SISITWA sopampepo Mikayera kapi va si tumbura rorunzi moBibeli. Nye, apa ava mu tumbura, age kuna kurugana yuma. Mobuke zaNdaniyera, Mikayera kuna kurwa novaengeli wovadona; mombilive zaJuda, age kuna kulitatagana naSatana; ntani mEhororo, age kuna kurwa yita noMuzonaguli novaengeli vendi. Pokupopera upangeli waJehova ntani nokurwanesa nonkore daKarunga, Mikayera kuparuka kuliza nontanto zedina lyendi: “Yilye ga fana Karunga?” Nye yilye Mikayera?

Pamwe muntu kwa kara nomadina gavali ndi kupitakana pogo. Pasihonena, esimbi Jakopo kwa li divire hena asi Israeli, ntani mupositoli Peturusa, yige Simoni. (Genesis 49:1, 2; Mateusa 10:2) Mokulifana, Bibeli kulikida asi Mikayera edina limwe lyaJesus Kristusa eli nga ruganesa komeho ntani nokonyima zeparu lyendi pevhu. Tu zeni tu tarurure nokonda dopatjangwa mokuwiza kehagero lyangoso.

Muengeli gomunene. Nonkango daKarunga kutumbura Mikayera asi “muengeli gomunene.” (Juda 9) Koneka asi nkango “muengeli gomunene” kwa moneka moBibeli pasimwe tupu, narumwe si asi payinzi. Tayi likida asi pwa kara muengeli gumwe tupu gwangoso. Mokugwederera ko, Jesus kuna mu kwatakanesa noukaro womuengeli gomunene. Kombinga zaHompa Jesus Kristusa gomuvhumbuki, 1 Vatesaronika 4:16 kutanta asi: “Ngazi zuvhika nzigo nezwi lyomuengeli gomunene  nomuhagaro gorumbendo rwaKarunga, yipo nye nga wiza mwene Hompa, a tunde keguru.” Ezwi lyaJesus kuna kulisingonona ngwendi lyomuengeli gomunene. Yipo nye etjangwa eli kutumbura asi Jesus yige mwene muengeli gomunene Mikayera.

Mupitisili govakwayita. Bibeli kulikida asi ‘Mikayera novaengeli vendi va rwisire emukongoro novaengeli valyo.’ (Ehororo 12:7) Kutanta asi Mikayera yige Mupitisili govakwayita wovaengeli wovalimburukwi. Ehororo nalyo kusingonona Jesus ngoMupitisili gonombunga dovakwayita vemeguru. (Ehororo 19:14-16) Ntani mupositoli Paurusa nage ga tumbwire asi “Hompa Jesus” ntani “novaengeli vendi wononkondo.” (2 Vatesaronika 1:7) Bibeli kuuyunga kuhamena Mikayera “novaengeli vendi” ntani Jesus “novaengeli vendi.” (Mateusa 13:41; 16:27; 24:31; 1 Peturusa 3:22) Moomu Nonkango daKarunga kwato oku da likida asi pwa kara nombunga mbali dovakwayita vemeguru wokulimburukwa—zimwe kuzipitisira Mikayera ntani zimwe kuzipitisira Jesus—ya wapa mokuhulisa asi Mikayera yige nawa-nawa Jesus Kristusa mosirugana sendi semeguru. *