဝဲဂ့ၢ်လိာ်ဘှီလိာ်အသးဒီး စၤတၣ်, ဒီးလၢလံာ်လီၣ်ဖျါအပူၤန့ၣ် အဝဲဒုးလိာ်သးဒီး မုၢ်ကီၤလံၢ်, ဒီးကလူးအၢတဖၣ်လီၤ. ဖဲတၢ်ဒီသဒၢ ယွၤအတၢ်ပၢတၢ်ပြး, တၢ်ဒုးလိာ်သးဒီး ယွၤအဒုၣ်အဒါတဖၣ်အခါ မံၤက့လး မၤဝဲဒ် အမံၤအခီပညီ—“မတၤလီၤဂာ်ဒီး ကစၢ်ယွၤလဲၣ်”— အသိးန့ၣ်လီၤ. ဘၣ်ဆၣ် မံၤက့လးမ့ၢ် မတၤလဲၣ်.
ဘၣ်တဘျီဘျီ ပသ့ၣ်ညါပှၤတဂၤလၢ အမံၤတမၠိတကးဘၣ်လီၤ. အဒိ, ပသ့ၣ်ညါဘၣ်စ့ၢ်ကီး ဖံဖုယၤကိာ်လၢ အံၣ်စရ့လး, ဒီးတၢ်မၢဖိ ပ့းတရူးလၢ ၡံမိၣ်လီၤ. (၁ မိၤၡ့ ၄၉:၁, ၂; မးသဲ ၁၀:၂) ဒ်န့ၣ်အသိးလီၤ, မံၤက့လးလၢ လံာ်စီဆှံပာ်ဖျါန့ၣ် မ့ၢ်ယ့ၣ်ၡူးအမံၤ အဂၤတမၠိဒီး, မံၤလၢတၢ်သူအီၤလၢ ယ့ၣ်ၡူးတချုးဟဲလၢ ဟီၣ်ခိၣ်အခါ ဒီးဟီၣ်ခိၣ်အတၢ်အိၣ်မူ ဝံၤအလီၢ်ခံန့ၣ်လီၤ. လံာ်စီဆှံ တၢ်ဂ့ၢ်တၢ်ပီၢ်တဖၣ်လၢ ပဘၣ်ပာ်ဂၢၢ်ပာ်ကျၢၤ ဒ်အံၤန့ၣ် ပကဆိကမိၣ်ကွၢ်သကိးတက့ၢ်.
မူခိၣ်ကလူးအခိၣ်. ယွၤအကလုၢ်ကထါ ပာ်ဖျါဝဲ မံၤက့လးလၢ “မူခိၣ်ကလူးအခိၣ်” လီၤ. (ယူဒၤ ၉) ပာ်သူၣ်ပာ်သးလၢ မံၤက့လးန့ၣ် တၢ်ကိးအီၤလၢ မူခိၣ်ကလူးအခိၣ် န့ၣ်တက့ၢ်. တၢ်အံၤပာ်ဖျါဝဲလၢ မူခိၣ်ကလူးဒ်သိးအံၤ အိၣ်ဒၣ်ထဲတဂၤဧိၤန့ၣ်လီၤ. နီၢ်နီၢ်, ပထံၣ်ဘၣ် တၢ်ကတိၤလၢအမ့ၢ် “မူခိၣ်ကလူးအခိၣ်” လၢလံာ်စီဆှံပူၤန့ၣ် သူဝဲဒၣ်ထဲ ပှၤတဂၤဧိၤဒီး, တသူဝဲနီတဘျီလၢ “မူခိၣ်ကလူးအခိၣ်တဖၣ်” ဒ်နီၢ်ဂံၢ်အါဂၤအသိးဘၣ်. အါန့ၢ်အန့ၣ် ပာ်ဖျါဘၣ်ထွဲဝဲ ယ့ၣ်ၡူးဒီး မူခိၣ်ကလူးအခိၣ် အလီၢ်အလၤန့ၣ်လီၤ. ဘၣ်ဃးဒီး ကစၢ်ယ့ၣ်ၡူးခရံာ်လၢ ဂဲၤဆၢထၢၣ်သမူထီၣ်က့ၤလံန့ၣ် ၁ သ့းစၤလနံ ၄:၁၆ အပူၤပာ်ဖျါဝဲဒ်အံၤလီၤ– “ကစၢ်အကစၢ်ဒၣ်ဝဲ ကဟဲလီၤလၢမူခိၣ် အိၣ်ဒီးတၢ်ကိးပသူ, ဒီးကလူးအခိၣ်တဂၤ အကလုၢ်သီၣ်” န့ၣ်လီၤ. ပာ်ဖျါဝဲ ယ့ၣ်ၡူးအကလုၢ်ဒ် မူခိၣ်ကလူးအခိၣ်အကလုၢ်အသိးန့ၣ်လီၤ. လၢတၢ်န့ၣ်အဃိ လံာ်စီဆှံအဆၢအံၤ ပာ်ဖျါဝဲလၢ ယ့ၣ်ၡူးအနီၢ်ကစၢ်ဒၣ်ဝဲမ့ၢ် မူခိၣ်ကလူးအခိၣ် မံၤက့လးလီၤ.
