NKUDIKA
Nani i Mikaele wa Mbasi Ambuta?
E MBASI ndiona oyikilwanga vo Mikaele kasonama fulu yayingi ko mu Nkand’a Nzambi. Kansi, vava keyikwanga diambu kevanganga. Daniele wasoneka muna nkand’andi vo Mikaele wanwana e vita ye mbasi zambi; muna nkanda Yuda oyikwanga vo wazekana yo Satana; muna Lusengomono vo wanwana e vita ye Nkadi Ampemba ye nkwiya miandi. Muna nwanina Kimfumu kia Yave yo nwana y’atantu a Nzambi, Mikaele ozinganga e ngwizani ye nsas’a nkumbu andi—“Nani Wafwanana yo Nzambi?” Kansi nani i Mikaele?
Ezak’e ntangwa wantu bezayakananga mu nkumbu zole yovo zitatu. Kasikil’owu, Yakobo wayikilwanga mpe vo Isaele, Petelo wa ntumwa wayikilwanga vo Simone. (Etuku 49:1, 2; Matai 10:2) Diau adimosi mpe, Nkand’a Nzambi usonganga vo Mikaele i nkumbu yakaka ya Yesu Kristu una kayizidi ko ova ntoto ye wau kavutuka kun’ezulu. Yambula twafimpa e sono ya Nkand’a Nzambi yikutusadisa mu zaya diambu diadi.
Mbasi Ambuta. Nkand’a Nzambi usonganga vo Mikaele i “mbasi ambuta.” (Yuda 9) E mvovo wau usonganga vo yandi i “mfumu ambasi.” Yandi i mbasi osundidi. O Nkand’a Nzambi mbasi mosi kaka keyikanga vo “mbasi ambuta” ke zayingi ko. Elo, o Yesu wafwana kikilu yikilwa vo mbasi ambuta. Muna 1 Tesalonika 4:16 tutanganga mu kuma kia Yesu Kristu vo: “O Mfumu yandi kibeni, i kulumuka tuka kun’ezulu, ye boko, ye nding’a mbasi ambuta.” Tala, nding’a Yesu iyikilu nze nding’a mbasi ambuta. Ozevo, e sono kiaki kisonganga vo Yesu i Mikaele wa mbasi ambuta.
Mfumu a Makesa. Muna Nkand’a Nzambi tutanganga vo “o Mikaele ye mbasi zandi bele nwana ye ngobodi; . . . ye mbasi zandi.” (Lusengomono 12:7) Mikaele i Mfumu a makesa ma mbasi za kwikizi. Lusengomono oyikilanga mpe Yesu vo Mfumu a makesa ma mbasi za kwikizi. (Lusengomono 19:14-16) Paulu wa ntumwa wanyikila mpe vo “Mfumu Yesu” ye ‘mbasi zandi za nkuma.’ (2 Tesalonika 1:7) Ozevo Nkand’a Nzambi uyikanga vo Mikaele una ye “mbasi zandi,” Yesu ye “mbasi zandi.” (Matai 13:41; 16:27; 24:31; 1 Petelo 3:22) Wau vo o Nkand’a Nzambi ke uyikanga ko vo vena ye buka yole ya mbasi kun’ezulu, ediadi disongele vo Mikaele i Yesu Kristu muna kimfumu ki’ezulu. *
^ tini. 1 Olenda tanga nsangu zakaka zisonganga vo Mikaele i nkumbu yakaka ya Mwan’a Nzambi muna nkanda Estudo Perspicaz das Escrituras volume 2, lukaya lwa 828-829, wavaikiswa kwa Mbangi za Yave..
