MBWEJO
Mikele Mwikeulu Mukatampe I Ani?
KIPANGWA kya ku mushipiditu kitelwa bu Mikele nansha bu Mikaele kekitelelwepo divule mu Bible. Inoko ponso patelwa Mikele, yuka amba kudi byalonga. Mu mukanda wa Danyele balombola’mo Mikele ulwa na bamwikeulu babi; mu mukanda wa Yude namo wipatanya na Satana; ne mu Kusokwelwa, ulwa divita na Dyabola ne bandemona bandi. Mikele ulwilanga bubikadi bwa Yehova ne kutamba balwana na Leza bulwi, kino i kikwatañane na buluji bwa dijina dyandi dishintulula amba—“Lelo I Ani Udi bwa Leza?” Ino Mikele mwine i ani?
Kyaba kimo, bantu betwanga majina mavule. Kimfwa, mukulutuba Yakoba utelwanga ne bu Isalela, mutumibwa Petelo nandi bu Shimona. (Ngalwilo 49:1, 2; Mateo 10:2) Ne Mikele nandi mo monka, Bible ulombola amba Mikele i dijina dikwabo dya Yesu Kidishitu, kumeso ne kupwa kwa būmi bwandi pano panshi. Tubandaulei bubinga bwa mu Bisonekwa bwetufikija ku kunena namino.
Mwikeulu Mukatampe. Kinenwa kya Leza kitela Mikele bu “mwikeulu mukatampe.” (Yude 9) Ko kunena amba “mwikeulu mfumu.” Yuka’mba Mikele watelwa bu “mwikeulu mukatampe.” Kino kilombola’mba mwikeulu wa uno muswelo i umo kete. Na bubine, kishima “mwikeulu mukatampe” mu Bible kitelelwanga’nka muntu umo, i kutupu pokitelelwa bantu bavule. Kisonekwa kya 1 Tesalonika 4:16 kinenena padi Mfumwetu Yesu Kidishitu musanguke amba: “Mfumwetu mwine ukatūka mūlu na lubila lwa lupusa, na diwi dya mwikeulu mukatampe.” Dino diwi dya Yesu ditelwa amba i dya mwikeulu mukatampe. Nanshi kino kisonekwa kilombola patōka amba Yesu ye aye Mikele mwikeulu mukatampe.
Kalala Mwendeji. Bible unena’mba “Mikele ne bamwikeulu bandi balwa na mpumina . . . ne bamwikeulu bandi.” (Kusokwelwa 12:7) Nanshi, Mikele i Kalala Mwendeji wa kibumbo kya bamwikeulu ba kikōkeji. Kadi Kusokwelwa usāsula Yesu bu Mwendeji wa kibumbo kya bamwikeulu ba kikōkeji. (Kusokwelwa 19:14-16) Ne mutumibwa Polo nandi utelelela’tu patōka amba “Mfumwetu Yesu” ne “bamwikeulu bandi bakomokomo.” (2 Tesalonika 1:7) Shi ke pano, Bible utela byonso, Mikele ne “bamwikeulu bandi,” Yesu ne “bamwikeulu bandi.” (Mateo 13:41; Mateo 16:27; 24:31; 1 Petelo 3:22) Ino Kinenwa kya Leza kekilombwelepo nansha pamo amba kudi bibumbo bibidi bya bamwikeulu ba kikōkeji momwa mūlu—amba kimo kyendejibwa na Mikele ne kikwabo nakyo na Yesu—nanshi i kyendele’mo tunene amba Mikele ye enka Yesu Kidishitu mu mwingilo waingila momwa mūlu. *
^ mus. 1 Myanda mikwabo mivule ilombola amba dijina Mikele i dijina dya Mwanā Leza, itanwa mu dibuku Étude perspicace des Écritures, volime 2, paje 280-281, dilupwilwe na Batumoni ba Yehova.
