UBULENGESHI bwa mupashi ubwitwa ati Mikayeli tabushimbwilwepo makosa mu Baibolo. Nangabe’fyo, pano, kani bamushimbula ninshi alukupyungapo fimo. Mwi buuku lyakwe Danyeli, Mikayeli alukulwa inkondo ne nkalamba imbifi; mu nkalata yakwe Juda, alukupicishanya na Satana; kabili mu Ukufisulula, alukulwa inkondo ne Musenseshi ne fibanda fyakwe. Pa kulama ubwikalicishi bwa baYehova kabili ne kulwisha abapate ba baLesa, Mikayeli alapyunga koti ni fyefyo ishina lyakwe lyalula: “Nani Uuli Koti ni BaLesa?” Mba pano Mikayeli ninani?

Imbi impindi, abantu bambi balishibikiilwe ku mashina aengi. Ku cakubwenako, Yakobi uwaikeleko akale alishibikilwe ishina limbi ati Isilaeli, intangishi Petilo nayo ilishibikilwe ati ni Simoni. (Ifyakutaŋga 49:1, 2; Matayo 10:2) Fyopele’fyo, Baibolo ilatubuula ati Mikayeli lishina na limbi ilya baYesu Klistu, ili baali tabangesa ukufuma kwiulu kabili na lulo babwelelemo panuma ya bwikashi bwabo pa calo. Pano lekeni tulanguluke pa Malembo aatulenga ukulabila ati Mikayeli e baYesu.

Inkalamba iikulu. Amashiwi abaLesa alalabila ati Mikayeli ni “iŋkalamba ikulu.”(Juda 9) Ili ishiwi lilaalula ati “iŋkalamba ikulu pali bonse.” Boneni ukweba ati Mikayeli aletwa ati inkalamba ikulu. Kuli lukoso imo inkalamba ikulu. Muli bucine, ishiwi lyakweba ati “iŋkalamba ikulu” lilaalula ati ni umo lukoso. Baibolo tailabilapo ati inkalamba ishikulu koti bali abengi. Kabili, baYesu balishimbwilwe pamo ne mupunda wabo balipo uwa bunkalamba iikulu. Ukulosha kuli baYesu ababukile ukufuma ku bafwile, 1 Abatesalonike 4:16 balalabila ati: “BaSikulu abene bakaseluka kwiulu, nekubilicisya ukukulu, nesiwi lyaŋkalamba ikulu.” Fyopele’fyo  ishiwi lya baYesu eli baalabila pano ati lya yeyo inkalamba ikulu. Pano kanshi ili ilembo lilukutubuula ati baYesu abene e nkalamba iikulu.

Intanjishi ya fita. Baibolo ilalabila ati: “Mikayeli neŋkalamba syakwe syalilwilwe iŋkondo nakoŋgamato . . . neŋkalamba syakwe.” (Ukufisulula 12:7) Fyopele’fyo, Mikayeli ni Ntanjishi ya fita fya nkalamba sha bucine. Ukufisulula nako kulalabila ati baYesu ni Ntanjishi ya fita fya nkalamba sha bucine. (Ukufisulula 19:14-16) Kabili ne ntanjishi Paulu nayo yashimbula “baSikulu Yesu” ne ‘nkalamba shabo isha makosa.’ (2 AbaTesalonike 1:7; Matayo 16:27; 24:31; 1 Petilo 3:22) Baibolo ilalabila pali Mikayeli ne ‘nkalamba shakwe’ eli na baYesu ne ‘nkalamba shabo.’ (Matayo 13:41) Pakuti tapalipo apa Amashiwi abaLesa alabiile ukweba ati kwiulu kuli amabumba yobilo aya nkalamba shabucetekelo—limo ibumba ilitungululwa na Mikayeli na limbi nalyo ilitungululwa na baYesu—kanshi tungalabila ati Mikayeli tekuti abepo ni umbi. Ni baYesu Klistu ili bali kwiulu. *