TSHISAKIDILA
Mikaele muanjelu mutambe bakuabu bunene nnganyi?
BIBLE kêna utamba kuakula bua muanjelu Mikaele to. Kadi misangu yonso idibu bamutela, udi wenza anu bualu kampanda. Tshilejilu, mu mukanda wa Danyele, Mikaele udi uluangana ne banjelu babi; mu mukanda wa Yuda, udi ukokangana ne Satana; mu Buakabuluibua, udi uluangana ne Diabolo ne bademon bende. Padi Mikaele uluila bumfumu bua Yehowa ne uluangisha baluishi ba Nzambi, udi wenza anu tshidi dîna diende diumvuija: “Nnganyi udi bu Nzambi?” Kadi Mikaele eu nnganyi?
Bamue bantu batu ne mêna a bungi. Tshilejilu, bavua kabidi babikila Yakoba ne: Isalele, ne mupostolo Petelo kabidi ne: Simona. (Genese 49:1, 2; Matayo 10:2) Bible udi kabidi uleja ne: Mikaele ndîna dikuabu dia Yezu Kristo kumpala ne kunyima kua dilua diende pa buloba. Tumonayi mu Bible tshitudi tuambila nanku.
Muanjelu mutambe bakuabu bunene (archange). Bile udi ubikila Mikaele ne: ‘muanjelu mutambe bakuabu bunene,’ mmumue ne: “mfumu wa banjelu.” (Yuda 9) Bible utu wakula anu bua ‘muanjelu mutambe bakuabu bunene,’ katu wakula bua ‘banjelu batambe bakuabu bunene’ to. Bidi bituleja ne: kutu anu muanjelu umuepele wa nunku. Anu Yezu ke udibu babikila nunku. Tshilejilu, 1 Tesalonike 4:16 udi wamba bua Yezu Kristo ne: ‘Mukalenge muine neapueke mu diulu wela dîyi dikole ne dîyi dia muanjelu mutambe bakuabu bunene.’ Badi bamba ne: Yezu udi ne dîyi dia muanjelu mutambe bakuabu bonso. Mvese eu udi uleja ne: Yezu ke Mikaele, mfumu wa banjelu.
Mfumu wa tshiluilu. Bible udi wamba ne: ‘Mikaele ne banjelu bende bakaya kuluangana mvita ne dragon ne banjelu bende.’ (Buakabuluibua 12:7) Nunku, Mikaele udi Mfumu wa tshiluilu tshia banjelu ba lulamatu. Mukanda wa Buakabuluibua udi kabidi uleja Yezu muikale Mfumu wa tshiluilu tshia banjelu ba lulamatu. (Buakabuluibua 19:14-16) Mupostolo Paulo udi wakula patoke bua ‘Mukalenge Yezu’ ne ‘banjelu bende ba bukole.’ (2 Tesalonike 1:7) Nunku, Bible udi wakula bua Mikaele ne ‘banjelu bende’ ne bua Yezu ne ‘banjelu bende.’ (Matayo 13:41; 16:27; 24:31; 1 Petelo 3:22) Bu mudi Bible kayi wakula bua biluilu bibidi bia banjelu ba lulamatu mu diulu (tshimue tshia Mikaele ne tshikuabu tshia Yezu), tudi tuamba ne: Mikaele n’Yezu padiye mu diulu. *
^ tshik. 2 Malu makuabu adi aleja ne: Mikaele n’Yezu adi mu mukanda wa Étude perspicace des Écritures, Volime 2, dibeji dia 280-281, ne mu wa Comment raisonner à partir des Écritures, ibeji dia 211-212, mipatula kudi Bantemu ba Yehowa.