သုးမုၢ်သံၣ်ဘိအခိၣ်. လံာ်စီဆှံပာ်ဖျါဝဲလၢ ‘မံးက့လးဒီး အကလူးတဖၣ် ဒုးတၢ်ဒီးပယိၤ, ဒီးပယိၤအကလူးတဖၣ်’ န့ၣ်လီၤ. (လီၣ်ဖျါ ၁၂:၇) လၢတၢ်န့ၣ်အဃိ, မံၤက့လးမ့ၢ် ပှၤကဲခိၣ်ကဲနၢ် မူခိၣ်ကလူးလၢအတီတဖၣ် အသုးမုၢ်သံၣ်ဘိန့ၣ်လီၤ. လံာ်လီၣ်ဖျါအပူၤ ပာ်ဖျါဝဲ ယ့ၣ်ၡူးဒ် မူခိၣ်ကလူး သုးမုၢ်သံၣ်ဘိ လၢအတီတဖၣ် အခိၣ်န့ၣ်လီၤ. (လီၣ်ဖျါ ၁၉:၁၄-၁၆) အါန့ၢ်အန့ၣ် တၢ်မၢဖိပီလူး ပာ်ဖျါလီၤဆီဝဲ “ကစၢ်ယ့ၣ်ၡူး” ဒီး “အကလူးဘၣ်ဃးဒီး အစိအကမီၤ” တဖၣ်အဂ့ၢ်လီၤ. (၂ သ့းစၤလနံ ၁:၇) လၢတၢ်န့ၣ်အဃိ, လံာ်စီဆှံပာ်ဖျါဝဲ ခံမံၤလၢာ်လၢ မံၤက့လးဒီး “အကလူးတဖၣ်” ဒီးယ့ၣ်ၡူးဒီး “အကလူးတဖၣ်” အဂ့ၢ်လီၤ. (မးသဲ ၁၃:၄၁; ၁၆:၂၇; ၂၄:၃၁; ၁ ပ့းတၡူး ၃:၂၂) လံာ်စီဆှံတပာ်ဖျါဝဲ နီတပူၤလၢ မူခိၣ်ကလူး သုးမုၢ်သံၣ်ဘိ အတီခံဖု— မံၤက့လး ကဲခိၣ်ကဲနၢ်တဖု ဒီးယ့ၣ်ၡူး ကဲခိၣ်ကဲနၢ်တဖု— အဂ့ၢ်ဘၣ်အဃိ ပမ့ၢ်ပာ်ဂၢၢ်ပာ်ကျၢၤလၢ မံၤက့လးန့ၣ် မ့ၢ်ဒၣ် ယ့ၣ်ၡူးခရံာ်လၢ အမၤတၢ်ဖံးတၢ်မၤလၢ ဘၣ်ဃးဒီးမူခိၣ်န့ၣ် ကြၢးဝဲဘၣ်ဝဲလီၤ. *
^ လံာ်အဆၢ. 1 တၢ်ဂ့ၢ်တၢ်ပီၢ်အါမးလၢ ပာ်ဖျါဝဲဒၣ် မံၤက့လးအမံၤအံၤ ဘၣ်ထွဲလိာ်သးဒီး ယွၤအဖိခွါအဂ့ၢ်န့ၣ် ကွၢ်ယဟိဝၤ အပှၤအုၣ်အသးတဖၣ် ထုးထီၣ်ဝဲ တၢ်နၢ်ပၢၢ်လီၤတံၢ်လၢ လံာ်စီဆှံအဖီခိၣ် [အဲကလံး], အကတြူၢ် ၂, ကဘျံးပၤ ၃၉၃-၄ ဒီး ဆိကမိၣ်နီၤဖးတၢ်လၢ လံာ်စီဆှံ [ပယီၤ], လံာ်ကဘျံးပၤ ၂၄၃-၄ တက့ၢ်.
